ប្រទេសអារ៉ាប៊ីសាអ៊ូឌីត ៖ ប្រទេសអារ៉ាប៊ីសាអ៊ូឌីតកាលពីថ្ងៃទី១៤ តុលា បានសន្យាតបតវិញចំពោះការដាក់ទណ្ឌកម្មជាយថាហេតុ ក្រោយការគំរាមដាក់ទណ្ឌកម្មធ្ងន់ធ្ងរ ពីសំណាក់ប្រធានាធិបតីអាមេរិក លោកដូណាល់ ត្រាំ ក្នុងករណីដែលក្រុងរីយ៉ាដជាប់ទាក់ទិនក្នុងការបាត់ខ្លួន អ្នកកាសែតប្រឆាំងអារ៉ាប៊ីសាអ៊ូឌីតម្នាក់ លោក JAMAL KHASHOGGI នៅតួកគី។
ការបាត់ខ្លួនអ្នកកាសែតរូបនេះដែលល្បីខ្ទរខ្ទារលើពិភពលោក នឹងអាចនាំឲ្យមានផលប៉ះពាល់ខ្លាំងលើកម្មវិធីកែទម្រង់ពិសេសខាងសេដ្ឋកិច្ច ដែលលើកឡើងដោយព្រះអង្គម្ចាស់រជ្ជទាយាទអារ៉ាប៊ីសាអ៊ូឌីត MOHAMMED BEN SALMANE។កាលពីថ្ងៃទី១៤តុលាតម្លៃភាគហ៊ុននៅទីក្រុងរីយ៉ាដ បានធ្លាក់ចុះជាង៧%មុនពេលបញ្ចប់ត្រឹមដក៣,៥%។
កាលពីថ្ងៃទី១៣តុលា លោកដូណាល់ត្រាំ សម្ព័ន្ធមិត្តធំរបស់អារ៉ាប៊ីសាអ៊ូឌីត ជាលើកដំបូងវាយតម្លៃពីលទ្ធភាពនៃការចូលរួមរបស់ក្រុងរីយ៉ាដ ក្នុងការបាត់ខ្លួនអ្នកកាសែតលោក JAMAL KHASHOGGI ពេលរូបគេចូលកាលពីថ្ងៃទី២ តុលា ក្នុងស្ថានកុងស៊ុលប្រទេសគេប្រចាំក្រុងអ៊ីស្តង់ប៊ុល ហើយចាប់តាំងពីពេលនោះមកស្រាប់តែបាត់ខ្លួនគេឈឹង។ លោកត្រាំបានព្រមានថា បើក្រុងរីយ៉ាត ជាអ្នកទទួលខុសត្រូវលើការបាត់ខ្លួនអ្នកកាសែតរូបនេះ នោះនឹងមានទណ្ឌកម្មធ្ងន់ធ្ងរមួយ។
អារ៉ាប៊ីសាអ៊ូឌីតបដិសេធយ៉ាងម៉ឺងម៉ាត់ការចូលរួមសម្លាប់អ្នកកាសែតរូបនោះជាយថាហេតុ។ លោក JAMAL KHASHOGGI ជាអ្នករិះគន់ខ្លាំងបំផុតចំពោះព្រះអង្គម្ចាស់រជ្ជទាយាទ ហើយជាអ្នករួមសហការជាពិសេសជាមួយកាសែតវ៉ាស៊ិនតោនប៉ុស្តិ៍ រួចរូបគេរស់នៅនិរទេសឯសហរដ្ឋអាមេរិកចាប់តាំងពីឆ្នាំ២០១៧មក។
អ្នកទទួលខុសត្រូវជាន់ខ្ពស់អារ៉ាប៊ីសាអ៊ូឌីតម្នាក់ ដកស្រង់សម្ដីដោយទីភ្នាក់ងារព័ត៌មានជាតិ SPA ថ្លែងថា យើងបដិសេធទាំងស្រុងរាល់ការគំរាមកំហែង ឬការប៉ុនប៉ងធ្វើឲ្យប្រទេសយើងចុះខ្សោយ ទោះជាតាមរយៈការគំរាមកំហែងដាក់ទណ្ឌកម្មខាងសេដ្ឋកិច្ច ឬការប្រើប្រាស់ការគាបសង្កត់ខាងនយោបាយក្ដី។ បើអនុវត្តការដាក់ទណ្ឌកម្មទាំងនេះ នោះយើងនឹងឆ្លើយតបវិញជាមួយបណ្ដាទណ្ឌកម្មធំៗ។ សេដ្ឋកិច្ចរបស់យើងដើរតួនាទីស្លាប់រស់សម្រាប់សេដ្ឋកិច្ចពិភពលោក។
បណ្ដាប្រទេសអឺរ៉ុបដូចជាបារាំង និងអាល្លឺម៉ង់ជាដើម ក៏ទាមទារឲ្យមានការស៊ើបអង្កេតគួរឲ្យជឿជាក់លើការបាត់ខ្លួនអ្នកកាសែតរូបនោះដែរ៕
ចែករំលែកព័តមាននេះ