អណ្តើកហ្លួងកើនឡើងក្នុងដែនជម្រកធម្មជាតិ
- កោះកុង
ខេត្តកោះកុង ៖ យោងតាមសេចក្តីប្រកាសព័ត៌មានរបស់ WCS កាលពីថ្ងៃទី៥ ខែតុលា ឆ្នាំ២០១៨ថា បន្ទាប់ពីការលែងអណ្តើកហ្លួង កាលពីខែវិច្ឆិកា ឆ្នាំ២០១៧…
ខេត្តកោះកុង ៖ យោងតាមសេចក្តីប្រកាសព័ត៌មានរបស់ WCS កាលពីថ្ងៃទី៥ ខែតុលា ឆ្នាំ២០១៨ថា បន្ទាប់ពីការលែងអណ្តើកហ្លួង កាលពីខែវិច្ឆិកា ឆ្នាំ២០១៧ នៅតាមប្រព័ន្ធព្រែកស្រែអំបិល ក្រុមការងារតាមដាន និងស្រាវជ្រាវរបស់អង្គការសមាគមអភិរក្សសត្វព្រៃ(WCS) និងនាយកដ្ឋានអភិរក្សជលផលនៃក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថាកិច្ចខិតខំប្រឹងប្រែងក្នុងការអភិរក្សអណ្តើកហ្លួងដែលជាប្រភេទសត្វជិតផុតពូជបំផុតក្នុងសាកលលោកកំពុងបង្ហាញសញ្ញានៃភាពជោគជ័យ ។
ឆ្លងតាមការតាមដានរៀងរាល់ខែដោយក្រុមល្បាតសហគមន៍ រដ្ឋបាលជលផលនិងអង្គការ WCS បានរកឃើញអណ្តើកហ្លួងទាំងអស់ក្នុងរយ់ពេល១០ខែបន្ទាប់ពីលែងតាមរយៈឧបករណ៍តាមដានដែលបានបំពាក់លើស្នូកអណ្តើកហ្លួង ។ ទិន្នន័យពីការស្រាវជ្រាវ និងតាមដានបានបង្ហាញថាអណ្តើកហ្លួង១ក្បាលបានផ្លាស់ទីទៅកាន់ប្រព័ន្ធព្រែកជីផាត់ដែលមានចម្ងាយជិត១០០គីឡូម៉ែត្រពីទីតាំងលែង។
ដោយឡែកអណ្តើកហ្លួង១ក្បាលផ្សេងទៀតត្រូវបានប្រជានេសាទប្រទះឃើញជាប់មង និងបានប្រគល់ឱ្យអង្គការ WCSដើម្បីថែរក្សា ។ លទ្ធផលទាំងនេះបានបញ្ជាក់ថា អណ្តើកហ្លួងទាំងអស់បាននិងកំពុងផ្លាស់ទៅកាន់់ទីជម្រកនានាបន្ទាប់ពីការលែង ។
អណ្តើកហ្លួង ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុត និងស្ថិតក្នុងចំណោមអណ្តើកទាំង២៥ប្រភេទដែលកំពុងរងគ្រោះថ្នាក់ខ្លាំងជាងគេបំផុតនៅលើពិភពលោក និងចាត់ជាប្រភេទកំពុងរងគ្រោះថ្នាក់ក្នុងប្រទេសកម្ពុជា ។ ជាពិសេសព្រះរាជក្រឹត្យ នស/រករត/០៣០៥/១៤៩ ចុះថ្ងៃទី២១ ខែមីនា ឆ្នាំ២០០៥ បានដាក់បញ្ចូលសត្វអណ្តើកហ្លួងនេះជាប្រភេទសត្វល្មូនតំណាងឱ្យប្រទេសកម្ពុជា ។
សត្វអណ្តើកហ្លួងធ្លាប់ត្រូវបានគេគិតថាបានផុតពូជពីប្រទេសកម្ពុជាទៅហើយ ប៉ុន្តែនៅក្នុងឆ្នាំ២០០០ រដ្ឋបាលជលផល និងអង្គការ WCS បានសិក្សាស្រាវជ្រាវ និងរកឃើញមានចំនួនសត្វអណ្តើកប្រភេទនេះដ៏តិចតួចឡើងវិញនៅតាមប្រព័ន្ធព្រែកស្រែអំបិល ក្នុងប្រទេសកម្ពុជា។
ចាប់តាំងពីពេលនោះមក អង្គការ WCS និងរដ្ឋបាលជលផលបានធ្វើការរួមគ្នាការពារ និងអភិរក្សសត្វអណ្តើកហ្លួងទាំងនេះពីការផុតពូជតាមរយៈសកម្មភាព៖ ការការពារសំបុកពងកូន ការចិញ្ចឹម និងថែរក្សា ការពង្រឹងការអនុវត្តច្បាប់ ការទប់ស្កាត់បទល្មើសនេសាទ និងការជួញដូរសត្វព្រៃ ការស្រាវជ្រាវ និងការតាមដាន ។
លោកសោម ស៊ីថា ទីប្រឹក្សាបច្ចេកទេសគម្រោងអភិរក្សខេត្តកោះកុងនៃអង្គការ WCS បានលើកឡើងថា៖ «កម្មវិធីការពារសំបុកពងកូនដើរតួនាទីយ៉ាងសំខាន់ក្នុងការការពារសត្វអណ្តើកហ្លួងពីការផុតពូជ ម្យ៉ាងវិញទៀត កម្មវិធីនេះបានផ្តល់ការងារដល់អតីតអ្នកប្រមូលពងដើម្បីការពារសំបុកដែលអាចបង្កើនប្រាក់ចំណូលបន្ថែមសម្រាប់ពួកគាត់ ជាពិសេសដើម្បីធានាថាពងកូនអណ្តើកហ្លួងត្រូវបានការពារយ៉ាងយកចិត្តទុកដាក់ និងភ្ញាស់ដោយជោគជ័យ ។
ក្នុងឆ្នាំ២០១៥ និងឆ្នាំ២០១៧ គម្រោងបានលែងអណ្តើកហ្លួងជំទង់ញី និងងឈ្មោលពីរក្រុមដែលមានចំនួន ស្មើៗគ្នាទៅក្នុងជម្រកធម្មជាតិវិញដោយមានបំពាក់ឧបករណ៍តាមដាន ។ កម្មវិធីតាមដានក្រោយការលែងបានបង្ហាញពីភាពជោគជ័យដោយរកឃើញអត្រារស់រានមានជីវិតរបស់អណ្តើកហ្លួងដែលលែងមានកម្រិតខ្ពស់តាមរយៈការគ្រប់គ្រងប្រកបដោយប្រសិទ្ធភាព លើកត្តាគំរាមកំហែងនានា ។ យើងសង្ឃឹមថា អណ្តើកដែលលែងទាំងនេះនឹងបន្តពូជនាពេលដ៏ខ្លីខាងមុខដែលជាក្តីសង្ឃឹមក្នុងការស្តារឡើងវិញនូវប្រភេទដ៏កម្រនេះ » ។
លោកអ៊ុក វិបុល ប្រធាននាយកដ្ឋានអភិរក្សជលផលនៃរដ្ឋបាលជលផលក៏បានគូសបញ្ជាក់ផងដែរថា៖ «សកម្មភាពបូមខ្សាច់ ការកាប់បំផ្លាញព្រៃលិចទឹកដែលជាទីជម្រក និងការនេសាទខុសច្បាប់បានបង្កការគំរាមកំហែងដល់ទីជម្រករបស់អណ្តើកហ្លួង ជាពិសេសតំបន់ឆ្នេរខ្សាច់ដែលជាជម្រកពងកូន ។ យើងត្រូវការការគាំទ្រពីស្ថាប័នពាក់ព័ន្ធនានា ដើម្បីចូលរួមកាត់បន្ថយហានិភ័យដែលកើតមានឡើងនៅតាមប្រព័ន្ធព្រែកស្រែអំបិល ។
រដ្ឋបាលជលផលកំពុងរៀបចំសេចក្តីព្រាងប្រកាសរបស់ក្រសួងកសិកម្ម រុក្ខាប្រមាញ់ និងនេសាទ ដើម្បីដាក់តំបន់មួយចំនួនធំនៅតាមប្រព័ន្ធព្រែកស្រែអំបិលទៅជាតំបន់គ្រប់គ្រង សម្រាប់សត្វអណ្តើកហ្លួង និងក្រពើត្រី ។ សេចក្តីប្រកាសនេះនឹងចូលជាធរមានក្នុងពេល ឆាប់ៗនេះ »៕
ចែករំលែកព័តមាននេះ