រាជធានីភ្នំពេញ ៖ ពិតជាមានការភ្ញាក់ផ្អើលដែលឃើញវត្តមានបេក្ខភាពប្រឡងចម្រៀងលំដាប់ពិភពលោកកុមារី វណ្ណ ណាណា មានឈាមជ័រសិល្បៈដោយមានយាយជាតារាកំប្លែង ហើយឪពុកជាតារាចម្រៀងមានឈ្មោះក្នុងវិស័យសិល្បៈ ។ កាន់តែធ្វើបានល្អ វណ្ណ ណាណា ឆ្លងផុតវគ្គសំខាន់ៗរហូតគ្រូបង្វឹក សួស វីហ្សា សម្រេចយកឲ្យចូលទៅកាន់វគ្គ Live Show ក្រោយដឹងពីទេពកោសល្យភាពឆ្លាតវៃ ។
បេក្ខនារីឈ្មោះ វណ្ណ ណាណា អាយុ១៤ឆ្នាំ គឺជាកូនស្រីបង្កើតរបស់តារាចម្រៀងលោក វណ្ណា ស័ក្ដ និងជាចៅស្រីបង្កើតរបស់លោកយាយ ណយ សំណាង ដែលជាតារាកំប្លែងល្បីឈ្មោះបានធ្វើអោយម្នាក់ៗកាន់តែមានការចាប់អារម្មណ៍ចំពោះបេក្ខនារីវ័យក្មេងរូបនេះយ៉ាងខ្លាំង ដោយសារតែនាងត្រូវគេដឹងថា មានសមត្ថភាពសំឡេងមិនធម្មតាផងនោះ ។
បទចម្រៀងរបស់នាងត្រូវគេចែកចាយកាន់តែខ្លាំង ដែលធ្វើអោយនាងត្រូវបានគេមើលឃើញថាទទួលបានប្រជាប្រិយភាព និងល្បីរួចស្រេចទៅហើយក្នុងកម្មវិធី The Voice Kids Cambodia រដូវកាលទី២ ដោយសារតែមានជីដូន និងឪពុក សុទ្ធតែជាអ្នកសិល្បៈល្បីឈ្មោះ ។
ចម្រៀងមួយបទរបស់នាងក្រោមចំណងជើងថា «បឹងហ្គាវ៉ាន់សូឡូ» ត្រូវគេឃើញចែកចាយយ៉ាងគួរអោយចាប់អារម្មណ៍នៅលើហ្វេសប៊ុកតែម្ដង ហើយអាចឲ្យគណៈកម្មាការទាំង៣ចុចយកដោយនាងតូចជ្រើសយកគ្រូបង្វឹក(Coach) សួស វីហ្សា ជាកូនក្រុម ។
នាងត្រូវគេប៉ាន់ស្មានថា នឹងខ្លាំងក្នុងកម្មវិធី The Voice Kids Cambodia រដូវកាលទី២នេះ ជាពិសេសនៅពេលដែលនាងចាប់ផ្ដើមផ្ទុះខ្លាំងក្នុងស្រទាប់មហាជនដោយមិនប្រើរយៈពេលវែង ព្រោះតែមានសមត្ថភាព ហើយកន្ត្រាក់បានការចាប់អារម្មណ៍ពីមហាជនភ្លាមៗព្រោះតែចំហាយជីដូន និងឪពុក ។
មួយបទ «បឹងហ្គាវ៉ាន់សូឡូ» របស់នាង ទទួលបានការសរសើរយ៉ាងខ្លាំងដ្បិតថា នៅមិនទាន់ដឹងថា តើនាងនឹងមានវាសនាគ្រងពានលំដាប់ពិភពលោកនេះ ឬក៏អត់ ។ គ្រាន់តែជុំទី២ប្រកួតច្រៀង៣នាក់ហើយ សួស វីហ្សា ជ្រើសរើសយកទៅកាន់វគ្គបន្តជាវគ្គផ្សាយផ្ទាល់ វណ្ណ ណាណា យំបង្ហូរទឹកភ្នែកមិននឹកស្មានដល់ រីឯយាយ ណាង និងម្តាយ ណាណា សាច់ញាតិទៀតក៏យំរំភើបចង់ហោះ ។
គេកំពុងតាមដានថា តើគ្រាប់ពូជអ្នកសិល្បៈនេះធ្វើបានល្អបែបណាទៀតពេលប៉ះជើងខ្លាំងឯទៀត ។ តោះទស្សនាការប្រឡងវគ្គដំបូងរបស់ ណាណា ដែលទាក់ទាញរហូតចុចបូតុង៣កៅអី ៖
ចែករំលែកព័តមាននេះ