ខេត្តកំពង់ស្ពឺ ៖ ជនសង្ស័យជាមុខសញ្ញាចែកចាយ និងជួញដូរគ្រឿងញៀន២នាក់ដែលសមត្ថកិច្ចតាមដានជាយូរមកហើយនោះ ពេលនេះឃាត់ខ្លួនបានហើយ បន្ទាប់ពីពួកគេជិះម៉ូតូឌុបគ្នាយកថ្នាំញៀនទៅចែកចាយក្នុងភូមិ។ ការបង្ក្រាបនេះធ្វើឡើងកាលពីម៉ោង៨និង៣០នាទីយប់ថ្ងៃទី១៥ ខែតុលា ឆ្នាំ២០១៨ ស្ថិតក្នុងភូមិស្រែមាន់…
ខេត្តកំពង់ស្ពឺ ៖ ជនសង្ស័យជាមុខសញ្ញាចែកចាយ និងជួញដូរគ្រឿងញៀន២នាក់ដែលសមត្ថកិច្ចតាមដានជាយូរមកហើយនោះ ពេលនេះឃាត់ខ្លួនបានហើយ បន្ទាប់ពីពួកគេជិះម៉ូតូឌុបគ្នាយកថ្នាំញៀនទៅចែកចាយក្នុងភូមិ។ ការបង្ក្រាបនេះធ្វើឡើងកាលពីម៉ោង៨និង៣០នាទីយប់ថ្ងៃទី១៥ ខែតុលា ឆ្នាំ២០១៨ ស្ថិតក្នុងភូមិស្រែមាន់ ឃុំស្រង់ ស្រុកគងពិសី ខេត្តកំពង់ស្ពឺ។
ជនសង្ស័យខាងលើ ទី១-ឈ្មោះ នួន ហឺន ភេទប្រុស អាយុ៤១ឆ្នាំ និងទី២-ឈ្មោះទក កំសត់ ភេទប្រុស អាយុ៣៩ឆ្នាំ។ ពួកគេទាំង២នាក់រស់នៅភូមិថ្នល់បត់ ឃុំក្រាំងអំពិល ស្រុកសំរោងទង ខេត្តកំពង់ស្ពឺ។
ប្រភពពីសមត្ថកិច្ចជំនាញគ្រឿងញៀនឲ្យដឹងថា មុនពេលឈានដល់ចុះបង្ក្រាបមុខសញ្ញាខាងលើ សមត្ថកិច្ចទទួលសេចក្តីរាយការណ៍សម្ងាត់ពីប្រជាពលរដ្ឋក្នុងភូមិខាងលើថា បានប្រទះឃើញជនសង្ស័យ២នាក់ជិះម៉ូតូ១គ្រឿងចូលភូមិពួកគាត់គួរឲ្យសង្ស័យ តែមិនដឹងពីបំណងពួកគេ ចង់ធ្វើសកម្មភាពល្មើសអ្វីទេ។
ប្រភពដដែលបន្តថា ក្រោយទទួលដំណឹងនេះភ្លាម កម្លាំងជំនាញអធិការដ្ឋាននគរបាលបានចុះស្រាវជ្រាវក៏ប្រទះឃើញជនសង្ស័យកំពុងជិះម៉ូតូដឹកគ្នាក្នុងភូមិកើតហេតុខាងលើ ក៏ឃាត់ខ្លួនដើម្បីធ្វើការឆែកឆេរ។ ក្រោយឆែកលើខ្លួនជនសង្ស័យទាំង២នាក់រួច សមត្ថកិច្ចរកឃើញម្សៅក្រាមពណ៌សចំនួន១១កញ្ចប់នៅនឹងខ្លួនពួកគេតែម្តង ព្រមទាំងទូរស័ព្ទ៣គ្រឿង និងម៉ូតូ១គ្រឿង ហើយក៏នាំខ្លួនជនសង្ស័យទាំង២មកកាន់អធិការដ្ឋានគរបាលស្រុកដើម្បីសាកសួរបន្ត។
នៅចំពោះមុខសមត្ថកិច្ចជនសង្ស័យទាំង២ឆ្លើយសារភាពថា «ថ្នាំញៀនទាំងអស់គឺជារបស់ខ្លួនដែលយកទៅលក់ឱ្យម៉ូយនៅចំណុចខាងលើ តែម៉ូយមិនទាន់មកយកផងក៏ត្រូវសមត្ថកិច្ចឃាត់ខ្លួនបានតែម្តង។ ហើយសកម្មភាពចែកចាយថ្នាំញៀននេះអស់រយៈពេលជិត២ឆ្នាំមកហើយ ទើបលើកនេះភ្លាត់ស្នៀងត្រូវសមត្ថកិច្ចចាប់បាន»។ លុះនៅព្រឹកថ្ងៃទី១៦ តុលា ក្រោយកសាងសំណុំរឿងរួចរាល់ សមត្ថកិច្ចបានបញ្ជូនខ្លួនទៅការិយាល័យជំនាញគ្រឿងញៀន ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ