ប្រទេសនេប៉ាល់ ៖ បណ្ដាអ្នកទទួលខុសត្រូវនេប៉ាល់ បានរាយការណ៍នាថ្ងៃទី១៣ តុលាថា អ្នកឡើងភ្នំយ៉ាងតិច៩នាក់ជាសមាជិកក្រុមអ្នកឡើងភ្នំកូរ៉េខាងត្បូងមួយ បានស្លាប់នៅភ្នំ GURJA នេប៉ាល់ ដោយសារព្យុះព្រិលយ៉ាងសាហាវបំផ្លាញជំរំរបស់ពួកគេ។
លោក SAILESH THAPA អ្នកនាំពាក្យប៉ូលិសនេប៉ាល់និយាយថា សាកសពមនុស្ស៩នាក់ ក្នុងនោះមានជនជាតិកូរ៉េខាងត្បូង៥នាក់ និងមគ្គុទេសក៍ជនជាតិនេប៉ាល់៤នាក់ ត្រូវបានពួកអ្នកជួយសង្គ្រោះរកឃើញ កាលពីថ្ងៃទី១៣ តុលា ក្រោមគំនរបាក់បែកនៃជំរំរបស់ពួកគេ។
លក្ខខណ្ឌឧតុនិយមអាក្រក់ រារាំងដល់សកម្មភាពរុករក។ប៉ូលិសនិយាយទៀតថា ព្យុះព្រិលបានបំផ្លាញជំរំ ដើមឈើរលំបាក់ ហើយតង់ទាំងឡាយរងការបំផ្លាញ។ ឧទ្ធម្ភាគចក្រ១គ្រឿងអាចចុះខាងលើជំរំបន្តិច តែនៅពុំទាន់អាចជម្លៀសសាកសពមនុស្សណាម្នាក់ចេញបាននៅឡើយ។
លោក WANGCHU SHERPA នៃអង្គការ TREKKING CAMP NEPALជាអ្នករៀបចំបេសកកម្មឡើងភ្នំនេះថ្លែងថា ការប្រកាសអាសន្នត្រូវបានធ្វើក្រោយ២៤ម៉ោងនៃការបាត់ដំណឹងពីពួកអ្នកឡើងភ្នំ។
ពួកអ្នកឡើងភ្នំកូរ៉េខាងត្បូងព្រមទាំងមគ្គុទេសក៍ជនជាតិនេប៉ាល់ បាននាំគ្នាឡើងភ្នំចាប់តាំងពូដើមខែតុលាមក ចេញពីជើងភ្នំនេះដែលមានកម្ពស់៧.១៩៣ម៉ែត ហើយរង់ចាំឲ្យមានធាតុអាកាសល្អបន្តិចដើម្បីបន្តដំណើរទៅមុខទៀត។
កម្រមានអ្នកឡើងភ្នំGURJAស្ថិតនៅក្បែរភ្នំDHAULAGIRI ជាភ្នំខ្ពស់ជាងគេទី៧លើពិភពលោកដែលតែងកើតមានការបាក់ដីនិងព្រិលញឹកញាប់ ក្នុងជួរភ្នំ ANAPURNAចម្ងាយ២០០គីឡូម៉ែត្រខាងលិចក្រុងកដ្ឋមណ្ឌូណាស់។ មានអ្នកឡើងភ្នំតែប្រមាណ៣០នាក់ប៉ុណ្ណោះបានឡើងដល់កំពូលភ្នំ GURJA ទល់នឹងជាង៨.០០០នាក់ដែលឡើងដល់កំពូលភ្នំEVEREST។នៅតាមចង្កេះភ្នំនោះមនុស្ស៤នាក់ស្លាប់រួចហើយ ចាប់តាំងពីឆ្នាំ១៩៦៩ជាឆ្នាំដែលអ្នកឡើងភ្នំជប៉ុន១ក្រុមឡើងដល់កំពូលភ្នំនេះមុនគេបង្អស់មក៕
ចែករំលែកព័តមាននេះ