ខេត្តព្រះសីហនុ ៖ ស្របពេលដែលជនជាតិចិន មានការកើនឡើងឆាប់រហ័សរាប់ម៉ឺននាក់ នៅខេត្តមាត់សមុទ្រខ្មែរ ហើយបន្តិចម្តងៗតំបន់មាត់សមុុទ្រនេះ ពិតជាគោលដៅសម្រាប់ក្រុមពាណិជ្ជករចិនស្នាក់នៅកាន់តែច្រើនឡើងៗ ដែលជារឿយៗតែងបង្កបញ្ហាល្មើសច្បាប់មិនឈប់ឈរនោះ នៅព្រឹកថ្ងៃទី១៥ តុលា គណៈប្រតិភូនគរបាលខេត្តជាំងស៊ូ នៃសាធារណរដ្ឋប្រជាមានិតចិន ដឹកនាំដោយលោក គូ ជៀនគ័រ នាយករងមន្ទីរនគរបាលខេត្ត បានមកបំពេញទស្សនកិច្ចផ្លូវការនៅខេត្តព្រះសីហនុ និងបានជួបប្រជុំពិភាក្សាការងារមួយចំនួន ជាមួយថ្នាក់ដឹកនាំនៃគណៈស្នងការនគរបាលខេត្ត អំពីកិច្ចសហប្រតិបត្តិការចងសម្ព័ន្ធមេត្រីភាពរវាងនគរបាលខេត្តជាំងស៊ូជាមួយនគរបាលខេត្តព្រះសីហនុ ។
កិច្ចពិភាក្សានោះដែរលោក គូ ជៀនគ័រ ក៏បានអញ្ជើញថ្នាក់ដឹកនាំនគរបាលខេត្តព្រះសីហនុ ទៅធ្វេីទស្សនកិច្ចផ្លាស់ប្តូរបទពិសោធន៍នៅខេត្តជាំងស៊ូ និងស្នើសុំឲ្យភាគីកម្ពុជា ពន្លឿនការពិនិត្យកែសម្រួលខ្លឹមសារនៃកិច្ចព្រមព្រៀង សម្រាប់កិច្ចសហប្រតិបត្តិការចងសម្ព័ន្ធភាពជាមួយគ្នាឲ្យបានលឿនផងដែរ ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានសម្តែងនូវការស្វាគមន៍យ៉ាងរីករាយចំពោះសមភាគីចិននិងបានពន្យល់អំពីសំណេីកិច្ចសហប្រតិបត្តិការ ចងសម្ព័ន្ធមេត្រីភាព រវាងស្នងការដ្ឋាននគរបាលខេត្តព្រះសីហនុ ជាមួយស្នងការដ្ឋាននគរបាល ខេត្តជាំងស៊ូ គឺបានរាយការណ៍ជូនទៅថ្នាក់លេីរួចហើយ នៅរង់ចាំតែការសម្រេចដេីម្បីអនុវត្តតែប៉ុណ្ណោះ ។
លោកស្នងការបានបន្តថា នេះជាមោទនភាពមួយរវាងប្រទេសទាំងពីរ ដែលបានផ្តួចផ្តើមកិច្ចពិភាក្សាឡើង ក្នុងគោលបំណងសហប្រតិបត្តិការរួមគ្នាឱ្យកាន់តែមានការរីកចម្រើនលូតលាស់ទៅមុខលើវិស័យការពារសន្តិសុខសង្គម ៕
ចែករំលែកព័តមាននេះ