ខេត្តកំពង់ចាម ៖ ពិតជាគួរឲ្យអាណិតអាសូរ និងខ្លោចចិត្តណាស់ដោយមនុស្សចំនួន០៣នាក់មានឪពុក និងកូនប្រុស២នាក់ស្លាប់ក្រោមផ្លែកាំបិតខ្វែវរបស់ជនប្រមឹកម្នាក់ក្នុងជម្លោះផឹកស៊ី ។ ហេតុការណ៏នេះកើតឡើងនៅវេលាម៉ោង៥និង៣០នាទីល្ងាចថ្ងៃទី១៤ ខែតុលា ឆ្នាំ២០១៨ ត្រង់ចំណុចភូមិថ្មកែវ ជុំត្រប់ ស្រុកបាធាយ ។
លោកវរសេនីយ៏ឯក សំ ណាល់ អធិការនគរបាលស្រុកបាធាយប្រាប់ឲ្យដឹងថា អ្នកដែលបានស្លាប់នៅក្នុងហេតុការណ៏នោះមាន ទី១-ឈ្មោះ នី ណុន ភេទប្រុស អាយុ៥៣ឆ្នាំ, ទី២-ឈ្មោះ ណុន ឆវ័ន ភេទប្រុស អាយុ១៩ឆ្នាំ និង៣-ឈ្មោះ ណុន វី ភេទប្រុស អាយុ២២ឆ្នាំ មានទីលំនៅភូមិ-ឃុំកើតហេតុតែម្តង ។ ចំណែកជនដៃដល់កំណាចដែលត្រូវបានចាប់ខ្លួននោះឈ្មោះ ឯម ភៀន ភេទប្រុស អាយុ៤១ឆ្នាំ មានទីលំនៅភូមិ-ឃុំជាមួយគ្នានឹងជនរងគ្រោះដែរ ។
អធិការនគរបាលស្រុកបាធាយប្រាប់បន្តថា មុនហេតុការណ៏កើតឡើងនោះកូនប្រុសបងដែលស្លាប់ឈ្មោះ ណុន វី ផឹកស៊ីនៅផ្ទះរបស់បុរសជនដៃដល់បន្ទាប់ពីស្រា.សចូលខ្លួនមកក៏មានទំ
នាស់កើតឡើងដោយបុរសឈ្មោះ ភៀន យកកាំបិតខ្វែវមកកាប់ត្រូវលើរាងកាយរបស់ឈ្មោះ វី បណ្តាលឲ្យរងរបួសស្រាល ។
បន្ទាប់ពីនោះក៏បានដើរត្រឡប់ទៅផ្ទះវិញដែលស្ថិតនៅក្បែរគ្នាបានហៅឪពុក និងប្អូនប្រុសរបស់ខ្លួនមកដល់ដោយមានពូថៅ និងដំបង ដើម្បីតាមរករឿងអ្នកកាប់វិញតែមិនទាន់នឹងបានធ្វើអីផងនោះក៏ត្រូវបានបុរសនោះបានកាប់ប្រហារមក០៣នាក់ឪពុក និងកូនប្រុស២នាក់បណ្តាលឲ្យស្លាប់នៅនឹងកន្លែងភ្លាមៗចំនួន២នាក់គឺឪពុក និងកូនប្រុសពៅ ។ ចំណែកកូនប្រុសបងអាយុ២២ឆ្នាំបណ្តាលឲ្យរងរបួសធ្ងន់ធ្ងរត្រូវបានបញ្ជូនទៅសង្គ្រោះនៅមន្ទីរពេទ្យក៏បានស្លាប់តាមក្រោយទៀត ។
ក្នុងប្រតិបត្តិការខាងលើនេះដោយមានបញ្ជាពីលោកស្នងការនគរបាលខេត្ត លោកឧត្តមសេនីយ៏ត្រី ហេង វុទ្ធី ស្នងការរងនគរបាលខេត្ត ទទួលផែនព្រហ្មទណ្ឌក៏បានដឹកនាំកម្លាំងមកជាច្រើននាក់ចុះទៅដល់កន្លែងកើតហេតុចាប់ជនល្មើសនោះផងដែរ ។
លោកអធិការនគរបាលស្រុកបាធាយបញ្ជាក់ថា ជនល្មើសដែលបានក្លាយជាឃាតកត្រូវជាប្អូនថ្លៃរបស់បុរសដែលស្លាប់ឈ្មោះ នី ណុន (ប្រពន្ធនឹងប្រពន្ធបងប្អូនបង្កើត) ជំនាញកំពុងតែបំពេញសំណុំរឿងបញ្ជូនមកកាន់ស្នងការដ្ឋាននគរបាលខេត្តដើម្បីចាត់ការបន្តទៅសាលាដំបូងខេត្តចោទប្រកាន់ពីបទមនុស្សឃាតដោយចេតនាដែលអាចប្រឈមនឹងទោសមួយជីវិតផងដែរ ៕
ចែករំលែកព័តមាននេះ