តម្លៃប្រេងកាលពីថ្ងៃទី៧ មីនា បានឡើងដល់កំរិតខ្ពស់បំផុតពុំធ្លាប់មានចាប់តាំងពីខែកញ្ញា ឆ្នាំ២០០៨ មកនៅក្រុងញូវយ៉ក ខណៈដែលពួកអ្នកសង្កេតការណ៍ភ័យខ្លាចចំពោះការធ្លាក់ចុះរយៈពេលយូរនៃការនាំចេញប្រេងឆៅរបស់លីប៊ី។
នៅទីផ្សារប្រេងក្រុងញូវយ៉កប្រេងឆៅមួយធុងឡើងថ្លៃ២,២៥ដុល្លារទៀតដល់១០៦,៦៧ដុល្លារ ខណៈដែលកាលពីថ្ងៃទី៤ មីនា ប្រេងឆៅឡើងថ្លៃមួយធុង២,៥១ដុល្លារដល់១០៤,៤២ដុល្លារ។
នៅទីផ្សារប្រេងក្រុងឡុងប្រេងឆៅមួយធុងឡើង១,៨០ដុល្លារទៀតដល់១១៧,៧៧ដុល្លារ។ ដោយសារប្រេងឆៅឡើងខ្ពស់នៅទីផ្សារអន្តរជាតិតម្លៃប្រេងឥន្ធនៈនៅបារាំងក៏ឡើងខ្ពស់ខ្លាំងដែរ។ ប្រេងសាំងធម្មតាហៅប្រេង៩៥ថ្លៃជាង១,៥០អឺរ៉ូក្នុងមួយលីត្រ គឺខ្ពស់ជាងកាលពីខែមិថុនា ឆ្នាំ២០០៨បន្តិចដែលប្រេងឡើងថ្លៃកំពូល(១,៤៩អឺរ៉ូមួយលីត្រ)។ ប្រេងសាំងស៊ុបពែរហៅប្រេង៩៨មួយលីត្រថ្លៃ១,៥៤អឺរ៉ូ ទល់នឹង១,៥២អឺរ៉ូកាលពីសប្តាហ៍មុន និង១,៥៣អឺរ៉ូ កាលពីខែមិថុនា ឆ្នាំ២០០៨ ។ ប្រេងម៉ាស៊ូតមួយលីត្រថ្លៃ១,៣២អឺរ៉ូកាលពីសប្តាហ៍មុន។
មានកត្តា២ញ៉ាំងឱ្យប្រេងឡើងថ្លៃខ្ពស់គឺសេចក្តីត្រូវការប្រេងខ្ពស់លើពិភពលោក ពិសេសនៅអាសីុ និងអស្ថេរភាពក្នុងបណ្តាប្រទេស អារ៉ាប់ ពិសេសបណ្តាទីតាំងប្រេងកាតនៅលីប៊ីកំពុងរងការប៉ះពាល់ដោយការប្រយុទ្ធគ្នា ៕
ចែករំលែកព័តមាននេះ