ប្រទេសកូរ៉េទាំង២ ៖ អាជ្ញាធរកូរ៉េខាងត្បូងនិងកូរ៉េខាងជើងបានព្រមព្រៀងគ្នា កាលពីថ្ងៃទី១៥ តុលា ស្ដារឡើងវិញការតភ្ជាប់ផ្លូវថ្នល់ និងផ្លូវដែក ក្នុងក្របខណ្ឌនៃការខិតចូលជិតគ្នា ចាប់ផ្ដើមក្រោយការសន្យារំសាយកម្មវិធីនុយក្លេអ៊ែររបស់ក្រុងព្យុងយ៉ាង។ កិច្ចព្រមព្រៀងត្រូវបានចុះហត្ថលេខានៅភូមិប៉ានមុនហ្សូម…
ប្រទេសកូរ៉េទាំង២ ៖ អាជ្ញាធរកូរ៉េខាងត្បូងនិងកូរ៉េខាងជើងបានព្រមព្រៀងគ្នា កាលពីថ្ងៃទី១៥ តុលា ស្ដារឡើងវិញការតភ្ជាប់ផ្លូវថ្នល់ និងផ្លូវដែក ក្នុងក្របខណ្ឌនៃការខិតចូលជិតគ្នា ចាប់ផ្ដើមក្រោយការសន្យារំសាយកម្មវិធីនុយក្លេអ៊ែររបស់ក្រុងព្យុងយ៉ាង។
កិច្ចព្រមព្រៀងត្រូវបានចុះហត្ថលេខានៅភូមិប៉ានមុនហ្សូម តំបន់ហាមមិនឲ្យមានយោធា ដែលបែងចែកកូរ៉េទាំង២។ កិច្ចព្រមព្រៀងនេះសម្រេចបាន ក្រោយការជួបគ្នាកំពូល៣លើករវាងប្រធានាធិបតីកូរ៉េខាងត្បូងលោក MOON JAE IN និងមេដឹកនាំកូរ៉េខាងជើងលោកគីមជុងអ៊ុន។
ក្នុងសេចក្ដីប្រកាសមួយក្រសួងបង្រួបបង្រួមកូរ៉េខាងត្បូងនិយាយថា កូរ៉េទាំង២សម្រេចបានកិច្ចព្រមព្រៀងមួយក្រោយការចរចាគ្នាដោយស្មោះស្ម័គ្រ លើបណ្ដាផែនការសកម្មភាព ដើម្បីពង្រីកទំនាក់ទំនងអន្តរកូរ៉េឲ្យឡើងដល់កម្រិតខ្ពស់ថ្មីមួយ។ ពិធីបើកការតភ្ជាប់ផ្លូវដែក និងផ្លូវថ្នល់រវាងកូរ៉េទាំង២ នឹងរៀបចំធ្វើនាដំណាច់ខែវិច្ឆិកា ឬដើមខែឆ្នូ។
ផ្លូវថ្នល់ និងផ្លូវដែកតភ្ចាប់កូរ៉េទាំង២ត្រូវបានកាត់ផ្ដាច់ចាប់តាំងពីបញ្ចប់សង្គ្រាមកាលពីឆ្នាំ១៩៥៣មក។ ម្យ៉ាងទៀតភាគីទាំង២បានសម្រេចជួបគ្នាជាថ្មីនាដំណាច់ខែវិច្ឆិកា ដើម្បីគ្រោងដាក់បេក្ខភាពរួមគ្នាសម្រាប់ទទួលរៀបចំ ការប្រកួតកីឡាអូឡាំពិកឆ្នាំ២០៣២ ហើយជំរុញការប្រាស្រ័យទាក់ទងគ្នាតាមអ៊ីនធើរណេត រវាងបណ្ដាសមាជិកគ្រួសារដែលព្រាត់គ្នាចាប់តាំងពីមានជម្លោះមក។
ម្យ៉ាងទៀតសមាជិកអគ្គសេនាធិការកងទ័ពនៃប្រទេសទាំង២ ត្រូវជួបគ្នានាពេលខាងមុខឆាប់ៗ ដើម្បីកំណត់ពីបណ្ដាបែបបទនៃកិច្ចព្រមព្រៀងយោធា ដែលចុះហត្ថលេខានាឱកាសនៃការជួបគ្នាកាលពីខែមុន ដែលគ្រោងបង្កើតគណៈកម្មាធិការការពាររួមមួយ បញ្ឈប់សមយុទ្ធយោធា បង្កើតតំបន់ហាមឃាត់ការហោះហើរនៅតាមព្រំដែនព្រមទាំងការដោះមីន នៅតំបន់ហាមមិនឲ្យមានកងទ័ព។
ម្យ៉ាងទៀតកូរ៉េទាំង២ និងទីបញ្ជាការដ្ឋានអ.ស.បប្រចាំកូរ៉េ បានជួបប្រជុំគ្នាត្រីភាគីជាលើកដំបូងកាលពីថ្ងៃទី១៦ តុលា ដើម្បីពិភាក្សាពីការរំសាយយោធានៅព្រំដែនរវាងកូរ៉េទាំង២។ ការជួបគ្នានោះក៏ត្រូវពិនិត្យលើការខិតខំប្រឹងប្រែងនានា ដើម្បីរំសាយយោធានៅតំបន់ហាមមិនឲ្យមានកងទ័ព ពិសេសការដោះគ្រាប់មីន ការដកចេញបណ្ដាប៉ុស្តិ៍យាម និងកែលម្អបណ្ដាឧបករណ៍ត្រួតពិនិត្យតាមព្រំដែន។ ការជួបគ្នានោះប្រព្រឹត្តទៅនៅភូមិប៉ានមុនហ្សូម៕
ចែករំលែកព័តមាននេះ