ខេត្តស្វាយរៀង ៖ ទីបំផុតលោកព្រះរាជអាជ្ញាអមសាលាដំបូងខេត្តស្វាយរៀងបានធ្វើការចោទប្រកាន់ជនសង្ស័យប្រុសស្រី៤នាក់ពីបទឃាតកម្មដោយចេតនា និងរួមគំនិតក្នុងករណីឃាតកម្មទៅលើអ្នករត់តាក់ឈ្មោះ គុជ សំអៀត នោះហើយនៅថ្ងៃទី១៣ ខែតុលា ឆ្នាំ២០១៨ នេះ ហើយបានបញ្ជូនសំណុំរឿងទៅលោកចៅក្រមស៊ើបសួរចាត់ការបន្ត និងចេញដីកាឃុំខ្លួនបណ្តោះអាសន្ននៅវេលាម៉ោង៥និង០០នាទីល្ងាចថ្ងៃទី១៣ ខែតុលា នេះនៅពន្ធនាគារខេត្តដើម្បីដំណើរការនីតិវិធីបន្ត ។
បើតាមមន្ត្រីតុលាការបានបង្ហើបឲ្យដឹងថា ជនសង្ស័យដែលត្រូវចោទនោះទី១-ឈ្មោះ ជួន សុជាតិ ភេទប្រុស អាយុ៣៣ឆ្នាំ មានទីលំនៅភូមិគម្ពោតលៀប សង្កាត់ព្រៃអង្គុញ ក្រុងបាវិត ពីបទឃាតកម្មដោយចេតនាដែលមានស្ថានទម្ងន់ទោស, ទី២-ជនសង្ស័យឈ្មោះ ស៊ិទ្ធិ រាជ្យ ភេទប្រុសអាយុ២០ឆ្នាំ នៅភូមិគម្ពោតលៀប សង្កាត់ព្រៃអង្គុញ ក្រុងបាវិត ពីបទឃាតកម្មដោយចេតនាដែលមានស្ថានទម្ងន់ទោស, ទី៣-ជនសង្ស័យឈ្មោះ ប្រាក់ សារ៉ា ភេទស្រី អាយុ៥១ឆ្នាំនិងទី៤-ឈ្មោះ ចាន់ ធូ ភេទស្រី អាយុ៣៥ឆ្នាំ នៅភូមិគម្ពោតលៀប សង្កាត់ព្រៃអង្គុញ ក្រុងបាវិត ទាំងពីរនាក់ជាប់ចោទពីបទផ្សំគំនិតក្នុងករណីឃាតកម្មលើអ្នករត់តាក់ស៊ីឈ្មោះ គុជ សំអៀត ។
បើតាមមន្ត្រីនគបាលការិយាល័យព្រហ្មទណ្ឌកម្រិតធ្ងន់ស្នងការដ្ឋាននគបាលខេត្តបានឲ្យដឹងថា ក្រោយពីបើកការស៊ើបអង្កេតសមត្ថកិច្ចបានឃាត់ខ្លួនមនុស្សប្រុសស្រី៨នាក់មកសាកសួរហើយបានដោះលែងមនុស្ស៤នាក់ទៅវិញដោយគ្មានពាក់ព័ន្ធ ។
ហើយក្នុងនោះសមត្ថកិច្ចបានធ្វើការឃាត់ខ្លួនជនសង្ស័យ៤នាក់ស្រី២នាក់ដោយជនសង្ស័យ២នាក់(ប្រុស)ពីបទឃាតកម្ម និងស្រី២នាក់ពីបទផ្សំគំនិត ដោយស្ត្រីទាំង២នាក់ជាសាក្សីបានដឹងនិងស្គាល់ជនសង្ស័យហើយបានទាក់ទងជាមួយជនសង្ស័យតាមទូរស័ព្ទរហូតទៅ៩លើកក៏ប៉ុន្តែមិនសហការ និងផ្តល់ព័ត៌មានឲ្យសមត្ថកិច្ច ។
សូមរំលឹកផងដែរកាលពីថ្ងៃទី៨ ខែតុលា ឆ្នាំ២០១៨ វេលាម៉ោង១០និង៣០នាទីយប់ មានករណីគ្រោះថ្នាក់ចរាចរណ៍កើតឡើងនៅលើផ្លូវជាតិលេខ១ ស្ថិតនៅភូមិគម្ពោតលៀប សង្កាត់ព្រៃអង្គុញ ក្រុងបាវិត រវាងរថយន្តឡិចស៊ិស RX-៣០០ ជាមួយនឹងម៉ូតូហុងដាសេ១២៥ បណ្តាលឲ្យមនុស្សម្នាក់រងរបួសបាក់ជើង បែកក្បាលធ្ងន់ធ្ងរសន្លប់នៅនឹងកន្លែង ។
ក្រោយហេតុការនោះអ្នកបើកតាក់ស៊ីឈ្មោះ គុជ សំអៀត អាយុ៣២ឆ្នាំ បានចុះទៅបម្រុងជួយជនរងគ្រោះក៏ត្រូវមិត្តភក្តិជនរងគ្រោះចេញពីកន្លែងផឹកស៊ីព្រួតគ្នាដេញវាយប្រហាររហូតដល់ស្លាប់បាត់បង់ជីវិត ហើយអូសសពយកទៅចោលក្នុងព្រៃដើមប្រេងខ្យល់ចម្ងាយប្រមាណ១គីឡូម៉ែត្រស្ថិតក្នុងភូមិគម្ពោតជ្រូក សង្កាត់ព្រៃអង្គុញ ។
រហូតដល់ម៉ោង២និង៣០នាទីរសៀលថ្ងៃទី៩ តុលា ទើបមានគេប្រទះឃើញសពអ្នករត់តាក់ស៊ីប្តឹងសមត្ថកិច្ចរហូតបើកការស៊ើបអង្កេតចាប់ជនសង្ស័យបានបន្តបន្ទាប់ ៕
ចុចអាន ៖ បែកធ្លាយរឿងអំពើឃាតកម្មលើអ្នករត់តាក់ស៊ីវាយរហូតដល់ស្លាប់នៅក្រុងបាវិត
ចែករំលែកព័តមាននេះ