ប្រទេសបារាំង ៖ ជារឿងអស្ចារ្យខ្លាំងណាស់ បន្ទាប់ពីកីឡាការិនី កែ ឡេង និងអ៊ុក ស្រីមុំ ចាប់ដៃគ្នាដណ្ដើមបានមេដាយមាសលើវិញ្ញាសាវាយគូកាលពីរសៀលថ្ងៃទី១១ តុលា…
ប្រទេសបារាំង ៖ ជារឿងអស្ចារ្យខ្លាំងណាស់ បន្ទាប់ពីកីឡាការិនី កែ ឡេង និងអ៊ុក ស្រីមុំ
ចាប់ដៃគ្នាដណ្ដើមបានមេដាយមាសលើវិញ្ញាសាវាយគូកាលពីរសៀលថ្ងៃទី១១ តុលា កីឡាការិនី អ៊ុន ស្រីយ៉ា បានបង្កការភ្ញាក់ផ្អើលជាថ្មីទៀតហើយ ។
តាមរយៈការផ្ដួលកីឡាការិនីម្ចាស់ផ្ទះបារាំង Marie-Christine Virebayre ដណ្ដើមបានមេដាយមាសទី២ក្នុងព្រឹត្តិការណ៍ប្រកួតកីឡាប៉េតង់ពានរង្វាន់អន្ដរជាតិ Trophee L’Equipe លើកទី២ នៅប្រទេសបារាំង ដែលទើបបញ្ចប់ការប្រកួត នាវេលាម៉ោងប្រមាណ១០យប់ថ្ងៃទី១២ ខែតុលា(ម៉ោងនៅកម្ពុជា) ។ ចំណែកកីឡាករ សុខ ចាន់មាន ដណ្ដើមបានត្រឹមមេដាយប្រាក់ ក្រោយពីបានចាញ់កីឡាករថៃ នៅវគ្គផ្ដាច់ព្រ័ត្រ។
តាមព័ត៌មានដែលកោះសន្តិភាពទទួលបានឲ្យដឹងថា អ៊ុន ស្រីយ៉ា ឆ្លងកាត់៥ប្រកួតទម្រាំដណ្ដើមបានមេដាយមាស ក្នុងនោះប្រកួតជម្រុះក្នុងពូលB ៣ប្រកួត ឈ្នះ២ និងចាញ់១ ពោលគឺប្រកួតបើកឆាកចាញ់កីឡាការិនីដាណឺម៉ាក១៣-១ បន្ទាប់មកបានស្ដារមុខមាត់វិញតាមរយៈការលត់កីឡាការិនីអ៊ីតាលី១៣-១និងយកឈ្នះកីឡាការិនីទុយនេស៊ី១៣-៦ដើម្បីឡើងទៅវគ្គពាក់កណ្ដាលផ្ដាច់ព្រ័ត្រ និងបានយកឈ្នះកីឡាការិនីថៃ១៣-៧ដើម្បីឡើងទៅវគ្គផ្ដាច់ព្រ័ត្រហើយបានផ្ដួលកីឡាការិនីម្ចាស់ផ្ទះបារាំងដណ្ដើមបានមេដាយមាសតែម្ដង។
ចំណែកកីឡាករ សុខ ចាន់មាន នៅក្នុងពូល Bផ្នែកបុរសឆ្លងកាត់៤ប្រកួតក្នុងនោះយកឈ្នះកីឡាករទុយនីស៊ី Mohamed Khaled Bougriba ឈ្នះកីឡាករបារាំង Philippe Quintais មុននឹងបន្តយកឈ្នះកីឡាករ Dylan Rocherនៃក្រុមម្ចាស់ផ្ទះម្នាក់ទៀតនៅវគ្គពាក់កណ្តាលផ្តាច់ព្រ័ត្រ ។ ប៉ុន្តែជាអកុសល ឈានដល់វគ្គផ្តាច់ព្រ័ត្រសុខ ចាន់មាន បែរជាភ្លាត់ឱ្យចាញ់កីឡាករថៃThanakorn Sangkaewនៅនាទីចុងក្រោយ ធ្វើឲ្យកម្ពុជាខកខានឱកាសដណ្តើមបានមេដាយមាសទី៣ក្នុងព្រឹត្តិការណ៍ Trophee L’Equipe ដែលរៀបចំឡើងដោយសារព័ត៌មានកីឡា L’Equipe ដ៏ល្បីល្បាញរបស់បារាំង។
គួរបញ្ជាក់ថា ព្រឹត្តិការណ៍ Trophee L’Equipe លើកទី២នេះ គឺជាការប្រកួតកីឡាប៉េតង់កម្រិតខ្ពស់មួយដែលអ្នកចូលរួមចាត់ទុកជាព្រឹត្តិការណ៍កម្រិតពិភពលោក ដោយសារកីឡាករ-កីឡាការិនីចូលរួមសុទ្ធតែត្រូវបានជ្រើសរើសពីប្រទេសខ្លាំងៗដែលធ្លាប់មានប្រវត្តិឈ្នះមេដាយមាសពិភពលោក ។
ជាក់ស្ដែងប្រទេសប្រចាំតំបន់អាស៊ី ត្រូវបានម្ចាស់ផ្ទះបារាំងអញ្ជើញចូលរួម គឺមានតែកម្ពុជា និងថៃប៉ុណ្ណោះហើយកម្ពុជាបានបញ្ជូនកីឡាករ-កីឡាការិនីចំនួន៦រូបទៅចូលរួម៕
ចែករំលែកព័តមាននេះ