លោកឌីតថាផន សាសាកស្មីត អ្នកនាំពាក្យក្រុមប្រឹក្សាសន្ដិសុខផ្ទៃក្នុងថៃ និយាយថា បាតុកម្មរបស់ក្រុមអាវក្រហមអាចមានស្ថានភាពធ្ងន់ធ្ងរកើតឡើងបាន ព្រោះក្នុងអំឡុងពេលកន្លងមក មានមេដឹកនាំក្រុមអាវក្រហមប្រកាសថា ឱ្យត្រៀមដបម្នាក់មួយធ្វើដំណើរមកចូលរួមបាតុកម្មដែលក្នុងដបនោះ គឺត្រៀមដាក់សាំងផងដែរ សំរាប់គប់ទប់ទល់នឹងការបង្ក្រាបពីសមត្ថកិច្ច ។ លោកបានចាត់ទុកថា នេះជាចេតនាដែលពួកគេអាចបង្កើតភាពធ្ងន់ធ្ងរក្នុងការធ្វើបាតុកម្មបាន ដូច្នេះសមត្ថកិច្ចនៅគ្រប់អង្គភាពដែលពាក់ព័ន្ធទាំងឡាយត្រូវបង្កើនការប្រុងប្រយ័ត្នឱ្យបានខ្ពស់ ។
ពិតណាស់ ចំនួនបាតុករដែលរំពឹងថា នឹងមានជាង១លាននាក់នោះ តើនឹងមានដបសាំងប៉ុន្មាន ?
តាមកាសែតថៃថ្ងៃទី១១ កុម្ភៈ បាន ផ្សាយថា លោកឌីតថាផន បានគូសបញ្ជាក់ថា “បច្ចុប្បន្នសមត្ថកិច្ចប៉ូលិសបានបង្កើនការប្រុងប្រយ័ត្នខ្ពស់ ដោយមានការដាក់របាំង ធ្វើការត្រួតពិនិត្យស្វែងរកវត្ថុខុសច្បាប់ មានដូចជាគ្រាប់បែក ឬអាវុធផ្សេងៗទៀត ដែលនឹងចូលមកបង្កើតចលាចលឱ្យក្រុមបាតុករ និងប្រជាជនកណ្ដាលក្រុងបាងកក។ យើងមិនចង់ឱ្យកើតមានហេតុការណ៍អាក្រក់ កើតឡើងឡើយ។ ក្នុងរយៈពេលជាច្រើនលើកកន្លងមកមានការធ្វើបាតុកម្មក្នុង សភាពស្ងប់ស្ងាត់ ប៉ុន្ដែយើងមិនអាចប្រហែសឡើយ។ យើងត្រូវប្រយ័ត្នប្រយែងលើមនុស្សដែលចូលមកបង្កើតស្ថានការណ៍ចលាចល ដោយមន្ដ្រីត្រូវមានការប្រុងប្រយ័ត្នខ្ពស់ និងធ្វើការត្រួតពិនិត្យឱ្យបានល្អិតល្អន់”។
នៅពេលមានការសាកសួរលើករណីដែលមានការប្រុងប្រយ័ត្នខ្ពស់នៅតាមតំបន់ក្នុង៣៨ខេត្ដ ដែលជាមូលដ្ឋាននៃការធ្វើសកម្មភាពរបស់ក្រុមអាវក្រហម លោកឌីតថា ផនបានថ្លែងថា អាជ្ញាធរក្នុងខេត្ដនីមួយៗដឹងច្បាស់ថា ខេត្ដរបស់ខ្លួនមានលក្ខណៈស្រួចស្រាល់លើការធ្វើបាតុកម្មធំនៅក្នុងតំបន់បែបណា ដូច្នេះត្រូវមានការត្រៀមថែរក្សាភាពស្ងប់ស្ងៀម និងត្រូវប្រើកំលាំងសមត្ថកិច្ចសម្រាប់ថែរក្សាសន្ដិសុខឱ្យបានគ្រប់គ្រាន់ ។
ប្រភពខាងលើបានបន្ដថា តាមប្រភពព័ត៌មានពីមេដឹកនាំក្រុមអាវក្រហមបានឱ្យដឹងថា បច្ចុប្បន្នក្រុមអាវក្រហមកំពុងត្រៀមខ្លួនជា ស្រេចក្នុងការទាមទារប្រព័ន្ធនយោបាយដ៏សមស្រប និងរំពឹងថា នៅថ្ងៃទី២០ កុម្ភៈ នឹងមានការថ្លែងសន្និសីទ កាសែតស្ដីពីបាតុ កម្មធំជាផ្លូវការ និងជាការធ្វើបាតុកម្មតែមួយលើកដើម្បីផ្ដួលរដ្ឋាភិបាលអាប់ភីស៊ីតឱ្យបាន ទទួលជោគជ័យក្នុងរយៈពេលខ្លី ហើយសង្ឃឹមថាអ្វីៗគ្រប់យ៉ាងនឹងបញ្ចប់នៅដើមខែមីនាខាងមុខ ។ ការប្ដេជ្ញាចិត្ដនេះមិនបានធ្វើឱ្យ រដ្ឋាភិបាលអាប់ភីស៊ីតដេកស្រួលនោះទេ ហើយអ្នកតាមដាននិយាយថា ក្រុមទាហានអាចគាំទ្រតែបើទាហានចេញធ្វើសកម្មភាពធ្ងន់ធ្ងរវិបត្ដិក្នុងសង្គមថៃនឹងក្លាយទៅជាជំលោះកាន់តែធំមិនខាន ៕
ចែករំលែកព័តមាននេះ