រាជធានីភ្នំពេញ ៖ បុរសជនជាតិចិនម្នាក់ មានអាការៈមិនស្រួលខ្លួន ហើយបានជិះម៉ូតូរ៉ឺម៉កកង់បី១គ្រឿង ធ្វើដំណើរទៅកាន់គ្លីនិកមួយកន្លែងយីហោ «ផេង វុទ្ធី »ដែលមានគ្រូពេទ្យជាជនជាតិចិនដូចគ្នា ដើម្បីជួយព្យាបាល ។ លុះទៅដល់ គាត់បានប្រាប់ទៅគ្រូពេទ្យចិនប្រុស-ស្រីទាំង២នាក់នោះថា មិនដឹងយ៉ាងម៉េចទេ គាត់ចេះតែឈឺក្បាល ឈឺតាមសន្លាក់ដៃ សន្លាក់ជើង និងអស់កម្លាំង ។
ភ្លាមៗនោះ គ្រូពេទ្យបានជួសឈាមពិនិត្យឃើញថា គាត់មានជំងឺគ្រុនឈាមក៏បានដាក់សេរ៉ូមឱ្យមួយប្លោកហើយមួយប្លោកទៀត ស្រាប់តែគាត់មានអាការៈកាន់តែមិនស្រួលខ្លាំងហើយបានដាច់ខ្យល់ស្លាប់ភ្លាមៗ បង្កឲ្យមានការភ្ញាក់ផ្អើលតែម្ដង ។ ចំណែកគ្រូពេទ្យទាំង២នាក់ ត្រូវបានកម្លាំងនគរបាលឃាត់ខ្លួន បន្ទាប់ពីរកឃើញថា ព្យាបាលជំងឺខុសបច្ចេកទេស។ ហេតុការណ៍នេះ កើតឡើងកាលពីវេលាម៉ោង៦ល្ងាចថ្ងៃទី១៥ តុលា ស្ថិតក្នុងគ្លីនិកយីហោ «ផេង វុទ្ធី » មានទីតាំងស្ថិតនៅក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពឲ្យដឹងថា បុរសដែលស្លាប់ខាងលើ ឈ្មោះ WANG ZHIQIANG អាយុ៤៩ឆ្នាំ ជនជាតិចិន ជាបុគ្គលិកផ្ទះសំណាក់មិត្តភាពថ្មី ស្នាក់នៅក្នុងភូមិកើតហេតុខាងលើ។ ចំណែកគ្រូពេទ្យជនជាតិចិនទាំង២នាក់ម្នាក់ឈ្មោះ LI XIAOYONG ភេទប្រុស អាយុ៣៩ឆ្នាំ និងម្នាក់ទៀតឈ្មោះCHEN LIPING ភេទស្រីអាយុ៣១ឆ្នាំ អ្នកទាំង២ស្នាក់នៅក្នុងគ្លីនិកផេងវុទ្ធីនោះជាមួយគ្នា កំពុងត្រូវបានឃុំខ្លួនបណ្ដោះអាសន្ននៅផ្នែកព្រហ្មទណ្ឌនគរបាលខណ្ឌពោធិ៍សែនជ័យ រង់ចាំបញ្ជូនទៅកាន់តុលាការ។
យុវជនម្នាក់ ឈ្មោះWANG GILONG អាយុ២៦ឆ្នាំ ត្រូវជាកូនប្រុសជនរងគ្រោះបានប្ដឹងសុំឲ្យនគរបាលឲ្យជួយអន្តរាគមន៏ ទើបនគរបាលខណ្ឌពោធិ៍សែនជ័យចុះទៅឃាត់ខ្លួនគ្រូពេទ្យទាំង២នាក់នោះនាំទៅសាកសួរចាត់ការតាមច្បាប់។
ចែករំលែកព័តមាននេះ