ខេត្តកណ្ដាល ៖ ប្រជាការពារភូមិម្នាក់ចងកធ្វើអត្តឃាតកម្មសម្លាប់ខ្លួនលើដើមស្វាយ ព្រោះតែជម្ងឺប្រចាំកាយ បង្កឱ្យមានការភ្ញាក់ផ្អើលកាលពីវេលាម៉ោង៧យប់ថ្ងៃទី១៤ តុលា ។
ជនរងគ្រោះដែលស្លាប់ឈ្មោះ មិន ហ៊ុច ភេទប្រុស អាយុ៤៨ ឆ្នាំ មុខរបរជាកសិករ និង (ប្រជាការពារភូមិ) មានទីលំនៅភូមិពោធិ៍ធំ ឃុំអរិយក្សត្រ ស្រុកល្វាឯម ខេត្តកណ្តាល ។
ចំពោះវត្ថុតាងបន្សល់ទុកនៅមានខ្សែនីឡុងពណ៌ស ប្រវែង១ម៉ែត្រ៧តឹក ។
ទាក់ទិនករណីខាងលើនេះ តាមការបំភ្លឺពីអ្នកស្រី ស៊ុន ស្រូយ អាយុ៤១ឆ្នាំ ត្រូវជាប្រពន្ធជនរងគ្រោះបានឲ្យសមត្ថកិច្ចដឹងថា ប្តីរបស់គាត់ធ្លាប់មានជំងឺបេះដូងប្រចាំកាយ ដែលបានដើរព្យាបាលច្រើនពេទ្យហើយនៅតែមិនជាសះស្បើយ ហើយក៏ធ្លាប់មានបំណងចង់សម្លាប់ខ្លួនច្រើនដងដែរ ថែមទាំងព្យាយាមលេបថ្នាំ ក្នុងអំឡុង២ទៅ៣ឆ្នាំមុន តែត្រូវបានបងប្អូន និងអ្នកជិតខាងដឹង ជួយឃាត់ទាន់។
ប្រភពដដែលបន្តថា លុះមកដល់ល្ងាចថ្ងៃទី១៤ តុលា នេះ ប្តីរបស់គាត់បានផឹកស្រាថ្នាំ១កែវ នៅផ្ទះលក់ចាប់ហួយក្នុងភូមិ រួចបានដើរចេញវិញ ។ រហូតដល់វេលាម៉ោង៧យប់ ស្រាប់តែមានអ្នកជិតខាងដើររកត្រីនៅទន្លេក្រោយភូមិបានប្រទះឃើញមនុស្សចងក លើដើមស្វាយជាប់មាត់ទន្លេរ ហើយអ្នករកត្រីនោះបានមកប្រាប់អ្នកភូមិថា មានមនុស្សចងកនៅលើដើមស្វាយ ។
ពេលនោះក៏នាំគ្នាទៅមើល ទើបមានការភ្ញាក់ផ្អើឆោឡោ ដឹងថាប្តីរបស់គាត់ចងកសម្លាប់ខ្លួន ។
បន្ទាប់មកសមត្ថកិច្ចបានចុះពិនិត្យ និងបានប្រគល់សពជនរងគ្រោះជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ