ប្រទេសរុស្ស៊ី ៖ អ្នកនាំពាក្យវិមានក្រឹមឡាំង លោកឌីមីឌ្រីប៉េស្កូវ បានអះអាងនាថ្ងៃទី១៦ តុលាថា មេដឹកនាំកូរ៉េខាងជើងលោកគីម ជុងអ៊ុន បានទទួលការអញ្ជើញមួយ ហើយលោកចង់មកបំពេញទស្សនកិច្ចមួយនៅរុស្ស៊ី។
បើតាមលោកប៉េស្កូវថា កាលបរិច្ឆេទ និងទីកន្លែងនៃការជួបគ្នា នឹងពិភាក្សាតាមផ្លូវការទូត។ ទោះបីយ៉ាងណាតាមសេចក្ដីរាយការណ៍របស់កាសែតរុស្ស៊ី IZVESTIA ដែលដកស្រង់ប្រភពការទូតកូរ៉េខាងត្បូងថា លោកគីម ជុងអ៊ុន អាចមកកាន់រុស្ស៊ីនាដំណាច់ខែតុលា ឬដើមខែវិច្ឆិកា។ ហើយក្នុងចំណោមកន្លែងនៃការជួបពិភាក្សាគ្នាជាយថាហេតុ ជាមួយប្រធានាធិបតីរុស្ស៊ីលោកវ្ល៉ាឌីមៀរ ពូទីន អាចនៅក្រុងមូស្គូ ឬក្រុងវ្ល៉ាឌីវ៉ូស្តុក។
កាលពីដើមខែកញ្ញាប្រធានព្រឹទ្ធសភារុស្ស៊ីលោកស្រីវ៉ាឡេនទីណាម៉ាតវីអេនកូ ធ្លាប់ប្រកាសថា លោកស្រីបានប្រគល់សេចក្ដីអញ្ជើញរបស់លោកពូទីន ជូនដល់លោកគីមជុងអ៊ុន ដើម្បីឲ្យលោកមកបំពេញទស្សនកិច្ចមួយនៅរុស្ស៊ី។ លោកគីមថ្លែងថា ត្រៀមមកបំពេញទស្សនកិច្ចមួយបែបនេះ៕
ចែករំលែកព័តមាននេះ