រាជធានីភ្នំពេញ ៖ លោកសម រង្ស៊ី អតីតប្រធានគណបក្សសង្គ្រោះជាតិដែលកំពុងរស់នៅក្រៅប្រទេសក៏ត្រូវបានអញ្ជើញចូលរួមកិច្ចប្រជុំមហាសន្និបាតសហភាពអន្តរសភានៅក្នុងទីក្រុងហ្ស៊ឺណែវប្រទេសស្វីស ។
ការចូលរួមប្រជុំរបស់អតីតមេបក្សប្រឆាំងនេះស្របពេលដែលគណៈប្រតិភូសភាកម្ពុជាដែលដឹកនាំដោយលោកស្រី ឃួន សុដារី អនុប្រធានទី២ រដ្ឋសភាក៏បានចូលរួមប្រជុំ ដើម្បីពិភាក្សា និងអនុម័តលើប្រធានបទមួយចំនួនផងដែរ ។
បើតាមនុស្សជំនិតលោកប្រធាន សម រង្ស៊ី លោកប៊ុត ធារី លើបណ្តាញសង្គមហ្វេសប៊ុកបានឲ្យដឹងថា លោក សម រង្ស៊ី បានចេញដំណីរទៅប្រជុំសហភាពអន្តរសភាពេញអង្គ (IPU) លើកទី១៣៩ ចាប់ពីថ្ងៃនេះទី១៤ តុលាដល់ថ្ងៃទី១៨ តុលានេះ នៅប្រទេសស្វីសទីក្រុងហ្សឺណែវ ។ លោកបន្តថា អ្វីដែលគួរឲ្យភ្ញាក់ផ្អើលជាទីបំផុតនោះ គឺលោកប្រធាន សម រង្ស៊ី មានកិត្តិយសដ៏ខ្ពង់ខ្ពស់ដែលត្រូវបានប្រធាន IPU អញ្ជើញឲ្យលោកឡើងថ្លែងសន្ទរកថា នៅថ្ងៃទី១៨ តុលា២០១៨ នៅចំពោះមុខគណៈប្រតិភូអន្តរជាតិរាប់រយនាក់ ។
ចំណែកលោក ឈាង វុន សមាជិកសភាគណៈបក្សប្រជាជនកម្ពុជា និងជាអ្នកនាំពាក្យគណបក្សប្រជាជនកម្ពុជាបានលើកឡើងថា គណៈប្រតិភូសភាកម្ពុជាបានចូលរួមប្រជុំសន្និបាតសហភាពអន្តរសភា IPU ដោយមោទនភាពខ្ពស់ ពីព្រោះយើងបានទៅទីនោះយកឆន្ទៈប្រជា រាស្ត្រខ្មែរ៨៣,២% ទៅប្រាប់សមាជិកសភាទូទាំងសកលលោកថា ប្រជាពលរដ្ឋខ្មែរបានជ្រើសរើសសន្តិភាព សន្តិសុខ សង្គម និងអភិវឌ្ឍន៍ ។
សូមជម្រាបថា គណៈប្រតិភូសភាកម្ពុជាចូលកិច្ចមហាសន្និបាតសហភាពអន្តរសភា (IPU) ដើម្បីពិភាក្សា និងអនុម័តលើករបៀបវារៈមួយចំនួនដែលកំពុងរស៊ើបនៅលើសកលលោក ។ គណៈប្រតិភូជាន់ខ្ពស់រដ្ឋសភាកម្ពុជាដែលដឹកនាំដោយលោកស្រី ឃួន សុដារី អនុប្រធានទី២រដ្ឋសភា និងជាប្រធានក្រុមសភាជាតិកម្ពុជានៃនយោបាយស្ត្រី នឹងចូលរួមមហាសន្និបាតសហភាពអន្តរសភាលើកទី១៣៩ នៅទីក្រុងហ្ស៊ីណែវប្រទេសស្វីសចាប់ពីថ្ងៃទី១២ ដល់ថ្ងៃទី២០ ខែតុលា ឆ្នាំ២០១៨ ។
គួរឮកថា សហភាពអន្តរសភា (IPU) ជាអង្កការនីតិបញ្ញត្តិធំមួយដែលមានសភាមកពីប្រទេសនានាជុំវិញពិភពលោកចំនួន១៧៣ជាសមាជិក ។ កំឡុងពេលមហាសន្និបាតលើកទី១៣៩នេះ តំណាងសភាកម្ពុជានឹងឡើងថ្លែងសុន្ទរកថាស្តីអំពី «ភាពជាអ្នកដឹកនាំសភាក្នុងការលើកកំពស់សន្តិភាព និងការអភិវឌ្ឍន៍នាយុគ្គសម័យនវានិវត្តន៍ និងបំលាស់ប្តូរបច្ចេកវិទ្យា» ទៅកាន់អង្គមហាសន្និបាត ។ ប្រតិភូសភាកម្ពុជានឹងចូលរួមកិច្ចប្រជុំជាច្រើននៅក្នុងនោះមានកិច្ចប្រជុំក្រុមប្រឹក្សាភិបាលលើកទី២០៣ របស់ IPU ដើម្បី៖ អនុម័តសេចក្តីស្នើរបៀបវារៈបន្ទាន់លើបញ្ហារស៊ើបមួយចំនួនរបស់សកលោក ។ បោះឆ្នោតជ្រើសរើសសមាជិកគណៈកម្មាធិការប្រតិបត្តិរបស់ IPU ។
ការចូលរួមផ្តល់អនុសាសន៍អំពីសិទ្ធិមនុស្សការពិនិត្យរបាយការណ៍ហិរញ្ញវត្ថុ IPU ។ និងការអនុម័តប្រតិទិនការងារសម្រាប់មហាសន្និបាត IPU លើកទី១៤០ នៅទីក្រុង Buenos Aires នៃប្រទេសអាហ្សង់ទីន ។ នៅក្នុងមហាសន្និបាតនេះគណៈប្រតិភូមសភាកម្ពុជាក៏នឹងចូលរួមបណ្តាកិច្ចប្រជុំសំខាន់ៗមួយចំនួនទៀត ដែលមានដូចជា កិច្ចប្រជុំអាស៊ានបូក៣កិច្ចប្រជុំសម្រួបសម្រួលរបស់សភាតំបន់អាស៊ី (APA) កិច្ចប្រជុំភូមិសាស្ត្រតំបន់អាស៊ីប៉ាស៊ីហ្វិក (APG) កិច្ចប្រជុំវេទិការសមាជិកសភាស្ត្រីកិច្ចប្រជុំវេទិការសមាជិកសភាវ័យក្មេង IPU និងកិច្ចប្រជុំគណៈក ម្មាធិការអចិន្ត្រៃយ៍ទាំង៤ របស់ IPU ស្តីពី«សន្តិភាព សន្តិសុខអន្តរជាតិ ការអភិវឌ្ឍន៍ប្រកប ដោយចីរភាព ហិរញ្ញវត្ថុ ពាណិជ្ជកម្ម ប្រជាធិបតេយ្យ សិទ្ធិមនុស្ស និងកិច្ចការអង្គការសហ ប្រជាជាតិផងដែរ ៕
ចែករំលែកព័តមាននេះ