ខេត្តព្រៃវែង ៖ បច្ចុប្បន្ននេះ គេឃើញមានក្រុមហ៊ុនធំៗចំនួន៦ ដែលកំពុងធ្វើសកម្មភាពបូមខ្សាច់ទាំងថ្ងៃទាំងយប់នៅក្នុងដងទន្លេមេគង្គ ស្ថិតក្នុងភូមិសាស្ត្រស្រុកពាមជរ និងស្រុកពាមរក៍ នៃខេត្តព្រៃវែង ហើយសកម្មភាពបូមខ្សាច់នេះ តាមដំណឹងថា…
ខេត្តព្រៃវែង ៖ បច្ចុប្បន្ននេះ គេឃើញមានក្រុមហ៊ុនធំៗចំនួន៦ ដែលកំពុងធ្វើសកម្មភាពបូមខ្សាច់ទាំងថ្ងៃទាំងយប់នៅក្នុងដងទន្លេមេគង្គ ស្ថិតក្នុងភូមិសាស្ត្រស្រុកពាមជរ និងស្រុកពាមរក៍ នៃខេត្តព្រៃវែង ហើយសកម្មភាពបូមខ្សាច់នេះ តាមដំណឹងថា ពុំមានច្បាប់អនុញ្ញាតិពីក្រសួងរ៉ែនិងថាមពលនោះទេ ប៉ុន្តែគេអាចធ្វើសកម្មភាពបានយ៉ាងរលូន សង្ស័យមានការត្រូវរ៉ូវគ្នាជាមួយនឹងមន្ត្រីជំនាញរ៉ែ និងថាមពលខេត្តព្រែវែង។
បើតាមការបង្ហើបអោយដឹងពីមេការក្រុមហ៊ុនដែលកំពុងបូមខ្សាច់ទាំងនេះ ទី១*ឈ្មោះ ក្រុមហ៊ុនខ្មែរអភិវឌ្ឍន៍ដែលមានម្ចាស់ឈ្មោះ កៅ សុផល។ ទី២-ឈ្មោះក្រុមហ៊ុន ឡេង ហួរ របស់លោកឧកញ៉ា ឡេង ហួរ។ ទី៣-ឈ្មោះក្រុមហ៊ុន ប៉ោ វ៉ាន់ណាត។ ទី៤-ឈ្មោះ ក្រុមហ៊ុន លី គឹមតុន។ ទី៥-ឈ្មោះ ក្រុមហ៊ុន ម៉ារីថាម និងទី៦-ឈ្មោះ សហគ្រាស គង់ សារឿន។
ប្រភពព័ត៌មានច្បាស់ការណ៍ពីមន្ត្រីនៅខេត្តព្រៃវែងម្នាក់ បានបញ្ជាក់ឱ្យដឹងថា តាមពិតក្រុមហ៊ុនទាំង៦នេះ គេមានអាជ្ញាប័ណ្ណបូមខ្សាច់ពីក្រសួងរ៉ែ និងថាមពលត្រឹមត្រូវ ប៉ុន្តែអាជ្ញាប័ណ្ណនោះ បានផុតកំណត់អស់សុពលភាពតាំងពីថ្ងៃទី២១ ខែសីហា ឆ្នាំ២០១៨មកម្លេះ ហើយបើតាមផ្លូវច្បាប់ បើអាជ្ញាប័ណ្ណផុតកំណត់ ឬអស់សុពលភាពហើយ គឺមិនអាចបន្តធ្វើសកម្មភាពបូមខ្សាច់បានទៀតនោះទេ ត្រូវតែផ្អាកសកម្មភាពសិន រហូតទាល់តែម្ចាស់ក្រុមហ៊ុនដាក់ពាក្យស្នើសុំបន្តអាជ្ញាប័ណ្ណ ។
ហើយមានការចេញលិខិតអនុញ្ញាតិបន្តអាជ្ញាប័ណ្ណពីក្រសួងរ៉ែ និងថាមពលសិន ទើបក្រុមហ៊ុនទាំងនោះអាចបន្តធ្វើសកម្មភាពបូមខ្សាច់ទៀតបាន។ ប៉ុន្តែជាក់ស្តែងក្រុមហ៊ុនទាំងនោះ មិនបានផ្អាកសកម្មភាពបូមខ្សាច់នោះទេ គឺគេនៅតែធ្វើសកម្មភាពបូមខ្សាច់លក់ទាំងថ្ងៃទាំងយប់ និងជារៀងរាល់ថ្ងៃរហូតមកដល់ពេលនេះ។
ចំពោះការចោទប្រកាន់ខាងលើនេះ កោះសន្តិភាពមិនអាចសុំការបំភ្លឺពីលោក ជា កក្តដា ប្រធានមន្ទីររ៉ែ និងថាមពលខេត្តព្រៃវែងបាននោះទេ ដោយសារទូរស័ព្ទរបស់លោកខលចូលហើយគ្មានអ្នកទទួល។
តែទោះជាយ៉ាងណា មន្ត្រីនៅមន្ទីររ៉ែ និងថាមពលម្នាក់ឈ្មោះ ទ្រី បានទទួលស្គាល់ថា ក្រុមហ៊ុនទាំងនោះពិតជាបានផុតអាជ្ញាប័ណ្ណមែន ប៉ុន្តែពេលនេះក្រុមហ៊ុនទាំងនោះកំពុងរត់ការស្នើសុំបន្តអាជ្ញាប័ណ្ណទៅក្រសួងហើយ។
ហើយចំពោះការលើកឡើងថា ក្រុមហ៊ុនទាំងនោះមិនទាន់បានច្បាប់អនុញ្ញាតិបន្តអាជ្ញាប័ណ្ណ ប៉ុន្តែនៅតែបន្តធ្វើសកម្មភាពបូមខ្សាច់ជារៀងរាល់ថ្ងៃនោះ លោកក៏ទទួលស្គាល់ថា ជាការពិតដែរ តែលោកក៏មិនដឹង ធ្វើម៉េចដែរ៕
ចែករំលែកព័តមាននេះ