រាជធានីភ្នំពេញ ៖ គម្រោងខុនដូ មិងហួរ ដែលជាការវិនិយោគទាំងស្រុងដោយវិនិយោគិនក្នុងស្រុក និងផ្ដោតទៅលើអតិថិជនក្នុងស្រុកផងដែរនោះ បានប្រកាសលក់ជាផ្លូវការដល់អតិថិជន ជាពិសេសប្រជាពលរដ្ឋដែលកំពុងស្វែងរកការស្នាក់នៅបែបខុនដូ។ ពិធីប្រកាសនេះបានធ្វើឡើងកាលពីរសៀលថ្ងៃទី ០៥ តុលា ២០១៨ នៅសណ្ឋាគារ Great Duke ភ្នំពេញ ក្រោមអធិបតីភាពឯកឧត្តម លាង មុនីរិទ្ធ រដ្ឋលេខាធិកាក្រសួងរៀបចំដែនដី នគរូបនីយកម្ម និងសំណង់។
ក្នុងកិច្ចសម្ភាសន៍ជាមួយអ្នកសារព័ត៌មានក្នុងពិធីប្រកាសនោះ លោកឈួរ ឈុនហួរ អគ្គនាយកនៃក្រុមហ៊ុនមិងហួរគ្រុប ដែលជាក្រុមហ៊ុនវិនិយោគលើគម្រោងខុនដូនេះ បានឲ្យដឹងថា លោកនៅតែមើលឃើញពីសក្ដានុពលទីផ្សារខុនដូនៅក្នុងប្រទេសកម្ពុជា ជាពិសេសនៅរាជធានីភ្នំពេញ ព្រោះមានប្រជាពលរដ្ឋជាច្រើននៅតែមិនមានកន្លែងស្នាក់នៅជារបស់ផ្ទាល់ខ្លួន ហើយតម្រូវការខាងខុនដូរនេះដែរក៏នៅតែមាន ។
លោកបន្តថា គម្រោងខុនដូ មិងហួរ ដែលក្រុមហ៊ុនមិងហួរ បានចាប់ផ្ដើមសាងសង់សម្រាប់ផ្គត់ផ្គង់ជូនអតិថិជនក្នុងស្រុកនោះ គឺស្ថិតនៅលើទីតាំងមួយថ្មី ដែលមិនធ្លាប់មានខុនដូពីមុនមកនោះទេ គឺនៅតំបន់បឹងសាឡាង ។
លោកថា ៖ ការសាងសង់ ឬអភិវឌ្ឍន៍អ្វី ត្រូវមានអ្នកចាប់ផ្តើមទើបមានធ្វើបន្ត តែបើមិនចាប់ផ្ដើមនោះទេ ក៏គ្មានអ្នកធ្វើបន្តដែរ ជាក់ស្ដែងតំបន់បឹងសាឡាងជាតំបន់ថ្មី និងមិនធ្លាប់មានការសាងសង់ខុនដូនៅឡើយ ដូចនេះហើយទើបក្រុមហ៊ុនយើងចាប់ផ្ដើមសាងសង់វាឡើងមុនគេដើម្បីផ្ដត់ផ្គង់ជូនប្រជាពលរដ្ឋនៅក្នុងរាជធានីភ្នំពេញ »។
លោកឈួរ ឈុនហួរ អគ្គនាយកនៃក្រុមហ៊ុនមិងហួរគ្រុប បន្ថែមថា ជំហានដំបូងរបស់ក្រុមហ៊ុនបានសាងសង់ខុនដូដែលមានកំពស់១៩ជាន់ សរុបចំនួន ១៤២យូនីត និងមានមួយអគារទៀតត្រូវបានសាងសង់ឡើងដើម្បីទុកជួលជូនអតិថិជន ក៏ប៉ុន្តែបើសិនជាមានតម្រូវការទិញខុនដូពីក្រុមហ៊ុន នឹងពិចារណាលក់គម្រោងនោះទៅអតិថិជនផងដែរ ដើម្បីបំពេញទៅតាមសេចក្តីត្រូវការរបស់អតិថិជនក្នុងស្រុក ។ គម្រោងខុនដូនេះដែរ ត្រូវបានចំណាយទឹកប្រាក់ប្រមាណ១១លានដុល្លារអាមេរិក ហើយគ្រោងនឹងបញ្ចប់ជាស្ថាព័រនៅអំឡុងឆ្នាំ ២០២០ខាងមុខនេះ ។
លោកបញ្ជាក់ថា ដោយសារតែអតិថិជនគោលដៅរបស់ខ្លួន ជាអតិថិជនក្នុងស្រុក ដូចនេះតម្លៃខុនដូ ដែលត្រូវលក់ជូនអតិថិជនក៏មានតម្លៃសមរម្យផងដែរ ក្នុងនោះវាមានតម្លៃចាប់ពី២ម៉ឺនដុល្លារឡើងទៅ និងអាចរំលស់ត្រឹមតែ ជាង២០០ដុល្លារអាមេរិកប៉ុណ្ណោះក្នុងមួយខែ ។ ក្រុមហ៊ុនក៏មានគម្រោង និងត្រៀមសាងសង់ខុនដូប្រភេទនេះដើម្បីផ្គត់ផ្គង់ជូនអតិថិជនខ្លួនបន្ថែមទៀតដែរ នៅពេលគម្រោងទី១ របស់ខ្លួនបានបញ្ចប់រួចរាល់ ។
ឯកឧត្ដម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ផងដែរថា តាមការសិក្សារបស់ក្រសួងអំពីក្របខណ្ឌយុទ្ធសាស្ត្រអភិវឌ្ឍន៍ទីក្រុង នៅកម្ពុជាឃើញថា ចំនួនប្រជាជនរស់នៅក្នុងរាជធានី ក្រុងនិងទីប្រជុំជននៅឆ្នាំ ២០១៤ មានចំនួនតែជាង៤,៥លាននាក់ ត្រូវជា២៧,១ភាគរយ ហើយវានឹងកើនឡើងដល់ ៧,៩២លាននាក់ នៅឆ្នាំ២០៣០ ខាងមុខ ។ តាមទិន្និន័យនេះបានបង្ហាញឱ្យឃើញថា សម្រាប់រយៈពេល១៥ឆ្នាំ តម្រូវការលំនៅឋាន សម្រាប់តំបន់រាជធានី ក្រុង និងទីប្រជុំជនមានប្រមាណ ៨០ម៉ឺនខ្នង ដែលជាមធ្យមមានតម្រូវប្រមាណ ៥ម៉ឺនលំនៅឋាន ក្នុងមួយឆ្នាំ ។
លោកបន្តថា ដើម្បីឆ្លើយតបនឹងបញ្ហានេះក្រសួងបាននិងកំពុងសកម្មអនុវត្តគោលនយោបាយជាតិស្តីពីការរៀបចំដែនដី ក្នុងការកសាងផែនការរៀបចំដែនដីប្លង់គោល និងផែនការប្រើប្រាស់ដីគ្រប់កម្រិត និងគោលនយោបាយជាតិស្ដីពីលំនៅឋាន អោយសមស្របតាមតម្រូវការ នៃការរីកលូតលាស់ផ្នែកនគរូបនីកម្ម និងកំណត់តំបន់ទិសដៅយុទ្ធសាស្ត្រអភិវឌ្ឍក្រុងពង្រីកទីក្រុង តំបន់ស្នាក់នៅ និងជាពិសេសលំនៅឋានដែលមានតម្លៃសមរម្យជូនមន្ត្រីរាជការ និងប្រជាពលរដ្ឋដែលមានប្រាក់ចំណូលមធ្យមប្រាក់ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកបដោយចីរភាពនិងសមធម៌ ៕ ដោយសហការ
ចែករំលែកព័តមាននេះ