រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតនៅព្រឹកថ្ងៃទី១៥ ខែតុលា ឆ្នាំ២០១៨ បានអញ្ជើញហែព្រះករុណាព្រះបាទសម្ដេចព្រះបរមនាថនរោត្ដមសីហមុនីព្រះមហាក្សត្រនៃព្រះរាជាណាចក្រកម្ពុជា និងសម្ដេចម៉ែនរោត្ដមមុនីនាថសីហនុក្នុងពិធីថ្វាយព្រះរាជកុសលព្រះវិញ្ញាណក្ខន្ធបរមរតនកោដ្ឋសម្តេចព្រះនរោត្ដមសីហនុគម្រប់ខួប៦ឆ្នាំគត់ នៅព្រះបរមរាជវាំង ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានអញ្ជើញហែព្រះមហាក្សក្រ និងសម្តេចម៉ែស្របពេលដែលប្រជារាស្ត្រទូទាំងប្រទេសព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះព្រះបរមរតនកោដ្ឋដែលព្រះអង្គបានលះបង់ និងបូជាព្រះកាយដ៏ធំធេងបំផុត ចំពោះជាតិមាតុភូមិកម្ពុជា ។
កូនចៅប្រជារាស្ត្រទូទាំងប្រទេស និងមន្ត្រីរាជការ សូមថ្វាយព្រះរាជកុសលព្រះវិញ្ញាណក្ខន្ធព្រះបរមសពព្រះករុណាបាទសម្តេចព្រះនរោត្តមសីហនុ សូមស្តេចយាងបដិសន្ធិក្នុងព្រះបរមសុគតិភពកុំបីឃ្លាងឃ្លាតឡើយ ។
សូមជម្រាបថា ពិធីថ្វាយព្រះរាជកុសលព្រះវិញ្ញាណក្ខន្ធព្រះបរមរតនកោដ្ឋសម្តេចព្រះនរោត្ដម សីហនុគម្រប់ខួប៦ឆ្នាំគត់ ដែលព្រះអង្គបានសោយទិវង្គត នៅទីក្រុងប៉េកាំងប្រទេសចិនកាលពីថ្ងៃទី១៥ ខែតុលា ឆ្នាំ២០១២ ៕
ចែករំលែកព័តមាននេះ