រាជធានីភ្នំពេញ ៖ បុរសជាជាងដែកម្នាក់ត្រូវបានភ្លើងឆាបឆេះរលាកពេញផ្ទៃមុខ និងខ្លួនប្រាណរងរបួសយ៉ាងធ្ងន់ធ្ងរ ខណៈដែលបុរសជាកម្មករផែម្នាក់ដាក់ឆ្នាំងដាំបាយហើយផ្ទុះកំប៉ុងហ្គាសទៅប៉ះជាមួយនិងប៊ីដុងសាំងមួយដែលនៅក្បែរនោះ បង្កជាអគ្គិភ័យឆាបឆេះរោងដែលធ្វើអំពីដែកប្រក់តង់តូចមួយ ហើយម៉ូតូចំនួន២គ្រឿងទៀតក៏ត្រូវបានភ្លើងឆេះអស់គ្មានសល់នោះ។
ហេតុការណ៍នេះដែរបានកើតឡើងនៅវេលាម៉ោង១០និង៣០នាទីព្រឹកថ្ងៃទី១៥ ខែតុលា ឆ្នាំ២០១៨ នៅចំណុចលើកំ ពុងផែអណ្តែត (ក្បែរភោជនីយដ្ឋានទីតានិក) ផ្លូវព្រះស៊ីសុវត្ថិ ក្នុងសង្កាត់វត្តភ្នំ ខណ្ឌដូនពេញ។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា បុរសរងគ្រោះ ឈ្មោះ ធូ ចែម អាយុ២៧ឆ្នាំ មុខរបរជាងដែក សព្វថ្ងៃស្នាក់នៅក្នុងរោងមួយលើផែអណ្តែតជាកន្លែងកើតហេតុខាងលើ។
មុនពេលកើតហេតុ បុរសម្នាក់ឈ្មោះ អុង តាក់ អាយុ៥០ឆ្នាំ ជាកម្មករផែ បានដាក់ឆ្នាំងដាំបាយនៅលើចង្ក្រានហ្គាស នៅស្នាក់ក្នុងរោងស្នាក់នៅរបស់ពួកគាត់មួយ ដែលធ្វើ អំពីដែកប្រក់តង់ ពណ៌ខៀវមួយនៅលើផែអណ្តែតខាងលើ ដោយមានម៉ូតូមួយគ្រឿងម៉ាកហុងដា ធុនសេ១២៥ ស៊េរីឆ្នាំ២០១៧ ពណ៌ខ្មៅ មួយគ្រឿង និងម៉ូតូមួយគ្រឿងទៀតម៉ាកស៊ុយហ្សុយគីស្មាស់ ពណ៌ខ្មៅ ស៊េរីឆ្នាំ២០១៣ ពាក់ស្លាកលេខភ្នំពេញ១BN-១៦៧៤ នៅក្បែរ នោះផងដែរ។
តាមប្រភពដដែលបានបន្តទៀតថា ពេលដែលបុរសវ័យចំណាស់ម្នាក់ ដែលធ្វើការជាមួយគ្នាកំពុងតែដាំបាយក្នុងរោងស្នាក់នៅរបស់ខ្លួននោះ ក៏ស្រាប់តែផ្ទុះកំប៉ុងហ្គាសខ្ទាតផ្កាភ្លើងទៅប៉ះជាមួយនឹងប៊ីដុង សាំងមួយ បង្កជាអគ្គិភ័យឆាបឆេះយ៉ាងសន្ធោសន្ធៅតែម្តង។
ភ្លាមនោះកម្លាំងប្រជាការពាររបស់សាលាខណ្ឌដូនពេញ ក៏បានចេញរ៉ឺម៉កដឹកធុងទឹកដែលប្រើសម្រាប់បាញ់សម្អាតតាមដងផ្លូវចំនួន២គ្រឿងទៅជួយបាញ់ទឹកពន្លត់ផងដែរ ។
ក្នុងហេតុការណ៍នេះ បណ្តាលអោយបុរសម្នាក់ជាជាងដែកត្រូវបានភ្លើងឆេះរលាកពេញផ្ទៃមុខ និងពេញខ្លួនប្រាណរងរបួសយ៉ាងធ្ងន់ធ្ងរ ហើយម៉ូតូទាំង ២គ្រឿងក៏ត្រូវបានភ្លើងឆេះខ្ទេចអស់គ្មានសល់ផងដែរ។
ក្នុងករណីអគ្គិភ័យឆេះរោងនៅលើផែអណ្តែតខាងលើ ដែលបណ្តាលមកពីផ្ទុះកំប៉ុងហ្គាសនៅពេលដាំបាយនេះ បុរសជាងដែករងគ្រោះត្រូវបានគេបញ្ជូនយកទៅធ្វើការព្យាបាលនៅមន្ទីរពេទ្យកាល់ម៉ែត្រ ដោយបានប្រើប្រាស់ទឹកអស់ចំនួន២រ៉ឺម៉ក ហើយម៉ូតូមួយគ្រឿងម៉ាកហុងដា ធុនC125 ស៊េរីឆ្នាំ២០១៧ ត្រូវបានភ្លើងឆេះអស់គ្មានសល់នៅតែឆ្អឹង និងម៉ូតូមួយគ្រឿងទៀតម៉ាកស៊ុយហ្សុយគីស្មាស់ ក៏ត្រូវបានភ្លើងឆេះស្ទើរតែអស់ និងរងការខូចខាតទាំងស្រុងផងដែរ ៕
ចែករំលែកព័តមាននេះ