រាជធានីភ្នំពេញ ៖ គ្រោះថ្នាក់ដ៏រន្ធត់មួយកើតឡើងបង្កឡើងដោយរថយន្តមួយគ្រឿងបើកបោះពួយល្បឿនលឿនជែងរថយន្តខាងមុខដែលចូលទៅផ្លូវម្ខាងទៀត បានបុកចំពីមុខរថយន្តកូរ៉េ បណ្តាលឲ្យរួញកាប៊ីនកៀបជាប់អ្នកជិះ៣នាក់ និងរងរបួសធ្ងន់៦នាក់ទៀត កាលពីវេលាម៉ោង៨និង៥០នាទីយប់ថ្ងៃទី១៤ ខែតុលា ឆ្នាំ២០១៨ ស្ថិតនៅតាមផ្លូវជាតិលេខ៣ ភូមិព្រៃកី សង្កាត់ភ្លើងឆេះរទេះ ខណ្ឌពោធិសែនជ័យ ។
រថយន្តបង្កពណ៌ស ពាក់ស្លាកលេខ រដ្ឋ៣៦ ២-០៣២៣ បើកបរក្នុងទិសដៅពីត្បូងទៅជើងបើកខាងផ្លូវបញ្ច្រាសទិស បើកបរដោយបុរសម្នាក់ បានរងរបួសធ្ងន់ ។ ចំណែករថយន្តរងគ្រោះម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពង់ស្ពឺ ២A-៤០៦៥ បើកពីជើងទៅត្បូង ជិះគ្នាជិត១០នាក់រងរបួសធ្ងន់ចំនួន៨នាក់ ក្នុងនោះជាប់ក្នុងកាប៊ីន៣នាក់ផងដែរ។
តាមប្រភពព័ត៌មាននៅកន្លែងកើតហេតុបានឲ្យដឹងថា រថយន្តបង្កម៉ាក ពណ៌ស បើកបរតាមបណ្តោយផ្លូវជាតិលេខ៣ ពីត្បូងទៅជើងក្នុងល្បឿនលឿន លុះមកដល់ចំណុចកើតហេតុខាងលើ បានវ៉ាជែងរថយន្តខាងមុខដែលចូលទៅចំណែកផ្លូវម្ខាងទៀត ហើយមិនបានបើកចូលគន្លងខ្លួនឯងវិញបានបើកលើផ្លូវបញ្ច្រាស ទើបជ្រុលទៅបុករថយន្តកូរ៉េចំណុះ១តោនកន្លះ ពណ៌ខៀវ ដែលជារថយន្តដឹកកម្មកររោងចក្រ ។
តែពេលកើតហេតុមិនបានដឹកកម្មកររោងចក្រទេ គឺដឹកកូនក្មួយពីស្រុកកំណើតទៅព្រលានយន្តហោះអន្តរជាតិភ្នំពេញ បើកពីជើងទៅត្បូង ជិះគ្នា៣នាក់ក្នុងកាប៊ីន ស្រី២នាក់និងប្រុសម្នាក់ជាអ្នកបើករថយន្ត នឹងជាច្រើននាក់ទៀតជិះនៅខាងក្រោយរថយន្ដត្រូវរថយន្តបង្កបុកចំពីមុខពេញទំហឹងបណ្តាលឲ្យរួញកាប៊ីនកៀបអ្នកជិះខាងមុខ៣នាក់ក្នុងរថយន្តរងរបួសធ្ងន់ត្រូវបានរថយន្តសង្គ្រោះរបស់អង្គភាព៧១១យកឧបករណ៍មកកាត់រថយន្ត ទើបអាចយកអ្នករបួសចេញបាន ដើម្បីបញ្ជូនទៅព្យាបាលនៅមន្ទីរពេទ្យព្រះកុសុមៈ រួមទាំងអ្នករបួស៥នាក់ទៀតក៏ បញ្ជូនទៅសង្គ្រោះនៅមន្ទីរពេទ្យព្រះកុសុមៈដែរ ។
ចំណែកអ្នកបើករថយន្តបង្កម្នាក់ត្រូវរថយន្តសង្គ្រោះគ្លីនិកឯកជនដឹកយកទៅព្យាបាល តែក្រុមគ្រួសារបញ្ជូនទៅមន្ទីរពេទ្យកាល់ម៉ែត្រ ។
ក្រោយពេលកើតហេតុជំនាញចរាចរណ៍ខណ្ឌពោធិ៍សែនជ័យ បានប្រគល់អោយជំនាញចរាចរណ៍ការិ
យាល័យផ្លូវគោករាជធានីភ្នំពេញធ្វើការវាស់វែងនិងយករថយន្តទាំង២គ្រឿងយកទៅរក្សាទុកដើម្បីរង់ចាំការដោះស្រាយថ្ងៃក្រោយ ៕
ចែករំលែកព័តមាននេះ