ប៉េរូ៖ «ហេតុតែចង់ឲ្យក្មេងៗគ្នាឯងចេះសន្សំលុយ ក៏សម្រេចចិត្តយកឈ្នះគំនិតមនុស្សចាស់ ទៅបើកធនាគារមួយដោយខ្លួនឯងនៅអាយុ៧ឆ្នាំ។»
តាមប្រភពព័ត៌មាន Oddity Central បានឲ្យដឹងថា ក្មេងប្រុសម្នាក់បានបើកធនាគារមួយដោយខ្លួនឯងនៅអាយុ៧ឆ្នាំ ដែលពេលនេះមានអតិថិជនជាង២០០០នាក់ និងសេវាហិរញ្ញវត្ថុជាច្រើន។
ក្មេងប្រុសជនជាតិប៉េរូ Jose Adolfo Quisocala Condori សម្រេចចិត្តបើកធនាគារសម្រាប់ក្មេងៗគ្នាឯងកាលពី៦ឆ្នាំមុន ដោយសារតែឃើញក្មេងៗគ្នាឯងចាយលុយអត់ប្រយោជន៍លើស្ករគ្រាប់ និងរបស់លេង។ បើទោះបីជានៅក្មេងក៏ដោយ Jose យល់ច្បាស់ថា ការសន្សំលុយគឺជាវិធីល្អសម្រាប់មនុស្សធំក្នុងការបញ្ជៀសពីបញ្ហាថវិកានៅថ្ងៃមុខ។ គេក៏ចង់ឲ្យក្មេងៗចេះប្រើវិធីនេះដូចគ្នា។
កាលពីនៅអាយុ៧ឆ្នាំ Jose បាននិយាយរឿងនេះប្រាប់គ្រូរបស់គេដែរ តែត្រូវបានគ្រូជំទាស់ ហើយប្រាប់ថា ក្មេងអាយុប៉ុននេះមិនអាចគ្រប់គ្រងការងារហ្នឹងបានទេ។ ពេលនេះ Jose បានធ្វើឲ្យគ្រូ និងមនុស្សចាស់ផ្សេងទៀតនិយាយមិនចេញ។
ម្ចាស់ធនាគារវ័យក្មេង Jose បានបង្កើតជាធនាគារ Bertselana Student Bank ជាលើកដំបូងនៅក្នុងផ្ទះរបស់ខ្លួននាទីក្រុង Arequipa ក្នុងឆ្នាំ២០១២។ អតិថិជនរបស់គេត្រូវតែជាក្មេងៗ ហើយតម្រូវឲ្យយកអេតចាយ (ក្រដាស ឬ ប្លាស្ទិក) មកដាក់តម្កល់យ៉ាងហោចណាស់៥គីឡូក្រាម ហើយត្រូវយកអេតចាយមកដាក់យ៉ាងហោចណាស់១គីឡូក្រាមជារៀងរាល់ខែ ដើម្បីរក្សាសមាជិកភាព។ ពួកគេតម្រូវឲ្យកំណត់គោលដៅនៃការសន្សំ។ពេលណាគោលដៅសន្សំរបស់ពួកគេបានសម្រេច ទើបពួកគេអាចដកប្រាក់បាន។
នៅចន្លោះឆ្នាំ២០១២ និង២០១៣ ធនាគារ Bertselana Student Bank បានចាប់ដៃគ្នាជាមួយនឹងធនាគារធំមួយនៅក្នុងប្រទេស តែមិនបានជោគជ័យ Jose ក៏សម្រេចចិត្តធ្វើបន្តម្នាក់ឯង។ មកដល់សព្វថ្ងៃនេះ គេមានអតិថិជនចំនួនជាង២០០០នាក់ ដែលសុទ្ធតែក្មេងៗអាយុពី១០ឆ្នាំដល់១៨ឆ្នាំ ហើយមានសេវាធនាគារជាច្រើនដូចជា សេវាកម្ចី សេវាវិនិយោគដើមទុន សេវាមីក្រូធានារ៉ាប់រង និងសេវាបង្រៀនពីហិរញ្ញវត្ថុ។ Jose ជឿជាក់ថា វប្បធម៌ក្នុងការសន្សំប្រាក់ពីវ័យក្មេង គឺជារូបមន្តក្នុងការផ្លាស់ប្តូរប្រទេសប៉េរូឲ្យកាន់តែរីកចម្រើន៕
ចែករំលែកព័តមាននេះ