ខេត្តកំពង់ធំ ៖ ករណីប្រទះឃើញសពស្ត្រីម្នាក់អណ្តែតទឹក បានបង្កឲ្យការភ្ញាក់ផ្អើលកាលពីវេលាម៉ោង១០និង២៥នាទីព្រឹកថ្ងៃទី១៥ តុលា ឆ្នាំ២០១៨ នៅចំណុចត្រពាំងញត ស្ថិតក្នុងភូមិប្រគាប ឃុំម្សាក្រង ស្រុកស្ទោង ខេត្តកំពង់ធំ ។
លោកវរសេនីយ៍ឯក យ៉ង សំ អធិការនគរបាលស្រុកស្ទោងប្រាប់ថា ករណីសាកសពអណ្តែតទឹកខាងនេះ គឺខាងសមត្ថកិច្ចយើងបានទទួលព័ត៌មានពីប្រជាពលរដ្ឋដែលទៅនេសាទត្រីនៅចំនុចខាងលើ ពួកគាត់បានឃើញសពអណ្តែតទឹក ក្រោយពីទទួលបានព័ត៌មានភ្លាម កម្លាំងជំនាញរួមនិងកម្លាំងប៉ុស្តិ៍ បានសហការជា
មួយមេឃុំ និងកម្លាំងប្រជាការពារ ចុះទៅពិនិត្យសព ។
ប្រភពដដែលបានបន្តថា សពជនរងគ្រោះ ភេទស្រី អាយុប្រហែល៤៨ឆ្នាំ មិនស្គាល់អត្តសញ្ញាណ មានកម្ពស់១,៥៥ម៉ែត្រ សម្បុរខ្មៅស្រអែម សក់រួញ ។
សពពាក់អាវសាច់ក្រណាត់ដៃវែង មានផ្កាក្រហម និងផ្កាលឿង ស្លៀកខោសាច់ក្រណាត់ជើងវែង ចង្កេះកៅស៊ូ ។
យោងតាមការពិនិត្យលើដងខ្លួន ស្បែកពោះរបកដោយសារត្រូវកំដៅថ្ងៃ ក្រៅពីនោះពុំមានស្លាកស្នាមអ្វីឡើយ បើតាមការបញ្ជាក់ពីប្រជាពលរដ្ឋ និយាយថាជនរងគ្រោះជាមនុស្សវិកលចរឹក ដោយសារតែពួកគាត់ធ្លាប់បានឃើញជនរងគ្រោះមកដេកនៅក្នុងវត្តស្ពឺត្បូង ។
កាលពីថ្ងៃទី១៣ តុលា ឆ្នាំ២០១៨ ប្រជាពលរដ្ឋបានឃើញស្ដ្រីរងគ្រោះដែលមានភិនភាគដូចខាងលើនេះ ដើរឆ្លងទឹកនៅចំណុចអូរចក ស្ថិតក្នុងភូមិប្រគាប មានចម្ងាយប្រហែលជាជាងមួយគីឡូម៉ែត្រពីកន្លែងដែលគេប្រទះឃើញសពអណ្តែតទឹកនេះ ទើបសន្និដ្ឋានថា ជនរងគ្រោះពិតជាស្លាប់ដោយសារលង់ទឹកពិតប្រាកដមែន ៕
ចែករំលែកព័តមាននេះ