រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដឹកនាំគណៈប្រតិភូជាន់ខ្ពស់អន្តរក្រសួងនៃរាជរដ្ឋាភិបាលកម្ពុជាត្រឡប់មកដល់ប្រទេសកម្ពុជាវិញដោយសុវត្ថិភាព បន្ទាប់ពីបានអញ្ជើញចូលរួមសន្និសីទស្តីពីពាណិជ្ជកម្មសត្វព្រៃខុសច្បាប់លើកទី៤ រយៈពេលពីរថ្ងៃគឺថ្ងៃទី១១-១២ ខែតុលា ឆ្នាំ២០១៨ នាទីក្រុងឡុងដ៍នៅចក្រភពអង់គ្លេស ។
សូមរំលឹកថា សម្តេចក្រឡាហោម ស ខេង បានដឹកនាំគណៈប្រតិភូជាន់ខ្ពស់អន្តរក្រសួងនៃរាជរដ្ឋាភិបាលកម្ពុជាចូលរួមសន្និសីទលើកទី៤ ស្ដីពីពាណិជ្ជកម្មសត្វព្រៃខុសច្បាប់នេះតបតាមការអញ្ជើញរបស់រាជរដ្ឋាភិបាលចក្រភពអង់គ្លេស ។ សន្និសីទនេះមានការចូលរួមពីប្រមុខរដ្ឋប្រមុខរដ្ឋាភិបាលវិស័យឯកជន និងអង្គការអន្តរជាតិមកពីបណ្ដាតំបន់នានាលើសកលលោក ។ សន្និសីទស្ដីពីការជួញដូរសត្វព្រៃខុសច្បាប់ត្រូវបានប្រារព្ធធ្វើឡើងលើកដំបូងក្រោមគំនិតផ្ដួចផ្ដើមរបស់អង្គម្ចាស់ Charles នៃចក្រអង់គ្លេស កាលពីឆ្នាំ២០១៣ នៅទីក្រុងឡុងដ៍ក្នុងគោលបំណងកៀរគរការចូលរួមថែរក្សា និងអភិរក្សធនធានធម្មជាតិព្រមទាំងពង្រឹងការអនុវត្តន៍ច្បាប់សំដៅការពារ និងទប់ស្កាត់ការធ្វើពាណិជ្ជកម្មខុសច្បាប់នូវសត្វព្រៃកម្រ និងផលិតផលសត្វព្រៃដូចជា ភ្លុកដំរី ស្នែង រមាស ជាដើម ។
ប្រធានបទសំខាន់មួយក្នុងប្រធានបទសំខាន់ដែលនឹងត្រូវលើកយកមកពិភាក្សានៅក្នុងសន្និសីទលើកទី៤ គឺពាក់ព័ន្ធទៅនឹងឥទ្ធិពលវិសាលភាពនៃបទល្មើសជួញដូរសត្វព្រៃខុសច្បាប់ដោយថវិកាដែលបានមកពីកាជួញដូរខុសច្បាប់ក៏បាននាំទៅដល់ការប្រព្រឹត្តបទល្មើសធ្ងន់ធ្ងរមានអង្គការចាត់តាំងដទៃទៀតដូចជា ការសម្អាតប្រាក់អំពើភេវរកម្ម ការជួញដូរមនុស្ស ការជួញដូរអាវុធខុសច្បាប់ ។
ក្នុងន័យនេះសន្និសីទលើកទី៤ស្ដីពីការជួញដូរសត្វព្រៃខុសច្បាប់មិនត្រឹមតែជាវេទិកាគាំពារ ដល់និរន្តភាពបរិស្ថាន និងធនធានធម្មជាតិប៉ុណ្ណោះទេប៉ុន្តែ គឺជាឱកាសក្នុងការបង្កើតសម្ព័ន្ធភាពជិតស្និទ ដើម្បីរួមគ្នាការពាររឹងមាំនូវសន្តិសុខនៅក្នុងប្រទេសតំបន់ និងសកលលោក ដែលសន្តិសុខ និងសន្តិភាព គឺជាមូលដ្ឋានគ្រឹះដ៏ចាំបាច់បម្រើដល់ការអភិវឌ្ឍន៍សង្គមប្រកបដោយចីរភាព ៕
ចែករំលែកព័តមាននេះ