កាលព្រះបរមសាស្តាធរមាននៅឡើយ មានភិក្ខុអ្នកប្រព្រឹត្តបិណ្ឌបាតមួយអង្គចូលទៅធ្វើកម្មដ្ឋានក្នុងឧទ្យានចាស់មួយកន្លែងដើម្បីធ្វើសមណធម៌ ។ លំដាប់នោះមានស្ត្រីម្នាក់រូបស្រស់សង្ហា ស្អាតឆើតឆាយបានណាត់ពេលនឹងបុរសជាគូស្នេហ៍ឲ្យទៅជួបគ្នានៅក្នុងសួននោះដើម្បីនឹងបានសប្បាយក្នុងមេត្រីភាពដោយនាងទៅចាំមុន ។
ចំណែកបុរសជាគូស្នេហ៍នោះបែរជាមិនបានទៅជួបក្នុងពេលដែលណាត់គ្នា ។ កាលបើនាងរង់ចាំមើលផ្លូវគូកំណាន់យូរពេក កាមរោគក៏ដុតរោលរាលក្នុងសាព៌ាង្គកាយ កើតសេចក្តីអផ្សុកជាអស្ចារ្យ ព្រោះមិនបានគូគាប់មកប្រឡែងលេង ក៏ដើរច្រាសច្រាលៗដូចមាន់រកពង ទើបចូលទៅក្នុងឧទ្យានឃើញព្រះថេរៈកំពុងពែនភ្នែនធ្វើសមណធម៌ ក៏ក្រឡេកមើលនាយអាយក្រែងគេឃើញលុះមិនមានអ្នកដទៃនៅក្បែរក៏គិតថា ភិក្ខុនេះក៏បុរសដែរ អញនឹងប្រឡោមលោកឲ្យភាន់ភាំងដោយសារកាមទេពម្តងមើល។
គិតហើយក៏ទៅឈរចំពីមុខព្រះថេរៈដោយអាក្រាតកាយបញ្ចេញស្ត្រីភាពឲ្យឃើញច្បាស់នឹងភ្នែក ធ្វើអាការៈញ៉េះញ៉ោះជាសញ្ញាបែបមិនស្រួល រួចទើបស្លៀកពាក់វិញ នឹងរំសាយសក់ផ្អៀងផ្អងធ្វើកទន់ចុះទន់ឡើងហុចថ្ពាល់ឲ្យលោក រួចក៏ញញឹមប្រិមប្រិយតែម្នាក់ឯង ដើម្បីឲ្យព្រះថេរមានតម្រេកតាមបំណងរបស់ខ្លួនជាស្ត្រីដែលកំពុងស្រវឹងដោយកាមរាគៈ ។
តែជាការឥតប្រយោជន៍សោះ ព្រះថេរៈរឹងរឹតតែកើតសង្វេគមានចិត្តនឿយណាយក្នុងកាមគុណទាំង៥មានរូបជាដើមជាពន់ពេក ទើបលោកគិតថាហេតុនេះដូចម្តេចហ្ន ? កាលព្រះសាស្តាប្រមើលមើលភិក្ខុដែលរៀនកម្មដ្ឋាននៅក្នុងឧទ្យានដើម្បីធ្វើសមណធម៌នោះ តើប្រព្រឹត្តទៅយ៉ាងណា? ក៏បានជ្រាបថា ស្ត្រីនោះកំពុងតែប្រព្រឹត្តអនាចារចែចង់ភិក្ខុនោះផង និងសេចក្តីសង្វេគដែលកើតឡើងដល់លោកផង ទើបពោលថា ម្នាលភិក្ខុទីនោះមិនមែនជាកន្លែងត្រេកត្រអាលសមោសររបស់អ្នកស្វែងរកកាមទាំងឡាយទេ គឺជាទីសម្រាប់ជនដែលមានរោគៈទៅប្រោសហើយរីករាយទេតើទើបត្រាស់សំដែងថាៈ
ព្រៃណាដែលជនមិនរីករាយ ព្រះខីណាស្រពទាំងឡាយជាអ្នកអស់រាគៈមិនមែនជាអ្នកស្វែងរកកាមតែងរីករាយក្នុងព្រៃនោះ ។
លុះចប់ធម៌ទេសនា ភិក្ខុនោះក៏បានសម្រេចព្រះអរហត្ត ព្រមដោយបដិសម្ភិទា ទើបហោះមកថ្វាយបង្គំបាទាព្រះតថាគត ។ ឯស្រីស្រស់នោះអស់សង្ឃឹមនឹងបានរួមរ័កស្នេហាក៏វិលត្រឡប់ទៅផ្ទះវិញទាំងក្រៀមក្រំ ។
ចែករំលែកព័តមាននេះ