ខេត្តកំពត ៖ នៅព្រឹកថ្ងៃទី១៣ ខែតុលា ឆ្នាំ២០១៨ ឯកឧត្តម ជាវ តាយ អភិបាលនៃគណៈអភិបាលខេត្តកំពតបានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ស្ពានឈើស្ទឹងកែវ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលស្ថិតនៅក្នុងភូមិអន្លង់ម៉ាក់ប្រាង្គ ឃុំស្ទឹងកែវ ស្រុកទឹកឈូ ខេត្តកំពត ។
នៅក្នុងឱកាសនោះផងដែរមានការអញ្ជើញចូលរួមពីថ្នាក់ដឹកនាំខេត្តមន្ទីរអង្គភាពជំនាញនានាជុំវិញខេត្តមន្ត្រីរាជការសាលាខេត្តស្រុកឃុំ បងប្អូនប្រជាពលរដ្ឋរស់នៅមូលដ្ឋានភូមិឃុំខាងលើ សរុបប្រមាណ១៥០០នាក់ ។ ស្ថិតក្នុងបរិយាកាសដ៏វិសេសវិសាលនេះឯកឧត្តម ជាវ តាយ អភិបាលនៃគណៈអភិបាលខេត្តកំពតបានពាំនាំមកនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជាព្រមទាំងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាជូនចំពោះបងប្អូនប្រជាពលរដ្ឋទាំងអស់ក្នុងស្រុកទឹកឈូជានិច្ចជាកាល សម្តេចទាំងទ្វេតែងតែគិតគូ និងយកចិត្តទុកដាក់ខ្ពស់បំផុតនូវសុខទុក្ខរបស់បងប្អូនគ្រប់កាលៈទេសៈ ។
សមិទ្ធិផលជាច្រើនដែលរាជរដ្ឋាភិបាលសម្រេចបានក្នុងរយៈពេលកន្លងមកនេះពិតជាមិនអាចកាត់ផ្តាច់ចេញពីកត្តាសុខសន្តិភាពបានឡើយព្រោះប្រសិនបើប្រទេសជាតិមានសង្គ្រាមយើងមិនអាចដឹកនាំកសាង និងអភិវឌ្ឍន៍ប្រទេសរីកចម្រើនដូចបច្ចុប្បន្ននេះបានឡើយ ។ ពិសេសក៏មិនអាចរៀបចំធ្វើពិធីសម្ពោធស្ពាននេះបានដែរ ។ សន្តិភាពដែលយើងកំពុងមាននាពេលបច្ចុប្បន្ននេះ គឺបានមកពីការលះបង់អាយុជីវិតរបស់អ្នកស្នេហាជាតិ ពិសេសសម្តេចតេជោ ហ៊ុន សែន គឺជាស្ថាបនិកសន្តិភាព ដូច្នេះសូមបងប្អូនទាំងអស់គ្នាត្រូវចូលរួមការពារសន្តិភាពមួយនេះទោះក្នុងតម្លៃណាក៏ដោយ ។
សូមបញ្ជាក់ផងដែរថា ស្ពានឈើស្ទឹងកែវសម្ពោធដាក់ឲ្យប្រើប្រាស់នាពេលនេះ គឺបានសាងសង់រួចរាល់ជាស្ថាពរ កាលពេលថ្មីៗកន្លងមកនេះ គឺមានប្រវែង៨០ម៉ែត្រគុណ៣ម៉ែត្រ គឺជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីបានសម្រេចផ្តល់ថវិកាតាមរយៈឯកឧត្តម ជាវ តាយ អភិបាលនៃគណៈអភិបាលខេត្តកំពតនៅទឹកប្រាក់ចំនួន៦៥លានរៀលសម្រាប់ដំណើរការសាងសង់ គឺចាប់ផ្តើមពីថ្ងៃទី៣ ខែសីហា ឆ្នាំ២០១៨ ដល់ថ្ងៃទី២៩ ខែកញ្ញា ឆ្នាំ២០១៨ នេះបានរួចរាល់ជាស្ថាពរ ហើយបើកសម្ពោធដាក់ឲ្យប្រើប្រាស់ជាផ្លូវការនាពេលនេះ ៕
ចែករំលែកព័តមាននេះ