ខេត្តកំពង់ធំ ៖ អគ្គមេបញ្ជាការរងនៃកងយោធពលខេមរភូមិន្ទឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកបានលើកឡើងថា កងទ័ពក្រៅពីភារកិច្ចការពារបូរណភាពទឹកដី គឺត្រូវបន្តចូលរួមចំណែកយ៉ាងសកម្មបន្ថែមទៀត ក្នុងការថែរក្សាសន្តិសុខសណ្តាប់ធ្នាប់ និងស្ថេរភាពសង្គម និងទប់ស្កាត់រាល់បទល្មើសផ្សេងៗទៀតផងដែរ ។
ឧត្តមសេនីយ៍ឯក ហ៊ុន ម៉ាណែត បានលើកឡើងបែបនេះនៅក្នុងពិធីសម្ពោធដាក់ឲ្យប្រើប្រាស់ ជាផ្លូវការនូវសមិទ្ធផលនានារបស់បញ្ជាការដ្ឋានតំបន់ប្រតិបត្តិការសឹករងកំពង់ធំដែលជា អំណោយរបស់សាធារណរដ្ឋសង្គមនិយមវៀតណាម នៅថ្ងៃទី១២ ខែតុលា ឆ្នាំ២០១៨ ។ ឧត្តមសេនីយ៍ឯក ហ៊ុន ម៉ាណែត បានថ្លែងថាក្រៅពីកាតព្វកិច្ចការពារបូរណភាពទឹកដី កងយោធពលខេមរភូមិន្ទ នៅបានបន្តចូលរួមចំណែកយ៉ាងសកម្មក្នុងការថែរក្សាសន្តិសុខសណ្តាប់ធ្នាប់ និងស្ថេរភាពសង្គមបង្ការទប់ស្កាត់រាល់អំពើឧក្រិដ្ឋកម្មចោរកម្ម អំពើជួញដូរគ្រប់ប្រភេទអំពើភេរវកម្ម អំពើឧក្រិដ្ឋកម្មឆ្លងដែនជាច្រើនទៀត ។
លោកថាអ្វីជាសំខាន់ទៀតនោះ គឺត្រូវការពារ និងទប់ស្កាត់បានទាន់ពេលវេលានូវឧបាយកល ល្បិចកលនាំយកបដិវត្តន៍ពណ៌របស់បក្សប្រឆាំងដែលប៉ុនប៉ងផ្តួលរំលំរាជរដ្ឋាភិបាលស្របច្បាប់កាលពីអាណត្តិទី៥កន្លងទៅក៏ដូចជា ចង់បំផ្លាញការបោះឆ្នោតជ្រើសតាំងតំណាងរាស្ត្រអាណត្តិទី៦ ដែលផ្ទុយទាំងស្រុងពីរដ្ឋធម្មនុញ្ញ គោលការណ៍ប្រជាធិបតេយ្យពីឆន្ទះរបស់ប្រជាពលរដ្ឋ និងនីតិរដ្ឋ ។ លោកឧត្តមសេនីយ៍ ហ៊ុន ម៉ាណែត បានបញ្ជាក់ប្រាប់កងទ័ពថា រាជរដ្ឋាភិបាលកម្ពុជាអាណត្តិទី៦ ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ និងជារាជរដ្ឋាភិបាលស្របច្បាប់កើតចេញពីលទ្ធផលដ៏ត្រចះត្រចង់ នៃការបោះឆ្នោត សកលកាលពីថ្ងៃទី២៩ ខែកក្កដា ឆ្នាំ២០១៨នោះ បានដាក់ចេញនូវគោលនយោបាយយុទ្ធសាស្ត្រចតុកោណតំណាក់កាលទី៤ ដើម្បីធ្វើការកែទម្រង់កាន់តែស៊ីជម្រៅបន្ថែមទៀតសំដៅធ្វើឲ្យប្រទេសជាតិមានការអភិវឌ្ឍន៍រីកចំរើនលើគ្រប់វិស័យ ។
លោកថា គោលនយោបាយនៃកំណែទម្រង់នោះសំដៅការអភិវឌ្ឍហេដ្ឋារចនាសម្ព័ន្ធរូបវ័ន្ត ដែលជាសរសៃឈាមសម្រាប់ការជំរុញកំណើនសេដ្ឋកិច្ចជាតិ ក្នុងគោលដៅនៃសកលភាវូបនីយ៍កម្មក្នុងសហគមន៍ប្រជាជាតិអាស៊ីអាគ្នេយ៍ ក្នុងនោះរាប់ទាំងការប្រកាន់យក និងការអនុវត្ត នូវរបបលទ្ធិប្រជាធិបតិយ្យ សេរីពហុបក្ស ការគោរពសិទ្ធិមនុស្ស ការគោរពរនិតិរដ្ឋ ការលើកស្ទួយ កម្រិតជីវភាពរស់នៅរបស់ប្រជាជនឲ្យមានការវិវឌ្ឍកើនឡើងជាលំដាប់ ។ លោក ហ៊ុន ម៉ាណែត បានអះអាងថា វិស័យនយោបាយ សន្តិសុខសណ្តាប់ធ្នាប់សង្គម វិស័យពាណិជ្ជកម្ម ឧស្សាហកម្ម ទេសចរណ៍ និងវប្បធម៌បាន នឹងកំពុងរក្សាបានស្ថេរភាពរឹងមាំ ។
ជាក់ស្តែងក្នុងឆ្នាំ២០១៨ នេះ តាមការវាយតម្លៃរបស់ធនាគារអភិវឌ្ឍន៍អាស៊ី (ADB) ក៏ដូចជាអ្នកជំនាញសេដ្ឋកិច្ចកម្ពុជាមានកំណើនសេដ្ឋកិច្ចក្នុងរង្វង់៧,ភាគរយ ជាប់ៗគ្នា ធ្វើឲ្យអត្រានៃភាពក្រីក្រត្រូវបានកាត់បន្ថយមកនៅត្រឹម១១ភាគរយ ហើយ GDP សម្រាប់ប្រជាជនកម្ពុជាក្នុងម្នាក់ទទួលបានជាង១៥០០ ដុល្លារ ។ ទន្ទឹមនោះ រាជរដ្ឋាភិបាលកម្ពុជាក៏បានប្រកាន់យកគោលយោបាយសន្តិសហវិជ្ជមាន និងអព្យាក្រិតក្នុងការទំនាក់ទំនង ការទូតរបស់កម្ពុជា ជាមួយ និងបណ្តាប្រទេសលើពិភពលោក ។
ឧត្តមសេនីយ៍ឯក ហ៊ុន ម៉ាណែត បានលើកឡើងថា បច្ចុប្បន្ននេះកងយោធពលខេមរភូមិន្ទ កំពុងតែអនុវត្តយ៉ាងខ្ជាប់ខ្ជួន តាមផែនការ កែទម្រង់របស់ខ្លួនជាបណ្តើរៗ ដោយផ្អែកលើច្បាប់ពីរជាមូលដ្ឋាន គឺច្បាប់កាតព្វកិច្ចយោធា និងច្បាប់សោធនិវត្តន៍ ។ ប៉ុន្តែលោកថា លទ្ធផលនៃការកែទម្រង់នៅពេលនេះនៅមានភាពលំបាកខ្វះខាត និងមានចន្លោះប្រហោងខ្លះៗដែលជាប្រការមិនអាចចៀសបាននៃដំណើរកំណែទម្រង់ ។
យ៉ាងណាក៏ដោយលោករំពឹងថា ជាបន្តបន្ទាប់ការងារកែទម្រង់នេះនឹងទទួលបានជោគជ័យ តាមរយៈការបណ្តុះបណ្តាលធនធានមនុស្ស ការបញ្ជ្រាបនាយទាហានវ័យក្មេងដែលមានចំណេះដឹងជ្រៅជ្រះ និងកាយសម្បទាមាំមួន ព្រមជាមួយនឹងការពង្រីក ចំណេះដឹងខាងវិជ្ជាជីវៈគ្រប់ជំនាញផងដែរ ៕
ចែករំលែកព័តមាននេះ