រាជធានីភ្នំពេញ ៖ ស្ត្រីមេម៉ាយម្នាក់បានធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វា ប៉ុន្តែមិនទាន់បានលោតផង ក៏ត្រូវអ្នកធ្វើដំណើរនាំគ្នាជួយឃាត់ទាន់ ។ ហេតុការណ៍ប៉ងធ្វើអត្តឃាតនេះ បង្កឱ្យមានការភ្ញាក់ផ្អើលឡើង កាលពីវេលាម៉ោង៤និង៣០នាទីរសៀលថ្ងៃទី១៣ ខែតុលា នៅលើស្ពានជ្រោយចង្វាថ្មី ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា ។
ស្ត្រីដែលប៉ងធ្វើអត្តឃាតនេះ ត្រូវបាននគរបាលឲ្យដឹងថា ឈ្មោះ យឹម អឿន អាយុ៤២ឆ្នាំ មានទីលំនៅក្នុងសង្កាត់អូរឫស្សីទី១ ខណ្ឌ៧មករា ។ តាមអ្នកឃើញហេតុការណ៍ឲ្យដឹងថា នាវេលាម៉ោងជាង៤រសៀលថ្ងៃនោះ គេឃើញស្ត្រីរូបនេះធ្វើដំណើរតាមម៉ូតូឌុបឡើងស្ពានក្នុងទិសដៅពីខាងលិចទៅខាងកើត ។ នៅពេលទៅជិតដល់កណ្តាលស្ពាន ស្រាប់តែចុះពីម៉ូតូរួចតោងបង្កាន់ដៃស្ពានប្រុងលោតចុះទៅក្នុងទន្លេតែម្តង ។
តាមព័ត៌មានឱ្យដឹងទៀតថា ខណៈនោះ មានជនជាតិកូរ៉េរួមទាំងអ្នកធ្វើដំណើរឆ្លងកាត់តាមស្ពានឃើញ ក៏នាំគ្នាឃាត់ទាន់ រួចបញ្ជូនទៅប៉ុស្តិ៍នគរបាលជ្រោយចង្វាដើម្បីសាកសួរ ។ នៅចំពោះមុខមន្ត្រីនគរបាល ស្ត្រីរូបនេះនិយាយទាំងទឹកភ្នែកថា មូលហេតុដែលធ្វើឱ្យគាត់គិតខ្លីដោយសារតែមានជំងឺប្រចាំកាយ ។
គាត់ជាស្ត្រីមេម៉ាយមានកូនចំនួន៣នាក់(ស្រី១ប្រុស២)ហើយរយៈពេលប្រមាណ៤ទៅ៥ខែនេះ គាត់មានជំងឺបេះដូងរីក ទោះបីក្រុមគ្រួសារនិងកូនៗនាំទៅព្យាបាលយ៉ាងណាក៏មិនធូស្រាលឡើយ ។ ដោយសារតែព្យាបាលអស់ប្រាក់នាំលំបាកដល់កូនៗ ទើបគាត់គិតខ្លីហើយហៅម៉ូតូឌុបជិះមកលោតទឹកសម្លាប់ខ្លួនតែម្តង ។ បន្ទាប់ពីនាំទៅសាកសួរ នគរបាលក៏បានធ្វើការអប់រំ និងទាក់ទងហៅកូនៗឱ្យមកទទួលយកត្រឡប់ទៅផ្ទះវិញ ៕
ចែករំលែកព័តមាននេះ