ទីក្រុងម៉ិកស៊ិក ៖ យោងតាមសេចក្តីថ្លែងការណ៍របស់ក្រសួងការបរទេសម៉ិកស៊ិក បានឲ្យដឹងថា រដ្ឋមន្ត្រីការបរទេស Luis Videgaray របស់ម៉ិកស៊ិកបានប្រាប់ដល់ភាគីខាងប្រទេសចិនតាមទូរស័ព្ទនាថ្ងៃសៅរ៍ថា កិច្ចព្រមព្រៀងពាណិជ្ជកម្មថ្មីជាមួយសហរដ្ឋអាមេរិក និងកាណាដា នឹងមិនរារាំងដល់ទំនាក់ទំនងសេដ្ឋកិច្ចជាមួយប្រទេសដទៃនោះទេ ។
កិច្ចព្រមព្រៀងនេះនឹងជំនួសកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ហើយបានចែងថា ប្រសិនបើដៃគូណាមួយសម្រេចកិច្ចព្រមព្រៀងពាណិជ្ជកម្មសេរីជាមួយប្រទេសដែលមិនមានទីផ្សារសេរី ដូចជាប្រទេសចិន នោះដៃគូដទៃអាចចាកចេញពីកិច្ចព្រមព្រៀងថ្មីក្នុងរយៈពេល៦ខែ និងបង្កើតកិច្ចព្រមព្រៀងទ្វេភាគីវិញ ។
យុទ្ធសាស្ត្រនេះជួយដល់ការខិតខំប្រឹងប្រែងរបស់លោកប្រធានាធិបតីដូណាល់ត្រាំ (Donald Trump) ក្នុងការផ្តាច់ប្រទេសចិនចេញក្នុងផ្នែកសេដ្ឋកិច្ច និងផ្តល់សិទ្ធិជំទាស់ស្វ័យប្រវត្តិដល់សហរដ្ឋអាមេរិកក្នុងការរុញច្រានកិច្ចព្រមព្រៀងរវាងប្រទេសចិន និងកាណាដា ឬម៉ិកស៊ិក ។
លោក Videgaray មិនបានផ្តល់ព័ត៌មានលម្អិតទេ ប៉ុន្តែបាននិយាយថាកិច្ចព្រមព្រៀងរវាងសហរដ្ឋអាមេរិក ម៉ិកស៊ិក និងកាណាដា (USMCA) នេះនឹងមិនរារាំងកិច្ចព្រមព្រៀងទ្វេភាគីជាមួយប្រទេសដែលមិនចូលរួមក្នុងកិច្ចព្រមព្រៀងថ្មីឡើយ ។
យោងតាមសេចក្តីថ្លែងការណ៍មួយដែលបានចេញលើគេហទំព័ររបស់ក្រសួងការបរទេសចិនបានឲ្យដឹងថា លោក Wang Yi រដ្ឋមន្ត្រីការបរទេសបាននិយាយថា ប្រទេសចិននិងម៉ិកស៊ិកគឺជាដៃគូយុទ្ធសាស្ត្រគ្រប់ជ្រុងជ្រោយ និងបានបញ្ជាក់ថា ប្រទេសទាំងពីរបានគាំទ្រ យល់ដឹង និងជឿជាក់លើគ្នាទៅវិញទៅមកលើបញ្ហាធំៗយ៉ាងជាប់លាប់ ។
លោក Wang បានបន្តថា ៖« រាល់កិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីមិនគួរធ្វើឡើងដោយមានគោលដៅប្រឆាំងនឹងភាគីទីបីឡើយ ឬទប់ស្កាត់សិទ្ធិ និងអត្ថប្រយោជន៍របស់សមាជិកដទៃទេ ហើយមិនគួរមានភាពមិនរាប់បញ្ចូលដែរ »៕
ចែករំលែកព័តមាននេះ