ខេត្តស្ទឹងត្រែង ៖ វិស័យដំឡូងមីកម្ពុជា កាន់តែរីកចម្រើន បន្ទាប់ពីមានដៃគូវិនិយោគ និងភាគីពាក់ព័ន្ធ បានចូលមកអភិវឌ្ឍន៍ជាបន្ដបន្ទាប់ ។ នាចុងឆ្នាំ២០១៨នេះ បើតាមការអះអាងពីកសិករនៅខេត្តស្ទឹងត្រែង បានលើកឡើងថា តម្លៃដំឡូងមីលើទីផ្សារបានហក់ឡើងវិញ បន្ទាប់ពីរោងចក្រកែច្នៃដំឡូងមីនៅស្រុកចិត្របុរី ខេត្តក្រចេះបានចាប់ផ្ដើមដំណើរការ ។
លោក សា វ៉ាត់ឌី ជាកសិករមកឃុំកោះសំពាយ ស្រុកសៀមបូក បានលើកឡើងកាលពីថ្ងៃទី១១ តុលា កន្លងមកថា ឆ្នាំនេះតម្លៃទីផ្សារដំឡូងមីចាប់ផ្ដើមហក់ឡើងខ្ពស់ ធ្វើឱ្យកសិករមានសង្ឃឹមគ្រប់គ្នា ពិសេសអ្នកដែលមានចម្ការដំឡូងមីច្រើនហិកតា ។ លោកបន្ដថា ៖« នៅដើមរដូវប្រមូលផលឆ្នាំនេះ ដំឡូងស្រស់ ក្នុង១គីឡូក្រាមចាប់ពី៣៦០ទៅ៤០០រៀលទៅតាមដំឡូងស្អាត ឬជាប់ដីតិចឬច្រើន បើធៀបនឹងឆ្នាំមុនៗបានត្រឹមតែ១៥០ទៅ២០០រៀលប៉ុណ្ណោះ »។
ស្រដៀងគ្នានេះដែរ លោក ផៃ ម៉េត កសិករម្នាក់នៅភូមិរាជានុគោល ក្រុងស្ទឹងត្រែង បានឲ្យដឹងថា ទីផ្សារដំឡូងមីឆ្នាំនេះពិតជាឡើងថ្លៃ បន្ទាប់ពីមានរោងចក្រកែច្នៃដំឡូងមីនៅស្រុកចិត្របុរី ខេត្តក្រចេះបានចាប់ផ្ដើមដំណើរការសង្វាក់ផលិតកម្មរបស់ខ្លួន ។ លោកបន្ដថា ៖« ប្រសិនបើតម្លៃទីផ្សារដំឡូងមីមានស្ថិរភាព ពួកយើងនឹងពង្រីកផ្ទៃដីដាំដុះឡើងវិញ ដោយសារតែបទពិសោធន៍ឆ្នាំកន្លងមក គឺធ្វើឲ្យពួកយើងនៅស្ទាក់ស្ទើរ ។ ទោះយ៉ាងណា បច្ចុប្បន្ននេះ រោងចក្រកែច្នៃនៅស្រុកចិត្របុរី បានប្រមូលទិញក្នុងតម្លៃជិត៤០០រៀលក្នុង១គីឡូក្រាម »។
ប្រធានមណ្ឌលសភាពាណិជ្ជកម្ម ក្រចេះ ស្ទឹងត្រែង រតនៈគិរី លោក កែវ សុទ្ធារិទ្ធ បានលើកឡើងថា លោកចូលរួមត្រេកអរដល់បងប្អូនកសិករដែលផលិតដំឡូង ខណៈតម្លៃលើទីផ្សារ កំពុងប្រសើរឡើង ។
លោកបន្ដថា ៖« រាល់កិច្ចការងារទីផ្សារ យើងតែងតែបានទាក់ទងជាមួយនឹងអ្នកវិនិយោគផ្សេងៗនៅប្រទេសជិតខាង ដើម្បីជួយទិញកសិផលរបស់កសិករខ្មែរ »។ យ៉ាងនេះក្ដី លោកថា ដើម្បីទទួលបានតម្លៃខ្ពស់បន្ថែមទៀតនោះ គ្រប់ផលិតផលរបស់កសិករដែលផលិតបាន មិនថាតែដំឡូងមីទេ គឺត្រូវគិតពីគុណភាពជាចាំបាច់ ។ លោកមានប្រសាសន៍ថា ៖« កសិករត្រូវសិក្សាអំពីបច្ចេកទេសកសិកម្ម និងពិនិត្យមើលផ្ទៃដី ហើយចេះផ្លាស់ប្តូរពូជដំណាំដាំដុះ និងប្រើប្រាស់ជីធម្មជាតិឱ្យបានច្រើន ចៀសវាងជីគីមីនាំឱ្យខូចគុណភាពដីនិងផលិតផល ហើយចំណាយប្រាក់ច្រើនទៀត »៕
គួររំឭកថា កាលពីថ្ងៃទី២៣ សីហា កន្លងមក អង្គការUNDP ប្រចាំកម្ពុជា និងក្រុមហ៊ុនGreen Leader ដែលជាក្រុមហ៊ុនបាននិងកំពុងវិនិយោគរោងចក្រកែច្នៃដំឡូងមីនៅខេត្តក្រចេះ បានចុះកិច្ចព្រមព្រៀងមួយក្នុងការជំរុញលើកកម្ពស់វិស័យដំឡូងមីកម្ពុជា ប្រកបដោយបរិយាប័ន្ន និងមាននិរន្តរភាព ស្របតាមគោលនយោបាយអភិវឌ្ឍន៍វិស័យដំឡូងមីរបស់កម្ពុជា ។
តាមរយៈកិច្ចព្រមព្រៀងមូលនិធិរួមគ្នានេះ គឺជាការចាប់ផ្តើមជាផ្លូវការនៃការបង្កើត និងអនុវត្តគម្រោងជំរុញការអភិវឌ្ឍទីផ្សារដំឡូងមី ប្រកបដោយបរិយប័ន្ន ក្នុងគោលបំណងបង្កើនការនាំចេញផលិតផលដំឡូងមីស្រស់ ទៅកាន់ទីផ្សារសកល ខណៈដែលគុណភាព និងតម្លៃបន្ថែម ត្រូវបានបង្កើតឡើងនៅក្នុងប្រទេសកម្ពុជា ។ លើសពីនេះទៀត គម្រោងនេះក៏មានគោលដៅធានានិរន្តរភាពទីផ្សារដ៏មានស្ថិរភាពមួយសម្រាប់កសិករកម្ពុជាផងដែរ ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានបញ្ជាក់កន្លងមកថា និន្នាការនិងការរំពឹងទុកបានបង្ហាញថា តម្រូវការដំឡូងមីសម្រាប់ទីផ្សារក្នុងតំបន់ និងពិភពលោក នឹងមានកំណើនកាន់តែខ្ពស់ ដែលនេះគឺជាកាលានុវត្តភាពថ្មីសម្រាប់កម្ពុជា ដើម្បីអភិវឌ្ឍន៍សង្វាក់តម្លៃដំឡូងមី តាមរយៈការពង្រឹង និងពង្រីកផលិតកម្ម ការកែច្នៃចំណិតដំឡូងមី និងសមត្ថភាពនាំចេញ សំដៅឆ្លើយតបនឹងតម្រូវការទីផ្សារនាពេលអនាគត ។ លោករដ្ឋមន្ត្រី បន្តថា ដើម្បីចាប់យកនូវកាលានុវត្តភាពនេះ កម្ពុជាចាំបាច់ត្រូវវិនិយោគបន្ថែម និងការឯកភាពជាធ្លុងមួយរវាងរាជរដ្ឋាភិបាល និងភាគីពាក់ព័ន្ធ ដើម្បីដោះស្រាយបញ្ហាប្រឈម និងហានិភ័យនានា ដូចជា ភាពទន់ខ្សោយខ្សែសង្វាក់តម្លៃ កង្វះព័ត៌មានទីផ្សារ ការផ្គត់ផ្គង់មិនទៀតទាត់ និងគុណភាពប្រែប្រួលនៃដំឡូងមី ដែលជាកត្តារាំងស្ទះដល់ការលូតលាស់នៃឧស្សាហកម្មដំឡូងមីនៅកម្ពុជា ។
យោងតាមរបាយការណ៍អគ្គនាយដ្ឋានកសិកម្មបានបង្ហាញថា កាលពីឆ្នាំ២០១៧ កន្លងទៅ ការនាំចេញផលិតផលចំណិតដំឡូងមីស្ងួតទៅកាន់ទីផ្សារបរទេសមានប្រមាណជាង២,៣លានតោន ខណៈដែលការនាំចេញដំឡូងមីស្រស់ មានចំនួនជាង៧៥ម៉ឺនតោន ក្នុងនោះប្រទេសថៃ និងវៀតណាម ត្រូវបានចាត់ទុកថា ជាទីផ្សារធំបំផុតក្នុងការនាំចេញ ខណៈទីផ្សារនាំចេញទៅប្រទេសចិនផ្ទាល់ ហាក់មានតិចតួចនៅ
ឡើយ ។ យោងតាមក្រសួងពាណិជ្ជកម្មបញ្ជាក់ថា កាលពីឆ្នាំ២០១៧ កម្ពុជាបានក្លាយជាប្រទេសស្ថិតនៅលំដាប់លេខរៀងទី៨ ក្នុងចំណោមប្រទេសផលិតដំឡូងមីធំៗទាំង១០ នៅលើពិភពលោក ។ ចាប់តាំងពីឆ្នាំ២០១១មក ផ្ទៃដីដាំដុះដំឡូងមីត្រូវបានពង្រីកពី៤០០ពាន់ហិកតា ដល់៥៧៤ពាន់ហិកតា នៅក្នុងឆ្នាំ២០១៥ ដោយផ្តល់ទិន្នផលសរុបជាង១៣លានតោន ៕
ចែករំលែកព័តមាននេះ