ទីក្រុងប៉េកាំង ៖ ទិន្នន័យពន្ធដារបានបង្ហាញឲ្យដឹងកាលពីថ្ងៃសុក្រថា សកម្មភាពនៃការធ្វើពាណិជ្ជកម្មជាមួយបរទេសរបស់ប្រទេសចិននៅមានលំនឹងល្អកាលពី៣ត្រីមាសកន្លងមកនេះ បើទោះជាមានជម្លោះពាណិជ្ជកម្មជាមួយសហរដ្ឋអាមេរិកមិនទាន់មានដំណោះស្រាយក្ដី ។
ពាណិជ្ជកម្មចិនបានកើនឡើង៩,៩% មកស្មើ៣,២២ទ្រីលានដុល្លារកាលពី៣ត្រីមាសកន្លងមក ព្រោះតែភាពចម្រុះនៃសកម្មភាពពាណិជ្ជកម្មជាមួយនឹងសេដ្ឋកិច្ចថ្មីៗ និងកំណើនពាណិជ្ជ កម្មដោយក្រុមហ៊ុនឯកជនជាដើម ។
រដ្ឋបាលពន្ធដារបានប្រកាសថា ការនាំចេញបានកើនឡើង៦,៥%បើធៀបនឹងឆ្នាំមុន មកស្មើប្រមាណ១,៧១ទ្រីលានដុល្លារ ខណៈដែលការនាំចូលកើនឡើងបាន១៤,១% មកស្មើ១,៥១ទ្រីលានដុល្លារ ។
លោក Li Kuiwen អ្នកនាំពាក្យរបស់រដ្ឋបាលខាងលើបាននិយាយថា កំណើននៃការធ្វើពាណិជ្ជកម្មក្នុងអំឡុងពេល៩ខែកន្លងមកនេះបានផ្តល់ជាមូលដ្ឋានដ៏រឹងមាំសម្រាប់សកម្មភាពពាណិជ្ជកម្មប្រចាំឆ្នាំ ហើយប្រទេសចិនបានចូលទៅកាន់ប្រទេស និងតំបន់កាន់តែច្រើនជាពិសេសប្រទេសដែលទាក់ទិននឹងការផ្តួចផ្តើមគំនិតខ្សែក្រវាត់ និងវិថី ដូចជារុស្ស៊ី និងប៉ូឡូញជាដើម ។
ប្រទេសចិនក៏បានចេញវិធានការធ្វើឲ្យរចនាសម្ព័ន្ធការនាំចេញកាន់តែល្អប្រសើរដែរ ដោយការនាំចេញយានយន្តកើនឡើង១៦,៣% និងម៉ាស៊ីនកើនឡើង១៨,៧% ។
លោក Li បានបន្តថា ផលប៉ះពាល់បង្កពីជម្លោះពាណិជ្ជកម្មរវាងប្រទេសចិននិងសហរដ្ឋអាមេរិកនៅអាចគ្រប់គ្រងបាន ប៉ុន្តែលោកបានព្រមានថា ការលូតលាស់នៃការធ្វើពាណិជ្ជកម្មជុំវិញពិភពលោក នឹងបន្តជួបឧបសគ្គ ព្រោះតែជម្លោះរវាងប្រទេសទាំងពីរ និងកត្តាដទៃទៀតដែលបង្កដោយភាពមិនប្រាកដប្រជាផ្នែកសេដ្ឋកិច្ចទូទាំងពិភពលោក។
ជាមួយគ្នានេះផងដែរ លោក Sang Baichuan សាស្ត្រាចារ្យផ្នែកពាណិជ្ជកម្មអន្តរជាតិមកពីសាកលវិទ្យាល័យUniversity of International Business and Economics នៅប៉េកាំងបានឲ្យដឹងថា ការធ្វើពាណិជ្ជកម្មរបស់ប្រទេសចិននឹងបន្តមានភាពរឹងមាំក្នុងឆ្នាំនេះ ព្រោះរដ្ឋាភិបាលបានបន្ថយពន្ធបន្ថែមលើផលិតផលនាំចូលរួចមកហើយ និងបានបន្ថយពន្ធលើយានយន្ត គ្រឿងបន្លាស់យានយន្ត ឱសថ និងផលិតផលដទៃទៀតផងដែរកាលពីដើមឆ្នាំនេះ ៕
ចែករំលែកព័តមាននេះ