តុលាការសម្រេចឃុំខ្លួនបុរសម្នាក់ ដាក់ពន្ធនាគារបណ្តោះអាសន្ន
- កណ្តាល
ខេត្តកណ្តាល ៖ នៅល្ងាចថ្ងៃទី១២ តុលា ២០១៨ លោក សាយ សម្ជស្សសេរី ចៅក្រមស៊ើបសួរ សាលាដំបូង…
ខេត្តកណ្តាល ៖ នៅល្ងាចថ្ងៃទី១២ តុលា ២០១៨ លោក សាយ សម្ជស្សសេរី ចៅក្រមស៊ើបសួរ សាលាដំបូង ខេត្តកណ្តាល បានសម្រេចចេញដីកាឃុំខ្លួន ជនសង្សយ័ដែលលួចសម្ងំពួនកាប់ ជនរងគ្រោះនៅក្រោមផ្ទះបណ្ដាលឲ្យរបួសធ្ងន់ ដាក់ពន្ធនាគារបណ្តោះអាសន្ន ពីបទ “ហិង្សាដោយចេតនាមានស្ថានទម្ងន់ទោស” ដែលប្រព្រឹត្តនៅ ភូមិចុងកោះធំ ឃុំ កោះធំ(ក) ស្រុកកោះធំ ខេត្តកណ្ដាល នាថ្ងៃទី១២ ខែតុលា ឆ្នាំ២០១៨ តាមមាត្រា២១៨ នៃក្រមព្រហ្មទណ្ឌ។
ជនត្រូវចោទមានឈ្មោះ ឈន ឈី ភេទប្រុស អាយុ៤៥ឆ្នាំ រស់នៅភូមិចុងកោះធំ ឃុំកោះធំ(ក) ស្រុកកោះធំ ខេត្តកណ្ដាល មុខរបរមិនពិតប្រាកដ។ ជនរងគ្រោះឈ្មោះ កុយ ថេប ភេទប្រុស អាយុ៤០ឆ្នាំ រស់នៅភូមិចុងកោះធំ ឃុំកោះធំ(ក) ស្រុកកោះធំ ខេត្តកណ្ដាល មុខរបរទិញអេតចាយ។ នគរបាលបានឲ្យដឹងថា នៅថ្ងៃខែឆ្នាំកើតហេតុជនរងគ្រោះនៅលើផ្ទះ ហើយបានឮសំឡេងឆ្កែព្រុះក៏ចុះ ពីលើផ្ទះមកចុចពិលរកមើល ស្រាប់តែប្រទះឃើញជនសង្ស័យពួនសម្ងំនៅក្រោមគ្រែ(ក្រោមផ្ទះ)។
ពេលនោះជនរងគ្រោះដើរសំដៅទៅមើលមុខជនសង្ស័យ តែត្រូវបានជនសង្ស័យយកវត្ថុរឹង គប់មកលើជនរងគ្រោះតែពេលនោះជនរងគ្រោះគេចផុត ហើយជនសង្ស័យបានរត់ចេញពីក្រោមគ្រែ ហើយជនរងគ្រោះក៏បានយកពូថៅរបស់ខ្លួនដេញតាមទាន់ហើយបានវាយប្រតាយប្រតបគ្នា ជនរងគ្រោះក៏បានដួល ហើយជនសង្ស័យដណ្ដើមពូថៅបាន ក៏វាយក្បាលបណ្ដាលឲ្យបែកក្បាល ដេរចំនួន១៧ ថ្នេរ។
ក្រោយមកជនរងគ្រោះបានរាយការណ៍មកសមត្ថកិច្ចប៉ុស្ដិ៍ តាមរយៈទូរស័ព្ទ ក្រោយពីបានទទូលព័ត៌មានពីជនរងគ្រោះភ្លាម សមត្ថកិច្ចប៉ុស្ដិ៍បានទៅដល់កន្លែងកើតហេតុ ហើយក៏បានធ្វើការឃាត់ខ្លួនជនសង្ស័យ ហើយបញ្ជូនមកផ្នែកជំនាញ នៃអធិការដ្ឋាននគបាល ស្រុកកោះធំ ដើម្បីចាត់ការតាមនិតិវិធី៕
ចែករំលែកព័តមាននេះ