ខេត្តកោះកុង ៖ ក្រោយពីធ្លាយវីដេអូមួយបង្ហាញពីសកម្មភាពរបស់បុរសម្នាក់បានយកថង់សំរាមជាច្រើនទៅបោះចូលព្រែក តាមចន្លោះប្រហោងបង្កាន់ដៃស្ពានដែកប៉ាក់ខ្លង ក៏ធ្វើឱ្យមហាជនក្នុងបណ្តាញសង្គមមានការខឹងសម្បាបុរសនោះយ៉ាងខ្លាំងដោយនាំគ្នាស៊ែរវីដេអូ និងស្រែករកការអន្តរាគមន៍ពីអាជ្ញាធរជាបន្ទាន់ កាលពីថ្ងៃទី១២ តុលា ។
លុះនៅព្រឹកថ្ងៃទី១៣ តុលា យោងតាមផេករបស់រដ្ឋបាលខេត្តកោះកុង ត្រូវបានបង្ហាញ ដោយរកឃើញបុរសខាងលើនាំមកធ្វើការណែនាំនិងធ្វើកិច្ចសន្យាជាមួយសមត្ថកិច្ចស្ថិតនៅទីតាំងបោះចោលសំរាមនោះ ក្នុងនោះមានអាជ្ញាធរស្រុកមណ្ឌលសីមា កម្លាំងនគរបាលស្រុកសហការជាមួយមន្ទីរបរិស្ថានខេត្តកោះកុងផងដែរ ។
បុរសម្នាក់ដែលបោះសំរាមចោលក្នុងព្រែកកោះយ៉ ខេត្តកោះកុង បានសារភាពកំហុស និងសុំទោសជាសាធារណៈពីកំហុសឆ្គងរបស់ខ្លួនដែលបានបោះសំរាម ពីលើស្ពានចូលក្នុងព្រែកកោះយ៉ កាលពីថ្ងៃទី១២ ខែតុលា ត្រូវបានស្គាល់អត្តសញ្ញាណហើយ គឺមានឈ្មោះ សាយ សារុត ជាអ្នកប្រមូលសំរាមនៅផ្សារប៉ាក់
ខ្លង ស្រុកមណ្ឌលសីមា ។
បុរសរូបនេះបានសារភាពនិងទទួលស្គាល់កំហុស ដែលខ្លួនបានប្រព្រឹត្ត ក្រោយពីបានធ្វើការអប់រំណែនាំធ្វើកិច្ចសន្យានៅអធិការដ្ឋាននគរបាលស្រុកមណ្ឌលសីមា នៅព្រឹកថ្ងៃទី១៣ តុលា នៅចំពោះមុខមន្ត្រីមន្ទីរបរិស្ថានខេត្តកោះកុងនិងអាជ្ញាធរស្រុក ។
បុរសរូបនេះបានបញ្ជាក់ថា កាលដែលខ្លួនបោះសំរាមចោលខ្លះ ដោយសារតែម៉ូតូដឹកសំរាមរបស់ខ្លួនខូច និងមិនអាចអូសសំរាមទៅមុខរួច ហេតុដូច្នេះត្រូវបោះសំរាមចោលខ្លះ ។ លោក សាយ សារុត បានទទួលស្គាល់ថា ខ្លួនបានប្រព្រឹត្តកំហុសនិងទទួលស្គាល់កំហុសនេះ ព្រមទាំងសន្យាថា មិនធ្វើដូច្នេះទៀតឡើយ ។ បុរសម្នាក់ដែលបោះសំរាមចោលក្នុងព្រែកកោះយ៉បានសារភាពកំហុស និងសុំទោសជាសាធារណៈពីកំហុសឆ្គងរបស់ខ្លួនសុំលែងហ៊ានប្រព្រឹត្តអាក្រក់ទៀតហើយ ៕
ចែករំលែកព័តមាននេះ