ប្រទេសម៉ាឡេស៊ី ៖ រដ្ឋាភិបាលម៉ាឡេស៊ីកាលពីថ្ងៃទី១១ តុលា បានសម្រេចលុបចោលទោសប្រហារជីវិត ជាទោសមួយដែលនាំឲ្យមានការប្រឆាំងជំទាស់កាន់តែខ្លាំងឡើងក្នុងប្រទេសនោះ ដែលមានអ្នកទោសជាង១២០០នាក់ស្ថិតក្នុងបន្ទប់ឃុំឃាំងរង់ចាំការប្រហារជីវិត។
រដ្ឋមន្ត្រីគមនាគមន៍ម៉ាឡេស៊ី លោកGOBIND SINGH DEOថ្លែងថា រដ្ឋាភិបាលបានព្រមព្រៀងដើម្បីលុបចោលទោសប្រហារជីវិត។ ខ្ញុំសង្ឃឹមថាច្បាប់មួយនឹងត្រូវធ្វើវិសោធនកម្មក្នុងពេលឆាប់ៗ។
ទោសប្រហារជីវិតដោយព្យូរក បច្ចុប្បន្នគ្រោងដោយច្បាប់ម៉ាឡេស៊ីមួយសម្រាប់ពួកអ្នកប្រព្រឹត្តបទឧក្រិដ្ឋសម្លាប់មនុស្សនិងចាប់ពង្រត់ ពួកអ្នកកាន់អាវុធខុសច្បាប់ព្រមទាំងពួកអ្នករត់ពន្ធគ្រឿងញៀន។
រដ្ឋមន្ត្រីរូបនោះគូសបញ្ជាក់ទៀតថា រដ្ឋាភិបាលបានជ្រើសរើសយកការលុបចោលទោសប្រហារជីវិត មកពីការប្រឆាំងកាន់តែខ្លាំងរបស់ពលរដ្ឋម៉ាឡេស៊ីចំពោះទោសបែបនេះ។យោងតាមសារព័ត៌មានក្នុងស្រុកនានាថា អ្នកទទួលខុសត្រូវជាន់ខ្ពស់ម្នាក់នៃរដ្ឋាភិបាលម៉ាឡេស៊ីលោកLIEW VUI KEONGគូសបញ្ជាក់នាថ្ងៃទី១១តុលាថា ការពន្យារពេលប្រហារជីវិតពួកអ្នកទោសនឹងត្រូវអនុវត្ត។
ការធ្វើវិសោធនកម្មច្បាប់ស្ដីពីទោសប្រហារជីវិតត្រូវដាក់ជូនសភានាថ្ងៃទី១៥តុលា។ក្នុងចំណោមមនុស្សដែលប្រឈមមុខនឹងការប្រហារជីវិតមានជាពិសេសនារីជនជាតិអូស្ត្រាលីម្នាក់ លោកស្រីMARIA ELVIRA PINTO EXPOSTOអាយុ៥៤ឆ្នាំដែលទទួលការកាត់ទោសនៅសាលាឧទ្ធរណ៍កាលពីខែឧសភាពីបទរត់ពន្ធគ្រឿងញៀន។
កាលពីខែមេសា ឆ្នាំ២០១៧ អង្គការលើកលែងទោសអន្តរជាតិAMNESTY INTERNATIONALបានចាត់ចំណាត់ថ្នាក់ម៉ាឡេស៊ី ស្ថិតក្នុងលំដាប់់ទី២នៃបណ្ដាប្រទេសដែលប្រហារជីវិតអ្នកទោសច្រើនជាងគេកាលពីឆ្នាំទៅមិញ។រវាងឆ្នាំ២០០៧និង២០១៧បើតាមកាសែតNEW STRAITS TIMESថា មនុស្ស៣៥នាក់ត្រូវព្យួរកនៅម៉ាឡេស៊ី។គេរាប់ឃើញអ្នកទោសប្រហារជីវិត១២៦៧នាក់ស្ថិតក្នុងកន្លែងឃុំឃាំងអ្នកទោសប្រហារជីវិតក្នុងប្រទេសនេះ៕
ចែករំលែកព័តមាននេះ