ខេត្តកំពង់ធំ ៖ បុរសម្នាក់បានចោទបុរសម្នាក់ទៀតថាលួចលើកលបយកត្រី ហើយបានទាញច្រវាវាយសំពងទៅលើជនរងគ្រោះ បណ្តាលឱ្យបែកក្បាលរងរបួសធ្ងន់ ។ ហេតុការណ៍នេះបានកើតឡើងកាលពីវេលាម៉ោង៣និង៤០នាទីទៀបភ្លឺថ្ងៃទី១៣ ខែតុលា ឆ្នាំ២០១៨ នៅចំណុចចុងអូរព្រែកជីក…
ខេត្តកំពង់ធំ ៖ បុរសម្នាក់បានចោទបុរសម្នាក់ទៀតថាលួចលើកលបយកត្រី ហើយបានទាញច្រវាវាយសំពងទៅលើជនរងគ្រោះ បណ្តាលឱ្យបែកក្បាលរងរបួសធ្ងន់ ។ ហេតុការណ៍នេះបានកើតឡើងកាលពីវេលាម៉ោង៣និង៤០នាទីទៀបភ្លឺថ្ងៃទី១៣ ខែតុលា ឆ្នាំ២០១៨ នៅចំណុចចុងអូរព្រែកជីក ស្ថិតក្នុងភូមិកំពង់ប្រដំ ឃុំម្សាក្រង ស្រុកស្ទោង ខេត្តកំពង់ធំ។
លោកវរសេនីយ៍ឯក យ៉ង សំ អធិការនគរបាលស្រុកស្ទោង បានឲ្យដឹងថា ជនរងគ្រោះឈ្មោះ ណេន វ៉ាន់នី ភេទប្រុស អាយុ២១ឆ្នាំ មុខរបររកស៊ីនេសាទត្រី មានទីលំនៅភូមិ ម្សាក្រងជើង ឃុំម្សាក្រង ស្រុកស្ទោង បានរងរបួសចំកណ្តាលក្បាលរយះប្រវែង៨សង្ទីម៉ែត្រ ។
ចំណែកជនសង្ស័យឈ្មោះ ខុត ខា ភេទប្រុស អាយុ៣៤ឆ្នាំ មុខរបរនេសាទត្រី មានទីលំនៅភូមិស្ដៅ ឃុំអន្លុងសំណ ស្រុកជីក្រែង ខេត្តសៀមរាប បច្ចុប្បន្នស្នាក់នៅចំណុចកើតហេតុខាងលើដើម្បីប្រកបរបរនេសាទត្រី ត្រូវបានកម្លាំងសមត្ថកិច្ចរបស់លោកធ្វើការឃាត់ខ្លួនក្រោយពីបានប្រើអំពើហិង្សាលើជនរងគ្រោះ ។
បើយោងតាមពាក្យបណ្តឹងពីជនរងគ្រោះបានឱ្យដឹងថា នៅមុនពេលកើតហេតុ បុរសជាជនរងគ្រោះបានបើកកាណូតតែម្នាក់ឯងទៅលើកលបនៅចំណុចចុងអូរព្រែកជីក បានត្រីប្រហែល២០គីឡូក្រាម ហើយក៏បើកកាណូតតាមព្រែកបន្តរទៅលើកលបមួយកន្លែងផ្សេងទៀត ។
លុះបើកកាណូតមកដល់ចំណុចកើតហេតុខាងលើ ម៉ាស៊ីនកាណូតក៏រលត់ ហើយជនរងគ្រោះក៏បានទៅអង្គុយយកច្រវាអុំនៅក្បាលកាណូត ពេលនោះជនសង្ស័យក៏បានបើកកាណូតទៅដល់ ហើយចោទបុរសជាជនរងគ្រោះថាបានលួចលើកលបចាក់យកត្រីរបស់ខ្លួន រួចក៏បានជជែកគ្នាយ៉ាងតឹងសរសៃកដាក់គ្នា ។
ដោយជនរងគ្រោះបានប្រាប់ថា «ខ្ញុំមិនបានលួចលើកលបយកត្រីរបស់ពូនោះទេ» ទោះបីជនរងគ្រោះប្រកែកថាមិនបានលួចយ៉ាងណា ក៏ជនសង្ស័យនៅតែមិនជឿ ស្រាប់តែជនសង្ស័យបានទាញច្រវាវាយសំពងទៅលើជនរងគ្រោះ បណ្តាលអោយបែកក្បាលរងរបួសធ្ងន់តែម្តង ។
ក្រោយពេលកើតហេតុ ជនរងគ្រោះត្រូវបានសាច់ញាតិដឹកយកទៅសង្គ្រោះ និងដេររបួសជាច្រើនថ្នេរ ។ លុះភ្លឺឡើង ជនរងគ្រោះត្រូវបានសាច់ញាតិដាក់ពាក្យបណ្តឹងឲ្យសមត្ថកិច្ចឃាត់ខ្លួនជនសង្ស័យបាន ដើម្បីឲ្យជួយរកយុត្តិធម៌តាមច្បាប់ ៕
ចែករំលែកព័តមាននេះ