រាជធានីភ្នំពេញ ៖ យោងតាមរបាយការណ៍គណ:កម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ក្នុងរយៈពេល៩ខែគិតពីខែមករាដល់ខែកញ្ញា ឆ្នាំ២០១៨ កម្ពុជាទទួលរងគ្រោះដោយខ្យល់កន្ត្រាក់និងរន្ទះបាញ់មាន :
ខ្យល់កន្ត្រាក់កើតមានចំនួន១៧៤លើកនៅទូទាំងប្រទេស រងការការខូចខាត រលំផ្ទះ និងខូចខាតធ្ងន់ធ្ងរ៥៧៤ខ្នង របើកដំបូលផ្ទះនិងខូចខាតមធ្យម២៣៥៦ខ្នង របើកដំបូលសាលារៀន២៣អគារ រលំបាក់ផ្ទាំងប៉ាណូ៣កន្លែង រលំបាក់បង្គោលភ្លើង៥កន្លែង រលំបាក់អង់តែនទូរទស្សន៍១កន្លែង លិចទូកនៅសមុទ្រ២គ្រឿង រងគ្រោះស្លាប់៦នាក់របួស៣៨នាក់ ។
រន្ទះបាញ់ : ការទទួលរងគ្រោះដោយសាររន្ទះបាញ់ : ស្លាប់៩៦នាក់ របួស៦៣នាក់ ងាប់គោក្របី១០១ក្បាល ខូចខាតផ្ទះ១២ខ្នង អគារទីចាត់ការសាលា១ខ្នង ។ – អគ្គិភ័យរងគ្រោះធំៗក្នុងរយៈពេល៩ខែមាន : ឆេះតូបលក់ដូរ៩៤៣តូប រោងមហោស្រព២កន្លែង រោងចក្រ៣កន្លែង រោងម៉ាស៊ីនកិនស្រូវ១កន្លែង ឃ្លាំងស្តុកសម្ភារ៦កន្លែង ព្រៃលិចទឹក៤៩ហិកតានិងចំការស្វាយចន្ទី និងអំពៅ៨៦៣ហិកតា ។
របាយការណ៍ដដែលបានបញ្ជាក់ថា : ព្យុះក្នុងតំបន់បានកើតឡើងចំនួន២៥និងមានតែព្យុះមួយចំនួនតូចប៉ុណ្ណោះដែលបង្កឲ្យមានឥទ្ធិពលបន្ទាប់ដលើភូមិសាស្ត្រកម្ពុជានិងមានព្យុះ២មានឥទ្ធិពលដល់អាងទន្លេមេគង្គលើ ។
ប្រព័ន្ធសម្ពាធដែលកើតមានកន្លងមកឲ្យមានភ្លៀងនិងខ្យល់បក់បោកខ្លាំងនៅតាមតំបន់មួយចំនួនតាមឆ្នេរសមុទ្រ តំបន់ពាយ័ព្យ ភាគឥ្ឍសាននិងតាមតំបន់ព្រំដែនកម្ពុជា-វៀតណាម ។ ដោយឡែកជំងឺផ្តាសាយបក្សី A(H1N1) កើតមានចំនួន៤លើក នៅក្នុងខេត្តមណ្ឌលគីរី ខេត្តព្រៃវែង ខេត្តត្បូងឃ្មុំនិងរាជធានីភ្នំពេញ ដែល ក្នុងនោះមានសត្វមាន់និងទាត្រូវបានងាប់និងកម្ទេចចោល ដោយមានកិច្ចសហការទាន់ពេលវេលាពីក្រសួងកសិកម្ម រុក្ខាប្រមាញ់និងនេសាទ ។
ក្រសួងសុខាភិបាលនិងអាជ្ញាធរមូលដ្ឋានមិនឲ្យមានការឆ្លងរាលដាលបន្តនិងបានអនុវត្តនូវវិធានការបសុ
ព្យាបាលនៅតាមមូលដ្ឋានរងគ្រោះរួមមានការបាញ់ថ្នាំសម្លាប់មេរោគតាមកសិដ្ឋាននិងលំនៅដ្ឋាន ការផ្សព្វផ្សាយអប់រំ ការបិទនិងចែកប័ណ្ណផ្សព្វផ្សាយ អំពីការការពារជម្ងឺផ្តាសាយបក្សីផងដែរ ។ រីឯជម្ងឺគ្រុមឈាមគិតត្រឹមថ្ងៃទី១៥ សីហា អត្រាឈឺដោយជម្ងឺគ្រុនឈាមមាន៧១២៣ករណីនិងការទទួលរងគ្រោះស្លាប់មាន១១នាក់ ។
– ការបាក់ច្រាំងទន្លេ ស្ទឹង កើតឡើង៩លើកក្នុងរដូវប្រាំង នៅខេត្តព្រៃវែង ខេត្តកណ្តាល ខេត្តកំពង់ចាម ខេត្តកំពង់ធំ ខេត្តត្បូងឃ្មុំនិងរាជធានីភ្នំពេញ ធ្វើឲ្យមានផ្ទះខូចខាតចំនួន១៣ខ្នង និងរុះរើចេញ២២ខ្នង ។ ក្នុងរដូវវស្សាកើតមានចំនួន៣៦លើក នៅខេត្តកំពង់ចាម ខេត្តត្បូងឃ្មុំ រាជធានីភ្នំពេញ ខេត្តកណ្តាលនិងខេត្តបាត់ដំបង ធ្វើឲ្យមានការរំកិលនិងរុះរើលំនៅដ្ឋានចំនួន២២ខ្នងនិងការបាក់ច្រាំងទន្លេមានប្រវែង១១,១៣៤ម៉ែត្រ និងទទឹង៥ម៉ែត្រទៅ២០ម៉ែត្រ ក្នុងនោះនៅខេត្តកំពង់ចាមមានមណ្ឌលសុខភាព១កន្លែងនិងវត្តអារាមចំនួន២ប្រឈមនឹងការបាក់ច្រាំង ។
របាយការណ៍បានឲ្យដឹងទៀតថា : ទឹកបឹងទន្លេសាបចាប់ផ្តើមហូរចេញនៅដើមខែតុលានេះ មុនពេលធម្មតាប្រមាណមួយខែ បន្ទាប់ពីទន្លេមេគង្គមានការស្រកចុះចាប់ពីពាក់កណ្តាលខែកញ្ញាមក ស្របពេលដែលស្ថាន
ភាពភ្លៀងរដូវវស្សានៅតំបន់ខ្ពង់រាបចាប់ផ្តើមចុះខ្សោយ ។
សម្រាប់តំបន់ទំនាបកណ្តាលទឹកភ្លៀងអាចនឹងអូសបន្លាយដល់ពាក់កណ្តាលខែវិច្ឆិកា ហើយក្នុងនេះអាជ្ញាធរមូលដ្ឋានរួមនិងក្រសួងជំនាញកំពុងពន្លឿនការចែកស្រូវពូជដល់កសិករដើម្បីធ្វើការស្តារឡើងវិញនូវផលដំណាំបន្ទាប់ពីទឹកបានស្រកផុតពីស្រែ ៕
ចែករំលែកព័តមាននេះ