រាជធានីភ្នំពេញ ៖ ក្រោយពីមានការបែកធ្លាយរូបភាពស្ត្រីម្នាក់ យកស្កុតរុំមាត់កូនជាបែបធ្វើទារុណកម្ម គួរឱ្យថ្កោលទោសនោះ អ្នកលេងបណ្តាញសង្គមហ្វេសបុ៊ក ក៏បានស៊ែរចែករំលែកតៗគ្នា និងធ្វើការរិះគន់យ៉ាងចាស់ដៃទៅលើស្ត្រីជាម្តាយ ដែលហាក់បីដូចជាធ្វើទារុណកម្មលើកូនប្រុសយ៉ាងសាហាវ គ្មានក្តីមេត្តាករុណា
អាណិតស្រឡាញ់បន្តិចណាសោះ ។
នៅយប់ថ្ងៃទី១១ ខែតុលា ស្ត្រីរូបនេះ ត្រូវបានសមត្ថកិច្ចតាមហៅដល់ផ្ទះ ដើម្បីនាំទៅសាកសួរនៅប៉ុស្តិ៍គោកឃ្លាង ទើបស្ត្រីរូបនេះភ្ញាក់ខ្លួននិងស្រឡាំងកាំង ព្រោះរូបភាពរុំស្កុតបិទមាត់កូននោះ ធ្វើឱ្យមានការយល់ច្រឡំ ហើយការថតជាវីដេអូនេះ មានរយៈពេលជាង៦ខែមកហើយ ។
ក្រោមវត្តមានទាំងគ្រួសារតែម្តង រួមទាំងកូនស្រីម្នាក់នោះផងដែរ នៅប៉ុស្តិ៍នគរបាល ស្ត្រីរូបនេះបានឲ្យដឹងថា គាត់ឈ្មោះ សុទ្ធ ធារី អាយុ២៨ឆ្នាំ ប្តីឈ្មោះ ឈឹម វីរៈ អាយុ៣២ឆ្នាំ ប្រកបរបររត់ម៉ូតូឌុប មានទីលំនៅក្នុងភូមិដំណាក់ សង្កាត់គោកឃ្លាង ខណ្ឌសែនសុខ មានកូនចំនួន២នាក់ ប្រុសអាយុ៧ឆ្នាំ ស្រីអាយុ១ខួប៦ខែ ឈ្មោះ ផល លីណា ។
តាមការរៀបរាប់របស់ស្ត្រីជាម្តាយបានឲ្យដឹងថា កាលពីជាង៦ខែមុន គ្រាដែលកូនស្រីគាត់អាយុទើប១ខួប នាងជាក្មេងរពឹស ខណៈដែលក្រុមគ្រួសារនៅជុំគ្នាទាំងអស់គ្នា ក៏បានលេងជាមួយកូនគាត់ ដោយយកស្កុតរុំមាត់កូនស្រីរបស់គាត់នេះលេង គឺមិនមែនកូនប្រុសដូចអ្នកលេងបណ្តាញសង្គមឃើញនោះទេ ។ ការយក
ស្កុតរុំបិទមាត់នោះក្នុងចេតនាលេងជាមួយកូន នៅចំពោះមុខក្រុមគ្រួសារជុំគ្នាទាំងអស់ ហើយពេលនោះ
ប្អូនប្រុសបង្កើតឈ្មោះ សុទ្ធ មុន្នី អាយុ២៤ឆ្នាំ បានយកទូរស័ព្ទរបស់គាត់ម៉ាកអាយហ្វូនសេវែនផ្លាសមកថតលេង និងមិនបានបង្ហោះហ្វេសប៊ុកទៅណាដែរ ។
ស្ត្រីជាម្តាយរៀបរាប់ទៀតថា ប៉ុន្តែប្រមាណជាកន្លះខែក្រោយមក ប្អូនប្រុសដែលជាអ្នកថតរូបភាពនោះជួបគ្រោះថ្នាក់ចរាចរណ៍របួសបោកក្បាលរហូតដល់សន្លប់ បាត់បង់ទាំងលុយកាក់ បាត់ទាំងទូរស័ព្ទអាយហ្វូន១គ្រឿងរបស់គាត់នោះទៀតផង ទើបមានការបែកធ្លាយវីដេអូនេះ ។ ប្រភពដដែលបន្តទៀតថា អស់រយៈពេលជាង៦ខែមកហើយ ទើបតែ២ទៅ៣ថ្ងៃនេះ ស្រាប់តែបែកធ្លាយរូប ដែលគាត់យកស្កុតរុំមាត់កូននោះ ត្រូវគេបង្ហោះលើបណ្តាញសង្គមព្រោងព្រាតថែមទាំងមានមតិរិះគន់ផង រហូតមកដល់ព្រលប់ថ្ងៃទី១១ខែតុលា នគរបាលប៉ុស្តិ៍បានទៅតាមហៅគាត់ដល់ផ្ទះ សួរនាំពីរូបភាពខាងលើ ទើបភ្ញាក់ខ្លួនព្រើត ព្រោះ
មិននឹកស្មានថា រូបភាពតាំងពីជាង៦ខែមុន ក្រោយពីបាត់ទូរស័ព្ទ ទើបមកបែកធ្លាយ ។
តាមស្ត្រីឈ្មោះ ហួន នឿន អាយុ៥៨ឆ្នាំ ដែលជាម្តាយបង្កើតរបស់ស្ត្រីខាងលើ សព្វថ្ងៃរស់នៅជាមួយគ្នា បានឲ្យដឹងថា ពេលកូនស្រីលេងរុំស្កុតមាត់ចៅ ហើយកូនប្រុសគាត់ម្នាក់ទៀតថតលេងនោះ គឺរូបគាត់និងក្រុមគ្រួសារនៅជុំគ្នាទាំងអស់ ហើយសកម្មភាពនេះ មិនមែនម្តាយធ្វើទារុណកម្មកូនទេ គាត់ហ៊ានអះអាងចំពោះ
មុខសមត្ថកិច្ច ។
ដោយមានមតិរិះគន់ច្រើនក្នុងបណ្តាញសង្គម ទៅតាមរូបភាពដែលមិនមែនជាការពិត ត្រូវបានគេបង្ហោះនោះ ទោះជាសាមីខ្លួនរួមទាំងក្រុមគ្រួសារអះអាងនៅចំពោះមុខសមត្ថកិច្ចក្តី ក៏ស្ត្រីខាងលើបានសម្តែងនូវការសូមទោសជាសាធារណៈ ហើយសមត្ថកិច្ចក៏មិនបានឃាត់ខ្លួនអ្វីដែរ ។ ក្រោយពីការសុំទោសរួច ក៏បានអនុញ្ញាតឲ្យវិលត្រឡប់ទៅលំនៅឋានវិញ ៕
ចែករំលែកព័តមាននេះ