ខេត្តបន្ទាយមានជ័យ ៖ ក្រោយពីមានសេចក្តីរាយការណ៍ថា មានក្មេងទំនើង២ក្រុម បានធ្វើសកម្មភាព
គប់កញ្ចក់រថយន្តពេលយប់នៅចំណុចផ្លូវរថភ្លើង ស្ថិតក្នុងភូមិសាលាដែង ឃុំប្ញស្សីក្រោក ស្រុកមង្គលបុរី លោកឧត្តមសេនីយ៍ទោអាត់ ខែម ស្នងការនគរបាលខេត្ត បានដាក់បទបញ្ជាយ៉ាងម៉ឺងម៉ាត់ដល់កម្លាំងនគរ បាលស្រុកនេះ ធ្វើការស្រាវជ្រាវចាប់ក្រុមក្មេងទំនើងទាំងនោះ មកផ្តន្ទាទោសបានជាបន្តបន្ទាប់ចំនួន៤នាក់ និងបន្តស្រាវជ្រាវស្វែងរកចាប់ខ្លួនបក្សពួកគេផ្សេងទៀត ដោយមិនទុកឲ្យបង្កធ្វើព្យុះធ្វើភ្លៀងតទៅទៀតឡើយ ។
លោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបុរីឲ្យដឹងថា កាលពីវេលាម៉ោងប្រមាណ១០យប់ថ្ងៃទី៤ ខែតុលាកន្លងទៅ មានករណីក្មេងទំនើងចំនួន២ក្រុម បានធ្វើសកម្មភាពយកដុំថ្មគប់ទៅលើរថយន្ត ដែលកំពុងធ្វើដំណើរតាមផ្លូវជាតិលេខ៥ ត្រង់ចំណុចផ្លូវរថភ្លើង ស្ថិតក្នុងភូមិសាលាដែង ឃុំប្ញស្សីក្រោក ស្រុកមង្គលបុរី ។
ក្រោយពីមានសកម្មភាពដ៏ព្រហើននេះ លោកឧត្តមសេនីយ៍ទោស្នងការបានដាក់បទបញ្ជាឲ្យកម្លាំងនគរ បាលស្រុកមង្គលបុរីធ្វើការស្រាវជ្រាវ និងឈានដល់ការបង្ក្រាបក្មេងទំនើងទាំង២ក្រុមចាប់បានចំនួន៤នាក់ ក្នុងចំណោមបក្សពួកគេទាំងអស់១០នាក់ ។ ក្មេងទំនើងដែលចាប់បាន៤នាក់នេះ មាន៣នាក់ស្ថិតនៅក្នុងក្រុមជាមួយគ្នាគឺ ១-ឈ្មោះ ហេង ឈីត ភេទប្រុស អាយុ១៧ឆ្នាំ ២-ឈ្មោះ អឿង សំណាង ភេទប្រុស អាយុ១៧ឆ្នាំ ទាំង២នាក់មានទីលំនៅក្នុងភូមិកោះកែវ ឃុំប្ញស្សីក្រោក ស្រុកមង្គលបុរី និង៣-ឈ្មោះ ដែន ដានិច ភេទប្រុស អាយុ១៨ឆ្នាំ នៅភូមិសាលាដែង ឃុំប្ញស្សីក្រោក ។ ចំណែកម្នាក់ទៀត នៅក្នុងក្រុមផ្សេងឈ្មោះ សំ ប៊ុនលឹក ភេទប្រុសអាយុ១៥ឆ្នាំ នៅភូមិកោះកែវ ឃុំប្ញស្សីក្រោក ។
លោកអធិការបញ្ជាក់ថា តាមចម្លើយរបស់ឈ្មោះ ហេង ឈីត ថា មូលហេតុដែលពួកគេនាំគ្នាគប់រថយន្តកំពុងធ្វើដំណើរនេះ គឺដោយសារតែអ្នកបើកបររថយន្តតាមផ្លូវជាតិលេខ៥ឈ្លើយៗពេក ហើយក្រោយពីពួកគេគប់នៅកន្លែងផ្លូវរថភ្លើង ហើយក៏នាំគ្នាជិះម៉ូតូទៅគប់រថយន្តដែលឈប់ចតនៅមុខផ្ទះមេភូមិសាលាដែងទៀតរួចនាំគ្នាគេចខ្លួន ។
លោកវរសេនីយ៍ឯក ខែម សុភ័ណ នាយការិយាល័យនគរបាលព្រហ្មទណ្ឌកម្រិតស្រាលបានបញ្ជាក់ថា ក្មេងទំនើង៣នាក់ គឺឈ្មោះ ហេង ឈីតឈ្មោះ ដែន ដានិច និងឈ្មោះ សំ ប៊ុនលឹកត្រូវបានបញ្ជូនទៅសាលាដំបូងខេត្ត កាលពីថ្ងៃទី១២ ខែតុលា ។ ដោយឡែក ឈ្មោះ អឿង សំណាង ដែលឃាត់ក្រោយត្រូវបានបញ្ជូនទៅសាលាដំបូងខេត្តនៅថ្ងៃទី១៣ ខែតុលា ។ ចំពោះបក្សពួកផ្សេងទៀតដែលកំពុងគេចខ្លួន សមត្ថកិច្ចបន្តស្រាវជ្រាវចាប់ឃាត់ខ្លួន ដោយមិនទុកឲ្យពួកគេគេធ្វើព្យុះធ្វើភ្លៀងតាមទំនើងចិត្តឡើយ ៕
ចែករំលែកព័តមាននេះ