ខេត្តកំពង់ធំ ៖ មានករណីរន្ទះបាញ់បណ្តាលឱ្យសត្វគោចំនួន៨ក្បាលបានងាប់ ចំណែកម្ចាស់បានរងរបួស ដែលហេតុការណ៍នេះបង្កឲ្យមានការភ្ញាក់ផ្អើលមួយកើតឡើងកាលពីវេលាម៉ោង៥ល្ងាចថ្ងៃទី១៣ ខែតុលា ឆ្នាំ២០១៨ ស្ថិតនៅភូមិព្រៃខ្លា ឃុំប្រឡាយ ស្រុកស្ទោង ខេត្តកំពង់ធំ ។
លោកវរសេនីយ៍ឯក យ៉ង សំ អធិការនគរបាលស្រុកស្ទោង បានឲ្យដឹងនៅព្រឹកថ្ងៃទី១៤ ខែតុលា នេះថា ករណីរន្ទះបាញ់ខាងលើនេះ បានបណ្តាលឱ្យសត្វគោចំនួន៨ក្បាលងាប់ ក្នុងនោះមានគោញីចំនួន៤ក្បាល់ និងគោឈ្មោលចំនួន៤ក្បាល ចំណែកម្ចាស់គោដែលរស់នៅក្នុងភូមិកើតហេតុបានរងរបួស ។
លោកអធិការបន្តថា បើយោងតាមការឲ្យដឹងពីជនរងគ្រោះជាម្ចាស់គោឈ្មោះ ឆន ខែម ភេទប្រុស អាយុ៤១ឆ្នាំ ដែលរងរបួសស្រាលបាននិយាយថា កាលពីព្រឹក នៅមុនពេលកើតហេតុ គាត់បានយកគោទាំងអស់ខាងលើទៅឃ្វាលឲ្យស៊ីស្មៅនៅឯវាលជារៀងរាល់ថ្ងៃដូចសព្វមួយដង រហូតដល់ពេលល្ងាចទើបដឹកគោត្រឡប់មកផ្ទះវិញ ។
គាប់ជួននៅមុនពេលកើតហេតុ ខណៈផ្ទៃមេឃកំពុងតែបង្អោរភ្លៀងមកនោះ គាត់ក៏ប្រញាប់ដឹកគោទាំងនោះមកផ្ទះ ស្រាប់តែមានរន្ទះបាញ់ចំហ្វូងគោរបស់គាត់បណ្តាលឲ្យងាប់ទាំងអស់ ចំណែកគាត់បានរងរបួសស្រាល ។
ក្រោយពេលកើតហេតុ ជនរងគ្រោះជាម្ចាស់គោត្រូវបានសាច់ញាតិដឹកយកទៅសង្គ្រោះ ចំណែកគោដែលងាប់នោះត្រូវបានបងប្អូនកូនក្មួយនាំគ្នាដឹកយកទៅលក់ទាំងមូល និងមួយចំនួនទៀតវះយកសាច់លក់ ដើម្បីកុំឲ្យស្អុយទាន់ ព្រោះជាពេលល្ងាច ។
នៅក្នុងករណីខាងលើនេះ លោកអធិការក៏បានសូមសំណូមពរដល់បងប្អូនប្រជាពលរដ្ឋ ត្រូវមានការប្រុងប្រយ័ត្នឲ្យបានខ្ពស់ ៕
ចែករំលែកព័តមាននេះ