ខេត្តមណ្ឌលគិរី ៖ ជនសង្ស័យក្នុងករណីអំពើហិង្សាមានស្ថានទម្ងន់ទោសម្នាក់ត្រូវបានចៅក្រមស៊ើបសួរនៃសាលាដំបូងខេត្តមណ្ឌលគិរីសម្រេចធ្វើការដោះលែងវិញភ្លាមៗ ក្រោយនគរបាលបានបញ្ជូនសំណុំរឿងដល់ដៃ កាលពីថ្ងៃទី១៤ ខែតុលា ឆ្នាំ២០១៨ ។ ការសម្រេចរបស់ចៅក្រមស៊ើបសួរដោះលែងជនសង្ស័យនេះបានធ្វើឲ្យមន្ត្រីនគរបាល និងព្រះរាជអាជ្ញារងអមសាលាដំបូងខេត្តមណ្ឌលគិរី…
ខេត្តមណ្ឌលគិរី ៖ ជនសង្ស័យក្នុងករណីអំពើហិង្សាមានស្ថានទម្ងន់ទោសម្នាក់ត្រូវបានចៅក្រមស៊ើបសួរនៃសាលាដំបូងខេត្តមណ្ឌលគិរីសម្រេចធ្វើការដោះលែងវិញភ្លាមៗ ក្រោយនគរបាលបានបញ្ជូនសំណុំរឿងដល់ដៃ កាលពីថ្ងៃទី១៤ ខែតុលា ឆ្នាំ២០១៨ ។
ការសម្រេចរបស់ចៅក្រមស៊ើបសួរដោះលែងជនសង្ស័យនេះបានធ្វើឲ្យមន្ត្រីនគរបាល និងព្រះរាជអាជ្ញារងអមសាលាដំបូងខេត្តមណ្ឌលគិរី ជាពិសេសគ្រួសារជនរងគ្រោះ មានការមិនពេញចិត្ត ចំពោះការអនុវត្តន៍នីតិវិធីរបស់ចៅក្រមស៊ើបសួរនៃសាលាដំបូងខេត្ត ក្រោយការដោះលែងជនសង្ស័យឱ្យស្ថិតនៅក្រៅឃុំ ខណៈជនរងគ្រោះកំពុងស្ថិតក្នុងស្ថានភាពធ្ងន់ធ្ងរផងនោះ ។
លោកឧត្តមសេនីយ៍ត្រី សូ សុវណ្ណ ស្នងការរងឲ្យដឹងថា «ក្រោយពេលលោកចៅក្រមស៊ើបសួរសាលាដំបូងខេត្ត ដោះលែងជនសង្ស័យក្នុងករណីអំពើហិង្សាដោយចេតនា ឲ្យនៅក្រៅឃុំ វាជាអំពើស្តែងឲ្យឃើញនូវភាពអយុត្តិធម៌មួយសម្រាប់ជនរងគ្រោះខ្លាំងណាស់ ត្បិតរហូតមកដល់ពេលនេះ ជនរងគ្រោះកំពុងតែស្ថិតនៅក្នុងស្ថានភាពយ៉ាប់យ៉ឺន ហើយសង្គ្រោះបន្ទាន់នៅមន្ទីរពេទ្យនៅឡើយ» ។
ព្រះរាជអាជ្ញានៃសាលាដំបូងខេត្តមណ្ឌលគិរីលោក ម៉ម វណ្ណដា នឹងអ្នកនាំពាក្យផងនោះបានឲ្យដឹងនៅព្រឹកថ្ងៃទី១៦ ខែតុលា ថា «ក្នុងករណីនេះការសម្រេចឱ្យនៅក្រៅឃុំឬត្រូវឃុំ ជាឆន្ទានុសិទ្ធរបស់ចៅក្រមស៊ើបសួរជាអ្នកសម្រេច ។ ក្នុងនោះនគរបាលយុត្តិធម៌បានកសាងសំណុំរឿងបានត្រឹមត្រូវហើយ និងបានឃាត់ខ្លួនជនសង្ស័យ បញ្ជូនមកកាន់អយ្យការអមសាលាដំបូង ដើម្បីសាកសួរ និងធ្វើការចោទប្រកាន់ជនសង្ស័យ ។ ស្របពេលដែលបញ្ជូនជនសង្ស័យទៅចៅក្រមស៊ើបសួរនោះ ព្រះរាជអាជ្ញាបានស្នើរសុំអោយមានការឃុំខ្លួនជនសង្ស័យផងដែរដោយបញ្ជាក់អំពីស្ថានភាពនៃរបួសរបស់ជនរងគ្រោះ» ។
លោកព្រះរាជអាជ្ញារងបន្តថា «ចៅក្រមស៊ើបសួរមិនបានយល់ព្រមតាមការស្នើរសូមរបស់ព្រះរាជអាជ្ញានោះទេ ថែមទាំងបានដោះលែងជនសង្ស័យ ក្រោយបញ្ជួនទៅដល់រយៈពេលតែជាងកន្លះថ្ងៃ ។ ព្រះរាជអាជ្ញារងដដែលបញ្ជាក់ថា ក្នុងករណីនេះព្រះរាជអាជ្ញាបានសម្រេចប្តឹងឧទ្ធរណ៍រួចរាល់ហើយដែរ» ។
លោក អឿន កុសល្យមុនី ចៅក្រមស៊ើបសួរនៃសាលាដំបូងខេត្តមណ្ឌលគិរីនៅព្រឹកថ្ងៃទី១៦ ខែតុលា បានបញ្ជាក់ខ្លីថា« ការដោះលែងជនសង្ស័យឲ្យនៅក្រៅឃុំនេះ គឺដោយផ្អែកទៅលើការត្រួតពិនិត្យតាមផ្លូវតុលាការ» ។
សូមរំឮកថា គ្រូបង្រៀនជនជាតិដើមភាគតិចម្នាក់ ទប់កំហឹងមិនបានទាញពូថៅវាយគូទំនាស់បែកក្បាលរងរបួសធ្ងន់ដែលហេតុការនេះកើតឡើងនៅថ្ងៃទី១៣ ខែតុលា ឆ្នាំ២០១៨ វេលាម៉ោង០៦និង៣០នាទីល្ងាច នៅចំណុចភូមិពូរង៉ោល ឃុំមេម៉ង ស្រុកកែវសីមា ខេត្តមណ្ឌលគិរី ។
លោក វ៉ាន់ ដានីន អធិការនគរបាលស្រុកកែវសីមាបានឲ្យដឹងថា មានករណីហិង្សាដោយចេតនាមួយដែលបង្កឡើងដោយឈ្មោះ ភេទ សម្បត្តិ ភេទប្រុស អាយុប្រហែល២៥ឆ្នាំ ជនជាតិព្នង មុខរបរគ្រូបង្រៀន ។ ចំណែកឯជនរងគ្រោះមានឈ្មោះ ព្រុំ សុខណេង ភេទប្រុស អាយុ៣០ឆ្នាំ មុខរបរកសិករ រងរបួសត្រូវចំក្បាលក្រោយ ។ ទាំងពីរនាក់មានទីលំនៅស្ថិតក្នុងភូមិពូរង៉ោល ឃុំមេម៉ង់ ស្រុក កែវសីមា ខេត្តមណ្ឌលគិរី ៕
ចែករំលែកព័តមាននេះ