ខេត្តតាកែវ ៖ ក្មេងប្រុស២នាក់ក្នុងចំណោម៣នាក់ ដែលជាបងប្អូនបង្កើតនឹងគ្នាបានលង់ទឹកស្លាប់យ៉ាងអាណោចអាធ័ម ខណៈពួកគេនាំគ្នាយកបាយទៅឲ្យជីតា ដែលកំពុងបោចត្រកៀតនៅមាត់បឹង កាលពីថ្ងៃទី១៣ តុលា វេលាម៉ោង១១និង១៥នាទីថ្ងៃត្រង់ នៅភូមិព្រែផ្តៅ«ក» ឃុំព្រែផ្តៅ ស្រុកអង្គរបុរី ។ឧប្បត្តិហេតុលង់ទឹកនេះ កើតឡើងខណៈក្មេងប្រុសទាំង៣នាក់ យកបាយទៅឲ្យជីតារួច ក៏នាំគ្នាដើរត្រឡប់មកផ្ទះវិញ ដោយដើរផ្លូវកាត់ឆ្លងទឹកប្រឡាយ ក៏លង់ស្លាប់២នាក់តែម្តង ។
លោកវរសេនីយ៍ឯក ភី ឆុន អធិការនគរបាលស្រុកអង្គរបុរីបានឲ្យដឹងថា ក្មេងប្រុសដែលលង់ទឹកស្លាប់ទាំង២នាក់នេះ ម្នាក់ឈ្មោះ ហុីមមករា អាយុ១០ឆ្នាំ និងម្នាក់ទៀតឈ្មោះ ហុីមបញ្ញា អាយុ៨ឆ្នាំ ឪពុកឈ្មោះ ហុីម អៃ ម្តាយឈ្មោះ សំ ភ័ក្ត្រ ទៅធ្វើការងារនៅប្រទេសថៃ ដោយទុកកូនទាំង៣នាក់ ឲ្យនៅជាមួយយាយតាជួយមើលថែ ។
លោកអធិការឲ្យដឹងទៀតថា ពេលក្មេងប្រុសទាំង២នាក់បងប្អូនលង់ទឹកនោះ ប្អូនស្រីម្នាក់ដែលទៅជាមួយមិនបានដើរឆ្លងទឹកទេ ។ លុះបាត់បងប្រុសទាំង២នាក់យូរពេក ក្មេងស្រីក៏ដើរយំត្រឡប់ទៅប្រាប់ជីតាដែលកំពុងបោចត្រកៀតវិញ ពេលនោះក៏មានការឆោឡោឡើងដឹងដល់អ្នកភូមិបាននាំគ្នាចុះក្នុងប្រឡាយរាវរកសពយកមកផ្ទះធ្វើបុណ្យ ។ មិនដឹងថា តើឪពុកម្តាយដែលកំពុងធ្វើការនៅប្រទេសថៃស្លុតចិត្តបែបណាឡើយ បើកូន៣នាក់ស្លាប់២នាក់ទៅហើយនោះ ៕
ចែករំលែកព័តមាននេះ