រាជធានីភ្នំពេញ ៖ ជុំវិញប្រធានបទ ប្រព័ន្ធអនុគ្រោះពន្ធ « អ្វីគ្រប់យ៉ាងលើកលែងអាវុធ (EBA) »ដល់កម្ពុជា នៅមួយរយៈពេលចុងក្រោយនេះ ហាក់មានការជជែកវែកញែកច្រើននៅតាមបណ្ដាប្រព័ន្ធផ្សព្វផ្សាយទាំងក្នុង…
រាជធានីភ្នំពេញ ៖ ជុំវិញប្រធានបទ ប្រព័ន្ធអនុគ្រោះពន្ធ « អ្វីគ្រប់យ៉ាងលើកលែងអាវុធ (EBA) »ដល់កម្ពុជា នៅមួយរយៈពេលចុងក្រោយនេះ ហាក់មានការជជែកវែកញែកច្រើននៅតាមបណ្ដាប្រព័ន្ធផ្សព្វផ្សាយទាំងក្នុង និងក្រៅស្រុក ។
ស្របពេលជាមួយគ្នានេះ ប្រធានសហជីពជាតិកម្ពុជា បានលើកឡើងថា ពាក់ព័ន្ធនឹងរឿងEBAនេះ មិនគួរនិយាយច្រើនតទៅទៀតទេ ព្រោះបើនៅតែនិយាយទៀត វានឹងធ្វើឲ្យកាន់តែខុស សូមទុកពេលឲ្យអ្នកជំនាញកម្ពុជា និងសហភាពអឺរ៉ុបជជែករកដំណោះស្រាយវិញ ទើបជាការប្រសើរ ។
លោក សោម អូន ប្រធានសហជីពជាតិកម្ពុជា បានឲ្យដឹងកាលពីរសៀលថ្ងៃទី១៥ តុលា ម្សិលមិញថា ៖« យើងមានពេលជាង១ឆ្នាំ ដើម្បីឱ្យរាជរដ្ឋាភិបាលកម្ពុជាជជែកជាមួយEUធ្វើឲ្យស្ថានភាពល្អប្រសើរឡើងវិញពាក់ព័ន្ធនឹងរឿងEBAនេះ ។ យើងមិនគួរនិយាយច្រើនតទៅទៀតនោះទេ គឺទុកវាឲ្យអ្នកជំនាញកម្ពុជា និងសហភាពអឺរ៉ុបជជែកគ្នា រកដំណោះស្រាយ ព្រោះបើនៅតែនិយាយទៀត វានឹងធ្វើឲ្យកាន់តែខុស »។
លោកបន្តថា បើនិយាយពីEBAនៅពេលអនាគត វាគង់តែបាត់ដោយឯកឯងទេ ព្រោះតាមន័យរបស់វា គឺជួយដល់ប្រទេសដែលមានការអភិវឌ្ឍតិចតួចក្នុងការនាំទំនិញទៅកាន់សហភាពអឺរ៉ុបដោយមិនបង់ពន្ធ ហើយនៅពេលប្រទេសណាមួយរួចផុតពីក្រីក្រ ឬលែងជាប្រទេសអភិវឌ្ឍន៍តិចតួចហើយនោះ គេនឹងដកប្រព័ន្ធEBAនេះចេញហើយ ។ ក៏ប៉ុន្ដែ លោកថា ៖« ក្នុងពេលបច្ចុប្បន្ននេះ កម្ពុជានៅត្រូវការវា ដើម្បីឲ្យកំណើនសេដ្ឋកិច្ចរបស់ខ្លួនកាន់តែរីកចម្រើនទៅមុខទៀត ស្របពេលឧស្សាហកម្មធុនមធ្យម និងធំៗ មិនទាន់ចូលមកច្រើននៅឡើយ ដូចនេះ ខណៈកំពុងត្រូវការ គេមិនគួរជជែកច្រើននោះទេ ទុកឲ្យអ្នកបច្ចេកទេសជាអ្នកជជែកវិញប្រសើរជាង »។
លោកសង្កត់ធ្ងន់ថា ខាងអឺរ៉ុបក៏មិនគួរយករឿងនយោបាយមកបូកបញ្ចូលជាមួយសិទ្ធិពាណិជ្ជកម្មនេះដែរ ។ បើនិយាយពីសិទ្ធិកម្មករ នៅកម្ពុជានាពេលបច្ចុប្បន្ននេះ មិនមានអ្វីដែលគួរឲ្យកត់សម្គាល់ឡើយ ។ ជាក់ស្ដែងទំនាស់ការងារបានធ្លាក់ចុះពីមួយខែ២៥ទៅ៣០រឿងមកនៅត្រឹមតែ៤ទៅ៥រឿងបុណ្ណោះ ហើយក្នុងនោះដែរ ក៏មានក្រុមការងារមន្ត្រីរបស់អង្គការពលកម្មពិភពលោក( ILO ) ជាអ្នកតាមដានបានច្បាស់ផងដែរ ។ ដូច្នេះបើសិនជាមានរឿងណាមួយមិនប្រក្រតី ឬមានបញ្ហារំលោភសិទ្ធិកម្មករ នោះមន្ត្រីរបស់អង្គការពលកម្មពិភពលោកគេនឹងរាយការណ៍ តែកន្លងទៅថ្មីៗនេះមិនមានអ្វីនោះទេ ។
លោកបញ្ជាក់ថា អឺរ៉ុបគឺជាទីផ្សារធំ សម្រាប់ការនាំចេញរបស់កម្ពុជា ។ ជាក់ស្ដែងគ្រាន់តែផលិតផលវាយនភ័ណ្ឌរបស់កម្ពុជា ដែលនាំទៅកាន់សហភាពអឺរ៉ុបក្នុងមួយឆ្នាំ មានប្រមាណ៤០%នៃការនាំចេញសរុប ហើយក្រៅនោះក៏មានសហរដ្ឋអាមេរិក ជប៉ុន ចិន និងបណ្ដាប្រទេសអាស៊ីផ្សេងទៀតជាដើម ។
លោកបញ្ជាក់បន្ថែមថា ៖« បើសិនជាកម្ពុជានៅតែទទួលការអនុគ្រោះពន្ធ នោះនឹងសល់ថវិកាសម្រាប់អភិវឌ្ឍន៍ប្រទេស និងជួយដល់កម្មករឲ្យមានជីវភាពកាន់តែប្រសើរ » ។
តំណាងសមាគមរោងចក្រកាត់ដេរសម្លៀកបំពាក់ និងស្បែកជើងកម្ពុជា ហៅកាត់ថា GMACក៏បានបង្ហាញពីការព្រួយបារម្ភដែរ តែព្រួយបារម្ភចំពោះការផ្សាយព័ត៌មានរបស់បណ្ដាញផ្សព្វផ្សាយនានាដោយមិនមានប្រភពច្បាស់លាស់ ដែលអាចធ្វើឲ្យអ្នកបញ្ជាទិញបាត់បង់ទំនុកចិត្ត ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរ និងសម្លៀកបំពាក់កម្ពុជា បានបង្ហោះសារតាមបណ្ដាញសង្គមរបស់ខ្លួនថា ការសម្រេចចិត្តជាផ្លូវការរបស់គណៈកម្មាធិការសហភាពអឺរ៉ុបក្នុងការបើកការស៊ើបអង្កេត និងត្រួតពិនិត្យមកលើប្រទេសកម្ពុជា ពុំទាន់បានធ្វើនៅឡើយទេ គឺគ្រាន់តែត្រៀមរៀបចំដើម្បីធ្វើការសម្រេចចិត្តដែលនឹងអាចកើតឡើងនាចុងឆ្នាំនេះ ឬដើមឆ្នាំក្រោយ ។ លោកបន្ដថា ៖« វាគ្រាន់តែជាការត្រៀមរៀបចំនូវដំណើរការមួយ ដែលមានរយៈពេលយូរគួរសម ហើយខណៈពេលនេះ គ្មាននរណាម្នាក់អាចដឹងច្បាស់អំពីលទ្ធផល ថាតើវានឹងទៅជាយ៉ាងណានោះទេ ហើយថាតើវានឹងនាំទៅដល់ការព្យួរទាំងស្រុង ឬព្យួរផ្នែកខ្លះ ឬក៏គ្មានការព្យួរនោះទេ » ។ លោកបន្ថែមថា ការយល់ឃើញទាំងឡាយអំពីលទ្ធផលនៃដំណើរការនេះ គឺជាការប៉ាន់ស្មានសុទ្ធសាធ ។ ចំពោះមុខនេះ យើងមានការបារម្ភចំពោះការផ្សាយព័ត៌មានបែបប៉ាន់ស្មានដែលនាំទៅដល់ការថយចុះនូវទំនុកចិត្តពីសំណាក់អ្នកបញ្ជាទិញ និងអ្នកវិនិយោគទូទៅ ខណៈដែលស្ថានភាពជាក់ស្តែងអាចមានលក្ខណៈធូរស្រាលជាង ។ លោកថា ៖« យើងមានពេលវេលាជាងមួយឆ្នាំ ហើយឱកាសនៅតែមានសម្រាប់ភាគីទាំងពីរ ដើម្បីបើកកិច្ចសន្ទនាប្រកបដោយអត្ថន័យ និងផ្លែផ្កា និងដោយការគោរពគ្នាទៅវិញទៅមកដែលនឹងឈានដល់ដំណោះស្រាយប្រសើរមួយ ។
លោកបញ្ជាក់ថា ៖« ចំពោះវិស័យកាត់ដេរនិងស្បែកជើង ជាការគិតផ្ទាល់ខ្លួនរបស់ខ្ញុំ នឹងអាចមានភាគរយខ្ពស់ក្នុងការជៀសផុតពីការដកភាពអនុគ្រោះផ្នែកពាណិជ្ជកម្ម ដោយការពិតថាយើងធ្វើបានល្អ ចំពោះការកែលម្អលើកកម្ពស់លក្ខខណ្ឌការងារ និងការគោរពសិទ្ធិកម្មករនិងសហជីព ដោយអនុលោមទៅតាមច្បាប់ជាតិ បទដ្ឋានការងារ និងអនុសញ្ញាស្នូលរបស់អន្តរជាតិ » ។
បើតាមលោក ព្រាប កុល នាយកអង្គការតម្លាភាពកម្ពុជា បានលើកឡើងកន្លងមកថា កម្ពុជាគួរផ្លាស់ប្តូរនូវឥរិយាបថមួយចំនួន ដើម្បីទទួលបានការអនុគ្រោះពន្ធបន្តពីសហភាពអឺរ៉ុប ក្នុងនោះដូចជា ការផ្ដល់សិទ្ធិសេរីភាពដល់បណ្ដាញសារព័ត៌មានឯករាជ្យមួយចំនួន បើកសិទ្ធិនយោបាយដល់អ្នកនយោបាយមួយចំនួន និងមន្ត្រីអង្គការសង្គមស៊ីវិលជាដើម ៕
ចែករំលែកព័តមាននេះ