ខេត្តបន្ទាយមានជ័យ ៖ សពបុរសម្នាក់ ត្រូវបានគេប្រទះឃើញស្លាប់ដេកស្លាប់ក្នុងគុម្ពស្រូវក្បែរផ្លូវជាតិលេខ៥ ចំណុចសាលា អ៊ិន តាំ ស្ថិតក្នុងភូមិទឹកថ្លា ក្រុងសិរីសោភ័ណ ខេត្តបន្ទាយមានជ័យ នៅវេលាម៉ោង១២ថ្ងៃត្រង់ ថ្ងៃទី១៥ ខែតុលា ឆ្នាំ២០១៨នេះ។ លោកឧត្តមសេនីយ៍ត្រី សិទ្ធ ឡោះ ស្នងការរង ទទួលផែននគរបាលព្រហ្មទណ្ឌ បានឲ្យដឹងថា សពជនរងគ្រោះមិនទាន់ត្រូវបានគេស្គាល់អត្តសញ្ញាណនៅឡើយទេ សពមានមានអាយុប្រហែល៣០ឆ្នាំ សប្បុរខ្មៅស្រអែម កម្ពស់១.៦៣ម៉ែត្រ ស្លៀកខោខូវប៊យ អាវផ្កា មានឆ្លាក់សាក់លើដើមទ្រូងទាំងសងខាង។
លោកស្នងការរង បានបញ្ជាក់ថា សពជនរងគ្រោះ ត្រូវបានគេសម្លាប់ រួចយកទៅទម្លាក់ចោលនៅគុម្ពស្រូវ។ តាមការត្រួតពិនិត្យជនរងគ្រោះសង្ស័យជាករណីឃាតកម្មនេះ ដែលបានកើតឡើងនៅយប់ថ្ងៃទី១៤ ខែតុលា ឆ្នាំ២០១៨ លុះវេលាម៉ោង១២ថ្ងៃត្រង់ ថ្ងៃទី១៥ ខែតុលា ឆ្នាំ២០១៨ ត្រូវបានប្រជាពលរដ្ឋប្រទះឃើញ រួចរាយការណ៍មកសមត្ថកិច្ច ។ ចំពោះករណីឃាតកម្មនេះ សមត្ថកិច្ចនៅមិនទាន់ដឹងថា ជាករណីគំនុំ, ករណីប្លន់ ឬជាករណីពាលស៊ីពាលនោះទេ។
នៅពេលនេះ សមត្ថកិច្ចកំពុងដុតដៃ ដុតជើងដើម្បីស្រាវជ្រាវរកមុខឃាតករ។ បើសិនជាឈាមស្រែកស្បែកហៅមែន ជនប្រព្រឹត្តក្នុងករណីនេះ មិនអាចរត់រួចពីសំណាញ់ច្បាប់បាននោះឡើយ។ ជាមួយគ្នានោះដែរ លោកស្នងការរង ក៏បានអំពាវនាវដល់ បងប្អូនបើបានស្គាល់សពជនរងគ្រោះ សូមមេត្តាប្រាប់សាច់ញាតិ បងប្អូនសព មកទទួលយកសព បច្ចុប្បន្នកំពុងតម្កល់ទុកនៅវត្តទឹកថ្លា៕
ចែករំលែកព័តមាននេះ