រាជធានីភ្នំពេញ ៖ នៅថ្ងៃទី១៥ តុលា ឆ្នាំ២០១៨នេះ ជាខួប៦ឆ្នាំ នៃការចូលសោយទិវង្គតរបស់សម្តេចព្រះបាទនរោត្តមសីហនុព្រះបរមរតនកោដ្ឋ នៅក្នុងទីក្រុងប៉េកាំងប្រទេសចិន ។
សម្រាប់ខួប៦ឆ្នាំសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបាន រំលឹកគុណ និងថ្វាយព្រះរាជកុសលព្រះ វិញ្ញាណក្ខន្ធអតីតព្រះមហាក្សត្រកម្ពុជាថ្ងៃទី១៥ ខែតុលា ឆ្នាំ២០១៨នេះ គឺជាថ្ងៃគម្រប់ខួប៦ឆ្នាំគត់ ដែលសម្តេចឪ, សម្តេចតា, សម្តេចតាទួត ព្រះបិតាឯករាជ្យជាតិខ្មែរ ព្រះបាទសម្តេចព្រះនរោត្ដម សីហនុ ព្រះអង្គបានសោយទិវង្គតនៅទីក្រុងប៉េកាំងប្រទេសចិន កាលពីថ្ងៃទី១៥ ខែតុលា ឆ្នាំ២០១២ ។
សម្តេចតេជោបានសរសេរលើបណ្តាញសង្គមយ៉ាងដូច្នេះថា «នៅថ្ងៃនេះប្រជារាស្ត្រទូទាំ ងប្រទេសព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះព្រះបរមរតនកោដ្ឋដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា ។ សម្តេចបន្តថា កូនចៅប្រជារាស្ត្រទូទាំងប្រទេស និងមន្ត្រីរាជការសូមថ្វាយព្រះរាជកុសលព្រះវិញ្ញាណក្ខន្ធព្រះបរមសពព្រះករុណាបាទសម្តេចព្រះនរោត្តមសីហនុ សូមស្តេចយាងបដិសន្ធិក្នុងព្រះបរមសុគតិភពកុំបីឃ្លាងឃ្លាតឡើយ ។
នៅព្រឹកថ្ងៃទី១៥ តុលានេះ គេសង្កេតឃើញមន្ត្រីជាន់ខ្ពស់ស្ទើរគ្រប់ក្រសួង ស្ថាប័ន បាននាំគ្នាទៅគោរពព្រះវិញ្ញាណក្ខន្ធនៅរូបសំណាករបស់ព្រះបាទសម្តេចសីហនុ ព្រះបរមរតន កោដ្ឋ នៅខាងកើតវិមានឯករាជ្យយ៉ាងច្រើនកុះករ ៕
ចែករំលែកព័តមាននេះ