ខេត្តបន្ទាយមានជ័យ ៖ នគរបាលស្រុកមង្គលបូរីស្រាវជ្រាវបង្ក្រាបក្រុមក្មេងទំនើងគប់កញ្ចក់ឡានពេលយប់បានចំនួន៤នាក់ក្នុងចំណោមបក្សពួកជិត១០នាក់ ក្រោយពីមានសេចក្តីរាយការណ៍ថា មានក្រុមក្មេងទំនើងចំនួន២ក្រុម បានធ្វើសកម្មភាពគប់កញ្ចក់ឡានពេលយប់នៅចំណុចផ្លូវរថភ្លើង ស្ថិតក្នុងភូមិសាលាដែង ឃុំប្ញស្សីក្រោក ស្រុកមង្គលបូរី លោកឧត្តមសេនីយ៍ទោ…
ខេត្តបន្ទាយមានជ័យ ៖ នគរបាលស្រុកមង្គលបូរីស្រាវជ្រាវបង្ក្រាបក្រុមក្មេងទំនើងគប់កញ្ចក់ឡានពេលយប់បានចំនួន៤នាក់ក្នុងចំណោមបក្សពួកជិត១០នាក់ ក្រោយពីមានសេចក្តីរាយការណ៍ថា មានក្រុមក្មេងទំនើងចំនួន២ក្រុម បានធ្វើសកម្មភាពគប់កញ្ចក់ឡានពេលយប់នៅចំណុចផ្លូវរថភ្លើង ស្ថិតក្នុងភូមិសាលាដែង ឃុំប្ញស្សីក្រោក ស្រុកមង្គលបូរី លោកឧត្តមសេនីយ៍ទោ អាត់ ខែម ស្នងការនគរបាលខេត្ត បន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ ដល់កម្លាំងនគរបាលនៃអធិការដ្ឋានស្រុកមង្គលបូរី ធ្វើការស្រាវជ្រាវចាប់ក្រុមក្មេងទំនើងទាំងនោះមកផ្តន្ទាទោស បានជាបន្តបន្ទាប់ចំនួន៤នាក់ និងបន្តស្រាវជ្រាវស្វែងរកចាប់ខ្លួនបក្សពួកគេផ្សេងទៀត ដោយមិនទុកឲ្យពួកគេបង្កព្យុះធ្វើភ្លៀងតទៅទៀតឡើយ ។
លោកវរសេនីយ៍ឯក ស៊ិន ណារ៉ាក់ អធិការនគរបាលខេត្តបន្ទាយមានជ័យបានឲ្យដឹងថា នៅវេលាប៉ោង១០យប់ថ្ងៃទី០៤ ខែតុលា ឆ្នាំ២០១៨ មានករណីក្រុមក្មេងទំនើងចំនួន២ក្រុមបានធ្វើសកម្មភាពយកដុំថ្មគប់ទៅលើរថយន្តដែលកំពុងធ្វើដំណើរតាមផ្លូវជាតិលេខ៥ ត្រង់ចំណុចផ្លូវរថភ្លើង ស្ថិតក្នុងភូមិសាលាដែង ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ។
ក្រោយពីមានសកម្មភាពដ៏ព្រហើននេះលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានដាក់បទបញ្ជាឲ្យកម្លាំងនគរបាលស្រុកមង្គលបូរីធ្វើការស្រាវជ្រាវ និងឈានដល់ការបង្ក្រាបក្រុមក្មេងទំនើងទាំង២ក្រុមបានចំនួន៤នាក់ក្នុងចំណោមបក្សពួកគេ១០នាក់ ។
ក្មេងទំនើងក្រុមទី១ ដែលចាប់ឃាត់ខ្លួនបាន មានឈ្មោះ ១-ហេង ឈីត ភេទប្រុស អាយុ១៧ឆ្នាំ,២-អឿង សំណាង ភេទប្រុស អាយុ១៧ឆ្នាំ ទាំង២នាក់មានទីលំនៅភូមិកោះកែវ ឃុំឬស្សីក្រោក ស្រុកមង្គលបូរី, ៣-ឈ្មោះ ដែន ដានិច ភេទប្រុស អាយុ១៨ឆ្នាំ នៅភូមិសាលាដែង ឃុំឬស្សីក្រោក ស្រុកមង្គលបូរី និងក្មេងទំនើងក្រុមទី២មានឈ្មោះ សំ ប៊ុនលឹក ភេទប្រុស អាយុ១៥ឆ្នាំ នៅភូមិកោះកែវ ឃុំឬស្សីក្រោក ស្រុកមង្គលបូរី ។
លោកអធិការក៏បានបញ្ជាក់ថា តាមចម្លើយសារភាពរបស់ឈ្មោះ ហេង ឈីត បាននិយាយថា ហេតុដែលពួកគេនាំគ្នាគប់រថយន្តកំពុងធ្វើដំណើរនេះគឺដោយសារតែអ្នកបើកបររថយន្តលើផ្លូវជាតិលេខ៥ ឈ្លើយៗពេកក្រោយពីពួកគេគប់នៅកន្លែងផ្លូវរថភ្លើងហើយក៏បាននាំគ្នាជិះម៉ូតូទៅគប់រថយន្តដែលឈប់ចតនៅមុខផ្ទះមេភូមិសាលាដែងទៀតរួចបាននាំគ្នាគេចខ្លួន ។
លោកវរសេនីយ៍ឯក ខែម សុភ័ណ នាយការិយាល័យនគរបាលព្រហ្មទណ្ឌកំរិតស្រាលបានបញ្ជាក់ថា ក្មេងទំនើង៣នាក់មានឈ្មោះ ហេង ឈីត, ដែន ដានិច និងឈ្មោះ សំ ប៊ុនលឹក កម្លាំងការិយាល័យជំនាញបានបញ្ជូនខ្លួនទៅសាលាដំបូងខេត្ត កាលពីថ្ងៃទី១២ ខែតុលា ឆ្នាំ២០១៨ នោះដោយឡែកឈ្មោះ អឿង សំណាង ដែលឃាត់ក្រោយនេះត្រូវបានបញ្ជូនខ្លួនទៅសាលាដំបូងខេត្តនៅថ្ងៃទី១៣ ខែតុលា ឆ្នាំ២០១៨ នេះផងដែរ ។ ចំពោះបក្សពួកផ្សេងទៀតកំពុងគេចខ្លួនសមត្ថកិច្ចបន្តស្រាវជ្រាវចាប់ឃាត់ខ្លួនដោយមិនទុកឲ្យគេគេធ្វើព្យុះ ធ្វើភ្លៀងតាមទំនើងចិត្តនោះឡើយ ៕
ចែករំលែកព័តមាននេះ