រាជធានីភ្នំពេញ ៖ កម្លាំងនគរបាលអន្តោប្រវេសន៍កម្ពុជា ដែលដឹកនាំដោយលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនីតិវិធី សហការជាមួយនាយកដ្ឋានប្រឆាំងបទល្មើសល្បែងស៊ីសង និងកម្លាំងក្រសួងសន្តិសុខរបស់ប្រទេសចិន បានធ្វើការបណ្តេញជនជាតិចិនប្រុសស្រីចំនួន៩១នាក់ក្នុងនោះស្រី២១នាក់…
រាជធានីភ្នំពេញ ៖ កម្លាំងនគរបាលអន្តោប្រវេសន៍កម្ពុជា ដែលដឹកនាំដោយលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនីតិវិធី សហការជាមួយនាយកដ្ឋានប្រឆាំងបទល្មើសល្បែងស៊ីសង និងកម្លាំងក្រសួងសន្តិសុខរបស់ប្រទេសចិន បានធ្វើការបណ្តេញជនជាតិចិនប្រុសស្រីចំនួន៩១នាក់ក្នុងនោះស្រី២១នាក់ តាមជើងយន្តហោះពិសេសមួយគ្រឿងរបស់រដ្ឋាភិបាលចិន នៅអាកាសយានដ្ឋានអន្តរជាតិភ្នំពេញ ។
លោកឧត្តមសេនីយ៍ឯក អ៊ុក ហៃសីឡា បានប្រាប់ឱ្យដឹងថា តាងនាមរូបខ្ញុំផ្ទាល់ដែលជាតំណាងឲ្យអគ្គនាយក នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការជាមួយនិងកម្លាំងនាយកដ្ឋានប្រឆាំងបទល្មើសល្បែងស៊ីសងតាមប្រព័ន្ធអុីនធើណេត និងកម្លាំងនគរបាលក្រសួងសន្តិសុខរបស់ប្រទេសចិន បានធ្វើការបណ្តេញជនជាតិចិនចំនួន៩១នាក់ តាមជើងយន្តហោះពិសេសរបស់ប្រទេសចិនមួយគ្រឿង ដោយមានកម្លាំងសមត្ថកិច្ចរបស់ចិនចំនួន១៨០នាក់មកអមដំណើរផងដែរ ដើម្បីបញ្ជូនទៅកាន់ខេត្តគ័ងចូវវិញ ។
ក្រុមជនជាតិចិនទាំង៩១នាក់ ដែលត្រូវបានបណ្តេញចេញនាពេលនេះគឺបានធ្វើឡើងក្រោយពីកម្លាំងរបស់នាយកដ្ឋានប្រឆាំងបទល្មើសល្បែងស៊ីសង តាមប្រព័ន្ធអុីនធើណេតធ្វើការបង្ក្រាបបានកាលពីថ្ងៃទី២៩ កញ្ញា ឆ្នាំ២០១៨ នៅឯខេត្តកំពតកន្លងមកនេះ បញ្ជូនមកកាន់អគ្គនាយកដ្ឋានអន្តោប្រវេសន៍ ដើម្បីរក្សាទុកធ្វើឯកសារទៅតាមផ្លូវច្បាប់ និងបានធ្វើការបណ្តេញចេញនៅពេលនេះ ។
លោកឧត្តមសេនីយ៍មានប្រសាសន៍បន្តទៀតថា ពាក់ព័ន្ធទៅនឹងការបណ្តេញចេញទៅវិញនូវជនជាតិចិនទាំង៩១នាក់ខាងលើនេះ គឺកម្លាំងនាយកដ្ឋានប្រឆាំងបទល្មើសល្បែងបានធ្វើការបង្ក្រាបទៅតាមដីការបស់មិត្តចិន ដែលមានបទល្មើសគំរាមកំហែង ជំរិតទារប្រាក់ ឆបោក តាមប្រព័ន្ធទូរគមនាគមន៍ (VOIP) នៅឯប្រទេសចិន រួចហើយរត់មកលាក់ខ្លួននៅក្នុងប្រទេសកម្ពុជារបស់យើង ។
ការបណ្តេញជនជាតិចិនទាំង៩១នាក់ខាងលើនេះដែរ គឺមិនមែនទើបតែធ្វើជាលើកទីមួយនោះទេ ។ ក្នុងឆ្នាំ២០១៨នេះ កម្លាំងអគ្គនាយកដ្ឋានអន្តោប្រវេសន៍បានឃាត់ខ្លួន ទទួលនិងបណ្តេញជនបរទេសទៅតាមប្រកាសរបស់ក្រសួងមហាផ្ទៃ បានចំនួនសរុប៩៨២នាក់ ក្នុងនោះមានស្រីចំនួន១៨២នាក់និងមានចំនួន៥០សញ្ជាតិផ្សេងៗគ្នាទៀតផងដែរ ។
លោកថ្លែងទៀតថា សំរាប់តែជនជាតិចិនតែមួយ ភាគច្រើនពួកគេប្រព្រឹត្តិបទល្មើសចំនួន២ប្រភេទគឺ
ទី១-បទល្មើសគំរាមជំរិត ឆបោក តាមប្រព័ន្ធទូរគមនាគមន៍(អុីនធើណេត) VOIP ដោយបានធ្វើការចាប់ឃាត់ខ្លួនបានចំនួន ៣៧៣នាក់ (ស្រី៦៦នាក់) និងទី២-គឺបទល្មើសសេដ្ឋកិច្ច(នៅប្រទេសចិន) ហើយសមត្ថកិច្ចចិនស្នើសុំសហការចាប់ខ្លួនបានចំនួន៣៥នាក់(ស្រី៧នាក់)ផងដែរ បើគិតត្រឹមថ្ងៃទី១៥ ខែតុលា
ឆ្នាំ២០១៨ ។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនីតិវិធីថ្លែងថា ក្នុងនាមជាកម្លាំងមានសមត្ថកិច្ចទទួលបន្ទុកផ្នែកយុត្តិធម៌ សុំអំពាវនាវទៅដល់ជនរួមជាតិ ក៏ដូចជាអ្នកវិនិយោគ អ្នករកស៊ីទាំងអស់នៅក្នុងប្រទេសកម្ពុជា សុំឲ្យមានការសហការផ្តល់ព័ត៌មានមកសមត្ថកិច្ច ប្រសិនបើមានការសង្ស័យថា មានជនបរទេសលាក់ខ្លួនជាក្រុម ដើម្បីបង្កើតមុខរបររកស៊ីដែលខុសច្បាប់ណាមួយនោះ និងសុំរាយការណ៍ទៅសមត្ថកិច្ចដែលនៅក្បែរនោះ ។
ហើយក៏ធ្វើការអំពាវនាវទៅដល់ជនបរទេសផងដែរថា ប្រសិនបើចូលមករកស៊ីឬក៏ដើរកម្សាន្តក្តី មេត្តាធ្វើអ្វីៗឲ្យត្រូវច្បាប់ ប្រសិនបើមិនដូច្នោះទេ កម្លាំងសមត្ថកិច្ចកម្ពុជានឹងធ្វើការបង្ក្រាបចាប់បញ្ជូនចេញទៅវិញដូចជនជាតិចិនទាំង៩១នាក់នាពេលនេះយ៉ាងដូច្នោះដែរ ៕
ចែករំលែកព័តមាននេះ