រាជធានីភ្នំពេញ ៖ អ្នកនាំពាក្យគណបក្សលោកសុខ ឥសាន បានអះអាងក្រុមប្រឆាំងបានប្រកាន់រើសអើងសិទ្ធិសេរីភាពនយោបាយ និងការបញ្ចេញមតិសម្រាប់ជាតិសាសន៍ខ្លួន ។ លោកសុខ ឥសាន បានបញ្ជាក់ប្រាប់ឲ្យដឹងនៅថ្ងៃទី១៤…
រាជធានីភ្នំពេញ ៖ អ្នកនាំពាក្យគណបក្សលោកសុខ ឥសាន បានអះអាងក្រុមប្រឆាំងបានប្រកាន់រើសអើងសិទ្ធិសេរីភាពនយោបាយ និងការបញ្ចេញមតិសម្រាប់ជាតិសាសន៍ខ្លួន ។
លោកសុខ ឥសាន បានបញ្ជាក់ប្រាប់ឲ្យដឹងនៅថ្ងៃទី១៤ តុលានេះយ៉ាងដូច្នេះថា កន្លងទៅពួកអគតិមួយចំនួនបាននិយាយវាយប្រហារមកលើកម្ពុជាថា មានការរឹតត្បិតខាងសិទ្ធិសេរីភាពខាងនយោបាយ និងការបញ្ចេញមតិ ។ ប៉ុន្តែបើគេសង្កេតមើលលើសភាពការណ៍ជាក់ស្តែង នៅក្នុងប្រទេសសហរដ្ឋអាមេរិកថ្មីៗនេះ គេនឹងឃើញថា នៅប្រទេសមហាអំណាចមួយនេះពោរពេញទៅដោយការរើសអើង ខាងសិទ្ធិសេរីភាព ខាងនយោបាយ និងការបញ្ចេញមតិ ។
លោកគូសបញ្ជាក់ថា«នៅក្នុងចំណោមជនជាតិខ្មែរដែលបានមករស់នៅក្នុងសហរដ្ឋអាមេរិករាប់សិបឆ្នាំហើយក៏មានការរើសអើងនយោបាយ និងការបញ្ចេញមតិតួយ៉ាងជាក់ស្តែងនោះពួកក្រុមជនជាតិខ្មែរដែលប្រឆាំងនឹងរាជារដ្ឋាភិបាលកម្ពុជាបែរទៅរើសអើងជាមួយនឹងបងប្អូនខ្មែរដែលគាំទ្ររាជរដ្ឋាភិបាលកម្ពុជា ដោយនាំគ្នាជេរប្រមាថអ្នកគាំទ្ររាជរដ្ឋាភិបាល ហើយសុទ្ធតែគំរាមកំហែងថា នឹងថតរូបកត់ឈ្មោះទុកឲ្យរបបក្រុងវ៉ាស៊ីងតោនចាប់បញ្ជូនត្រឡប់ទៅប្រទេសកម្ពុជាវិញ ។ លោកបន្តថា តើនេះ ឬជាចរិតជនរស់នៅប្រទេសដែលហៅថាប្រទេសស៊ីវីឡៃនោះ ? នេះ គឺជាការរើសអើងខាងនយោបាយ និងរំលោភសិទ្ធិខាងកងការបញ្ចេញមតិ ។
លោកសុខ ឥសានបានសង្កត់ធ្ងន់ថា«គ្រាន់តែប្រកាន់និន្នាការនយោបាយខុសគ្នាជេរប្រមាថគេ មើលងាយគេ ប្រមាថគេគំរាមកំហែងគេ ។ តើចរិតបែបនេះជាអ្នកប្រជាធិបតេយ្យប្ញ ? តាមពិតបើមានចរិតបែបនេះ គឺជាជនបាតផ្សារដែលជាពាក្យសាមញ្ញដែលខ្មែរតែងតែនិយមប្រើ» ។ ទោះបីមានការលើករបស់អ្នកនាំពាក្យបក្សកាន់អំណាចដូច្នេះក្តីលោក យ៉ែម បុញ្ញាឬទ្ធិអតីតអ្នកនាំពាក្យគណបក្សសង្គ្រោះជាតិបានលើកឡើងថា កម្លាំងជាតិមួយនឹងធ្លាក់ឱនថយយ៉ាងឆាប់រហ័សនូវពេលជួបប្រទះវិបត្តិសេដ្ឋកិច្ចអតិផរណាខ្ពស់សង្គមវឹកវរដែលប្រទេសនីមួយខិតខំដោះស្រាយចៀសវាងឱ្យខាងតែបានដើម្បីជាផលប្រយោជន៍ដល់ប្រជាជាតិ និងមាតុភូមិ ។
លោកបន្តថា កម្លាំងជាតិមួយដែលចេញពីរាស្ត្រចេញពីចិត្តដោយគ្មានការបង្ខិតបង្ខំណាមួយក្នុងការចូលរួមប្រកបដោយការទទួលខុសត្រូវ ចាប់ផ្ដើមពីការការលុបបំបាត់វប្បធម៌លាបពណ៌ មួលបង្កាច់ ជេរប្រមាថ ដែលនាំឱ្យមានការបែកបាក់ដល់សង្គមជាតិយើង ។ លោកក៏បានលើកឡើងថា កម្លាំងជាតិមួយដែលចេញពីការផ្សះផ្សាជាតិ អហិង្សាខ្មែរតែមួយ មិនគុំគួនសងសឹក មិនយកខ្មែរណាជាសត្រូវ នឹងនាំឱ្យមានស្ថិរភាព មានឱកាសរៀបចំសង្គមជាតិប្រទេសជាតិអាចរីកចម្រើន និងអភិវឌ្ឍន៍ពិតប្រាកដ ហើយនឹងនាំមកនូវសង្គមយុត្តិធម៌ សង្គមប្រជាធិបតេយ្យ សិទ្ធិសេរីភាព…។
សូមជម្រាបថា តាមការសង្កេតក្រុមប្រឆាំងបានប្រកាន់និន្នាការនយោយាយយ៉ាងខ្លាំង ទោះបីបក្សប្រឆាំងថា ប្រកាសមិនយកខ្មែរណាជាសត្រូវក៏ដោយ ៕
ចែករំលែកព័តមាននេះ