ខេត្តកណ្តាល ៖ នគរបាលស្រុកកៀនស្វាយបានចាប់បុរសម្នាក់វាយខ្នោះ នៅថ្ងៃទី១៤ តុលា បន្ទាប់ពីទទួលពាក្យបណ្តឹងពីឪពុកម្តាយក្មេងស្រីដែលចោទថា បុរសរូបនេះចាប់រំលោភក្មួយស្រីរបស់ខ្លួនរហូតបានសម្រេច កាលពីថ្ងៃទី១២ តុលា នៅស្រុកកៀនស្វាយ ។ ក្មេងស្រីរងគ្រោះ ទើបមានអាយុ៦ឆ្នាំ ឯបុរស
ជាប់ចោទឈ្មោះ អួន រឿន អាយុ៣២ឆ្នាំ និងត្រូវបានប្រាប់ថា ជាឪពុកធំរបស់ក្មេងស្រីផងដែរ ។
មន្ត្រីនគរបាលស្រុកកៀនស្វាយឲ្យដឹងថា ក្មេងស្រីខាងលើ បានមកស្នាក់នៅជាមួយជីតា ហើយឪពុកធំរូបនេះ បានមកសុំក្មួយស្រីពីជីតាថា ឱ្យនាងទៅដេកជាមួយពេលយប់ ។ ពេលនោះ ដោយជីតាយល់ព្រម ជននេះ ក៏នាំក្មួយស្រីទៅដេកលើគ្រែរបស់ខ្លួន រួចធ្វើសកម្មភាពរំលោភតែម្តង ។
លុះនៅថ្ងៃទី១៣ ខែតុលា ម្តាយធំឃើញក្មួយស្រីដេកសន្ធឹងសន្ធៃក៏សួរនាំ ទើបនាងប្រាប់ថា ត្រូវឪពុកធំរំលោភ ។ ខណៈឮដូចនេះ ម្តាយធំក៏ពិនិត្យមើលប្រដាប់ភេទក្មួយស្រី ឃើញមានភាពខុសធម្មតា ក៏ទូរស័ព្ទមកប្រាប់ម្តាយនៅឯភ្នំពេញ និងនាំទៅពិនិត្យនៅមន្ទីរពេទ្យបង្អែករាជធានីភ្នំពេញ បន្ទាប់មក ក៏បានមកដាក់ពាក្យបណ្តឹងនៅអធិការដ្ឋាននគរបាលស្រុកកៀនស្វាយ ។
ក្រោយពីទទួលបានពាក្យបណ្តឹង សមត្ថកិច្ចជំនាញសហការជាមួយនគរបាលប៉ុស្តិ៍ក៏បានឃាត់ខ្លួនជនសង្ស័យនៅវេលាម៉ោង៦ល្ងាចថ្ងៃទី១៤ ខែតុលា បញ្ជូនមកអធិការដ្ឋាននគរបាលស្រុក ដើម្បីបន្តចាត់ការតាមនីតិវិធី ។ សូមបញ្ជាក់ថា បុរសជាប់ចោទជាឪពុកធំរូបនេះ ជាបុរសពោះម៉ាយ បន្ទាប់ពីមានការលែងលះជាមួយប្រពន្ធ ព្រោះជាបុរសចោលម្សៀត ៕
ចែករំលែកព័តមាននេះ