ចាប់ខ្លួនរឿងនេះសោះ… ធ្លាយរឿងផ្សេងខ្ទេចខ្ទីអស់ កំពុងរកមុខស្រាប់ផង (មានវីដេអូ)
- ភ្នំពេញ
រាជធានីភ្នំពេញ ៖ ជនសង្ស័យ២នាក់ក្នុងចំណោមគ្នា៨នាក់ត្រូវកម្លាំងនគរបាលប៉ុស្តិ៍ភ្លើងឆេះរទេះ និងនគរបាលព្រហ្មទណ្ឌខណ្ឌពោធិ៍សែនជ័យធ្វើការចាប់ខ្លួន ខណៈកំពុងលួចកាត់ខ្សែភ្លើងនៅក្នុងភូមិព្រីក(ក)។ បន្ទាប់មកនាំទៅសាកសួរ ស្រាប់តែធ្លាយរឿងដេញកាប់ប្លន់យកម៉ូតូ១គ្រឿងទៀតកាលពីកន្លះខែមុនដែលនគរបាលកំពុងតាមរកមុខស្រាប់ផង។ ការចាប់ខ្លួននោះធ្វើឡើងកាលពីម៉ោង៣រសៀលថ្ងៃទី៩ ខែតុលា ឆ្នាំ២០១៨…
ជនសង្ស័យដែលត្រូវចាប់ខ្លួននោះម្នាក់ឈ្មោះ នុត សុធុន អាយុ១៨ឆ្នាំ មុ ជាងពុម្ពធ្មេញ មានទីលំនៅក្នុងភូមិកប់គង សង្កាត់ចោមចៅ២ ខណ្ឌពោធិ៍សែនជ័យ និងម្នាក់ទៀតឈ្មោះ ឆែម ប៊ុនឈឿន អាយុ១៨ឆ្នាំ មុខរបរជាងដែក មានទីលំនៅក្នុងភូមិព្រៃកី(ក) សង្កាត់ភ្លើងឆេះរទេះ ខណ្ឌពោធិ៍សែនជ័យ ។ រីឯបក្សពួក៦នាក់ទៀតកំពុងរត់គេចខ្លួន ចំណែកជនរងគ្រោះឈ្មោះ បាន បញ្ញា អាយុ១៩ឆ្នាំ មុខរបរកម្មកររោងចក្រ មានទីលំនៅក្នុងភូមិខ្ចៅ សង្កាត់បឹងធំ ខណ្ឌពោធិ៍សែនជ័យ បានបាត់បង់ម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៦ ពណ៌ខ្មៅ ទូរស័ព្ទដៃ១គ្រឿង។
ប្រភពដដែលបន្តទៀតថា កាលពីម៉ោង១២និង៣០នាទីយប់រំលងអធ្រាត្រឈានចូលថ្ងៃទី២៣ កញ្ញា ជនរងគ្រោះមានគ្នា៤នាក់ជិះម៉ូតូ២គ្រឿងចេញពីកោះពេជ្រត្រឡប់ទៅផ្ទះ លុះទៅដល់ត្រង់ចំណុចមុខយានដ្ឋានជួសជុលរថយន្ត ស្ថិតក្នុងភូមិទួលកី សង្កាត់ភ្លើងឆេះរទេះ ក៏ត្រូវក្រុមជនសង្ស័យ៨នាក់ជិះម៉ូតូ៤គ្រឿងតាមពីក្រោយ។ បន្ទាប់មកកៀរឲ្យឈប់ រួចយកមួកសុវត្ថិភាពវាយទៅលើជនរងគ្រោះ និងយកកាំបិតដេញកាប់ និងចាក់ថែមទៀតធ្វើឲ្យជនរងគ្រោះភ័យរត់ធ្លាក់ទឹកប្រឡាយ បន្ទាប់មកជនសង្ស័យបានលើកយកម៉ូតូជិះគេចខ្លួនបាត់ស្រមោល។
ប្រភពខាងលើបន្តថា ក្រោយមកជនរងគ្រោះទៅដាក់ពាក្យប្ដឹងសុំឲ្យនគរបាលជួយអន្តរាគមន៍ ហើយនគរបាលប៉ុស្តិ៍ភ្លើងឆេះរទេះធ្វើការស្រាវជ្រាវជាបន្តបន្ទាប់ដែរ ប៉ុន្តែរកមិនឃើញក្រុមចោរនោះឡើយ។ រហូតមកដល់ម៉ោង៣រសៀល ថ្ងៃទី៩ តុលានេះ ជនសង្ស័យ២នាក់ខាងលើធ្វើសកម្មភាពលួចកាត់ខ្សែភ្លើងនៅក្នុងភូមិព្រៃកី(ក) ក៏ត្រូវប្រជាពលរដ្ឋប្រទះឃើញខលប្រាប់នគរបាលចុះទៅចាប់ខ្លួនបានជាបន្តបន្ទាប់។
ចែករំលែកព័តមាននេះ