រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានលើកឡើងប្រហែលជាព្រហ្មលិខិតហើយ ដែលតម្រូវឲ្យសម្តេចធ្វើអ្វីៗដើម្បីសេចក្តីសុខ និងការរីកចម្រើន ដើម្បីប្រទេសជាតិ និងប្រជាជន ។
ការលើកឡើងរបស់សម្តេចតេជោនេះមុនសម្តេចនឹងដឹកនាំគណៈប្រតិភូទៅចូលរួមប្រជុំនៅអាស៊ីអឺរ៉ុបលើកទី១២ នៅយប់ថ្ងៃទី១៦ តុលា នាម៉ោង១២និង២០នាទី ឈានចូលថ្ងៃទី១៧ តុលា ២០១៨ ។ សម្តេចបានសរសេរលើបណ្តាញសង្គមយ៉ាងដូច្នេះថា «នាម៉ោង១២និង២០នាទីយប់ថ្ងៃទី១៦ តុលាឈានចូលថ្ងៃទី១៧ តុលា ខ្ញុំនឹងចាកចេញពីកម្ពុជាឆ្ពោះទៅកាន់ប្រទេសបែលហ្សិក ដែលជាទីកន្លែងត្រូវប្រជុំអាស៊ីអឺរ៉ុបលើកទី១២ ។ បន្ទាប់ពីប្រជុំអាស៊ីអឺរ៉ុប ខ្ញុំនឹងធ្វើទស្សនៈកិច្ចនៅប្រទេសទួគី ចាប់ពីថ្ងៃទី២០ ដល់ថ្ងៃទី២២ តុលា »។ សម្តេចលើកឡើងទៀតថា ក្នុងថ្ងៃទី២២ តុលាដដែលខ្ញុំនឹងត្រូវចេញពីប្រទេសទួគី មកទីក្រុងហ្សឺណែវប្រទេស ស្វីស ដើម្បីចូលរួមសន្និសីទស្តីពីពាណិជ្ជកម្មនិងមានគម្រោងចាកចេញពីប្រទេសស្វីសនៅយប់ថ្ងៃទី២៤ តុលា ដែលនឹងវិលត្រឡប់មកដល់កម្ពុជាវិញនៅថ្ងៃទី២៥ តុលា ដើម្បីដឹកនាំការប្រជុំសេចក្តីពីការព្រាងច្បាប់ថវិកាសម្រាប់ការគ្រប់គ្រង ឆ្នាំ២០១៩ នៅព្រឹកថ្ងៃទី២៦ តុលា ២០១៨ ។ ជាមួយគ្នានោះដែរសម្តេតេជោក៏បានគូសបញ្ជាក់ថា ៖«ក្រឡេកមើលកម្មវិធីការងារ នៅក្រៅប្រទេសលើកនេះពិតជាមមារញឹកស្ទើរតែរកពេលបាយមិនឃើញ ប្រជុំផងជំនួប ទ្វេភាគីផង តែខ្ញុំពេញចិត្តនឹងធ្វើកិច្ចការនេះព្រោះ ជាប្រយោជន៍ជាតិយើង ។
ការងារមួយដែលខ្ញុំមិនអាចបោះបង់ចោលបាន គឺជួបបងប្អូនប្រជាជន និងនិស្សិតខ្មែរដែលកំពុងរស់នៅ និងរៀនសូត្រនៅអឺរ៉ុបដែលបងប្អូនកូនក្មួយកំពុងរង់ចាំខ្ញុំនៅទីនោះ» ។ ដើម្បីប្រយោជន៍ជាតិ និងប្រជាជននោះសម្តេចក៏បានសង្កត់ធ្ងន់ទៀតថា «ការងារយោធាកូនទាហានដើរមុខ មេទាហានដើរក្រោយ ឯការងារនយោបាយវិញ គឺមេដឹកនាំដើរមុខ អ្នកជំនួយការដើរក្រោយវិញ ហើយនេះប៉ះលើរូបខ្ញុំតែម្តង គឺដើរមុខជានិច្ច ។ តើនេះជាព្រហ្មលិខិតដែលតម្រូវឲ្យខ្ញុំធ្វើក្នុងជាតិនេះមែនទេ ? តែបើទោះជាដោយមូលហេតុណាក៏ដោយខ្ញុំត្រូវតែធ្វើដើម្បីសេចក្តីសុខ និងការរីកចម្រើនរបស់ជាតិយើង» ។
សូមជម្រាបថា បើសេចក្តីប្រកាសព័ត៌មានរបស់ក្រសួងការបរទេសសហប្រតិបត្តិការអន្តរជាតិបានឲ្យដឹងថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានឹងដឹកនាំគណៈប្រតិភូជាន់ ខ្ពស់អញ្ជើញទៅចូលរួមកិច្ចប្រជុំកំពូលអាស៊ី-អឺរ៉ុប (ASEM) លើកទី១២ ចាប់ពីថ្ងៃទី១៨-១៩ ខែតុលា ឆ្នាំ២០១៨ខាងមុខនៅទីក្រុងប្រ៊ុចសែល ប្រទេសប៊ែលហ្ស៊ិក តបតាមការអញ្ជើញរបស់លោក Donald Tusk ប្រធានក្រុមប្រឹក្សាអឺរ៉ុប និងលោក Jean Claude Juncker ប្រធានគណៈកម្មការអឺរ៉ុប ។ អញ្ជើញអមដំណើរសម្តេចតេជោមានលោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ លោកស៊ុន ចាន់ថុល ទេសរដ្ឋមន្ត្រីរដ្ឋមន្ត្រីសាធារណៈការ និងដឹកជញ្ជូនព្រមទាំងឥស្សរៈជនជាន់ខ្ពស់នៃរាជរដ្ឋាភិបាល និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជាផងដែរ ។ កិច្ចប្រជុំកំពូលអាស៊ី-អឺរ៉ុបលើកទី១២នឹងប្រព្រឹត្តទៅក្រោមមូលបទ «អឺរ៉ុប និងអាស៊ី ដៃគូសកលសម្រាប់បញ្ហាប្រឈមសកល» មានគោលបំណងពង្រឹងកិច្ចសន្ទនា និងកិច្ចសហប្រតិបត្តិការរវាងតំបន់អាស៊ី និងអឺរ៉ុប ខណៈតំបន់ទាំងពីរជម្រុញកសាងកម្លាំងរួមគ្នា ដើម្បីដោះស្រាយបញ្ហាជាច្រើនចាប់ពីការបង្កើនពាណិជ្ជកម្ម និងវិនិយោគការតភ្ជាប់ការអភិវឌ្ឍប្រកបដោយចីរភាព និងបម្រែបម្រួលអាកាសធាតុជាដើម ។
ក្នុងសម័យប្រជុំពេញអង្គដែលមានមូលបទរង គឺពង្រឹងប្រព័ន្ធពហុនិយមជម្រុញភាពជាដៃគូ អាស៊ី-អឺរ៉ុប អំពីការប្រឈមសកល ហើយសម្តេចតេជោនឹងថ្លែងបទអន្តរាគមន៍ដោយផ្តោតទៅលើប្រធានបទ«របៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព និងកំណើនសេដ្ឋកិច្ចប្រកបដោយចីរភាព និងបរិយាប័ន្ន» ។ អំឡុងពេលស្នាក់នៅបែលហ្ស៊ិកសម្តេចតេជោ នឹងមានជំនួបទ្វេភាគីដាច់ដោយឡែកពីគ្នាជាមួយសមភាគីរបស់សម្តេចតេជោ ដូចជា លោក Dmitry Medvedev នាយករដ្ឋមន្ត្រីនៃសហព័ន្ធរុស្ស៊ី , លោក Viktor Orbán នាយករដ្ឋមន្ត្រីនៃប្រទេសហុងគ្រី , លោកស្រី Erna Solberg នាយករដ្ឋមន្ត្រីនៃប្រទេសន័រវេស , លោក Andrej BabiŠ នាយករដ្ឋមន្ត្រីនៃប្រទេសឆែក និងថ្នាក់ដឹកនាំគណៈប្រតិភូដទៃទៀត ។ បន្ទាប់មកទៀតសម្តេចតេជោក៏នឹងជួបសំណេះសំណាលជាមួយសមាជិកសហគមន៍ខ្មែរ និងសិស្ស និស្សិតខ្មែរដែលកំពុងរស់នៅ និងសិក្សានៅបែលហ្ស៊ិកផងដែរ ៕
ចែករំលែកព័តមាននេះ